السلام عليكم ورحمة الله وبركاته
بعد أنقطاع طال حبيت أن اعود لكم بهذه القصه المتواضعه
طبعاً جاني طلب خاص أن انزل هذه القصه في خلان مع اني كنت حاب ارجع لكم في الصيف بمفاجاة رائعه
وأن شاءالله بشارك لين الصيف وفي الصيف يصير خير
=================
هذي قصه واقعيه وطبعاً من تاليفي
وسمحولي لاني بكتبها بالعامية الاماراتيه لان العربية الفصحه لكم عليها شويه!!
قبل ما أبدء أتقبل أي نقد ,,,,, نقدكم يطور من كتاباتي المستقبليه وياريت ما تبخلون عليه بأفكاركم ونصائحكم
==========================
أبطال القصة:
ولد عمي
بنت باكستانيه
نجم سهيل
==============
المكان: بريطانيا
جامعة: Nottingham Trent
=============
بعد ما خلصت الثانويه العامه في قسم الادبي سرت ادرس في بريطانيا درست في منطقة اكسفورد لغة أنجليزية وكورس فاونديشن. بعدي بسنه ولد عمي ياااا بريطانيا في منطقة تبعد عني ساعة ونصف في القطار تقريباً.
كنت دابم على اتصال معاه وفي يوم من الايام اتصلت فيه امه وصارت بينهم محادثة بسيطه عن وضعنا في بريطانيا
ألام : أبويه شحالك ؟؟ شحال ولد يدك(جدك)؟؟
ولد عمي: انا بخير اماه ولد يدي يشقح!!
ألام : أبويه تباني أخبر ابوك يكلم حد وينقلك عند ولد يدك؟
ولد عمي: لا اماه انا بعيد عنه ساعتين ولا مفتك منه وين تبين اسكن معاه!! ( وهو يسولف ويضحك)
ألام : وابويه عليك انا حد يقول هالرمسه عن ولد يده؟؟
ولد عمي : هي انا ارمس ,,,,,, وهو راضي
ألام : دام هو راضي بخليكم على راحتكم وعلى كيفكم مع بعض.... شي تبون منا أنطرش لكم عند ولد فلانه تراااا بييي عندكم ( ما تعرف تقول بريطانيا) قريب؟
ولد عمي: لا اماه ما نباااا شي ... مشكوره .... سلمي على ابويه وعلى اخواني كلهم
ألام: يبلغ الغالي ..... وهالله هالله في عمرك..... ورد السلام على ولد يدك
ولد عمي: أن شاءالله ي أمي ... ويبلغ سلامج ..... مع السلامه
ألام : مع السلامه
وطبعاً من هذاك اليوم وألام دوم تتصل وتحاول تنقلنا مع بعض ونحن كنا رافضين لان عمر المسافة ما بتفرق او بتبعد بينا.
دارن الايام وخلصنا الفاونديشن انا وهو وردينا البلاد وصادفنا ما صادفنا من مشاكل ومتاعب وعقب بدون أي واسطه وبدون تدخل أي شخص الله كتب لنا ندرس في جامعة وحده ونسكن في بيت واحد.
بحكم علاقتنا القويه مع بعض .. كنا نصارح بعض بكل شي وكنا نشتكي لبعض وكلنا نحش في الشباب مع بعض وكلنا نشوف بنات الجامعه مع بعض وكلنا نختار هذي لي وهذي لك بس طبعاً بينا بدون محد يعرف ... واذا اي بنت تكلمنا بخصوص الدراسه او ما شبه ذاك نسكت وكل واحد يتريا الثاني يرد ما كنا نحب نختلط ونكلم البنات.
وفي يوم من الايام كنا قاعدين في كوفي الجامعه نشرب كوفي وكالعادة نشوف الي ساير والي راد ونختار احلى بنت لهذا اليوم ( بطاليه) وتحركنا اتجاة الكلاس لان ما باقي شي عن المحاضره وفجأة مرت علينا بنت وكانت اية من الجمال وأخذنا نحش فيها ونتغزل فيها وفجاة لفت صوبنا وبالهجه البحرينيه قالت : عن من تتحجون؟؟ عني آنا؟؟
بعد ما بهتنا وسكتنا لمدة قصيرة رديت انا عليها بلهجتهم : أيي عيل عن من؟؟ في أحد أجمل عنج عشان نتحجى عنه؟؟
وباشرة بالسؤال وقلت: يخرب بيتج يوم انج عربيه ليش ما سلمتي لو حشينا فيج الحين؟؟
رد وقالت: يييه شدعوه... عبالك بسكت عندك؟؟
المهم من يومها حرمنا نتكلم عن أي بنت وهي قريبه منا بعد ما تمر البنت وتسير بعيد عنا نبدء نتكلم عنها.
وبعد فتره بسيطه قررنا ما نتكلم عن اي بنت بأي شي ونكون حبوبين مع كل الطلاب... وبالفعل مرت الايام والشهور ونحن لم نتكلم عن أي بنت.
وفي يوم من الايام مرت علينا فتاه ونحن في الكوفي تعرفون شو يعني يننتنا (جننتنا) كرهتنا في بنات الجامعه كلهن
اول ما شافه ولد عمي قال: أحمد بنات الجامعه ..لا بنات المنطقه كلهن لك بس انا ابااااا هذي
قلت له: انت خذ بنات بريطانيا والامارات والخليج كلهن بس هذي لا
وصار بينا خلاف كبير منو ياخذ هذي ... طبعاً هي ما تدري بس نحن نوهم عمارنا (ترى ألا سوالف) تعرفون وقت الفراغه والغربه شو يسون!!
المهم,,, نحن كلنا نتكلم عن البنات بس في الجامعه ومن نطلع ننسى السالفه بس هذي البنت تمينا نتكلم عنها أسبوع وفي كل مكان وكل وقت!!
البنت كانت مسؤولة طلاب تخصصنا وهي تدرس معانا نفس التخصص وفي يوم من الايام كان عندنا محاضره عن الارهاب من الامم المتحده ( دكاتره من الامم المتحده يحاضرونا) في الكلاس نشت هذي البنت وتكلم تقريباً جدام 200 طالب. ولد عمي وانا قلنا مب بس حلوه وجميله لا ولها شخصية قويه وقفت جدام الكل وهي واثقه من نفسها.
وتمينا نتغزل فيها ونتكلم عنها ونحن مستانسين عليها ,,,, المحاضره كانت في كلاس على شكل المسرح ولد عمي قاعد في الصف الي بعدي يعني فوقي انا لازم الف صوبه عشان اكلمه ,,, وبالفعل كنت مقبل صوبه ونرمس عن البنت
فجاة ولد عمي سكت وركز بنظره على الصبوره وانا ارمس التفت قلت يمكن الدكتور شافنا.
وما لقيت الا البنت واقفه عدالي وقالت : can I set next to you (ممكن أجلس جنبك؟؟)
رديت عليها وانا أحاول اسولف: مرحبابج في ذمتيه مليون ( بالعربي)
قالت: what was that ( شو قلت؟)
قلت لها: more than welcome
شكرتني ويلست عدالي وطبعاً ولد عمي صخ وتم يتسمع سوالفنا
والبنت تمت تشتكي وتتكلم وايد وصار بينا كلام كثير كثير
,,,,,, في الجزء القادم بخبركم به
===========================
القصه واقعيه نفس ما قلت لكم
أكرر نقدكم يطور من كتاباتي المستقبلية
أذا كان في تشجيع منكم وحماس أن شاءالله بحط لكم الجزء الثاني
أخوكـــــــــم
نجم سهيل