الجـــــزء الثاني من القصه
___________________________
الله يسلمك يت البنت ويلست عدالي بعد ما أستأذنت وأذنة لها
وقبل ما تيلس قالت كلامات تسب حد ما قدرت اسمعها عدل لانها قالتها بصوت خفيف
في خاطري قلت يمكن يوم رمستها بالعربي عصبت وسبتني فما قدرت احطها في خاطري وسالتها
( طبعاً الحاور الي بينا كله بالانجليزي)
قلت لها: منو سبيتي قبل ما تيلسين؟؟
قالت(وهي متضايقه): الاقروب الي عندي (جماعة التخصص)
قلت لها: ليش شو فيهم؟؟
قالت: حيوانات... انا المديره ويوم اسوي شي يسيرون يغيرونه على كيفهم بدون ما ادري
كملت قايله: خلاص بطلع عنهم هذيلا مب مال شغل واحترام
قلت لها: قسم بالله والله ان الزعل ما يناسب ويهج ,,, عطيتها التيلفون قلت لها شوفي شكلج في الشاشه
قالت: شو فيه
قلت لها: بأبتسامه وحده تحرقين كل طلاب وطالبات الجامعه,,, لو الشور عندي ما بحطج مسؤولة الاقروب بس لا والله احطج مديرة الجامعه
ورديت على عمري بسرعه قلت لا لا لا ما بحطج مديرة الجامعه
قالت: ليش؟؟ اذا بتحطني اباااا اكون مديرة الجامعه ( وهي تبتسم)
قلت لها: لا اذا حطيتج مديرة الجامعه ما بشوفج ابداً ,,, الحين بعدنا نشوفج في الكوفي وفي الممر وعرفة الكمبيوتر
قالت لي: على العموم,,,, أنا فلانه وأنت منو؟
قلت لها : انا أحمد
قالت: وهذا منو؟؟ (وهي تاشر على ولد عمي)
قلت وانا اضحك: واحد مينون ضايع ما يعرف كلاسه وين يوم شافني عربي قعد معاي
طبعا الكل ضحك هي وولد عمي لانها كانت تشوفنا دوم مع بعض ودوماً نضحك
قالت لا صدق من: قلت لها هذا أقرب وأحسن صديق عني ف الدنيا خبرتها باسمه وبعلاقتي معاه وانه ولد عمي
لفت صوب ولد عمي وقالت له: nice to meet you (حد يترجمها ما عرف كيف بالعربي)
ولد عمي: nice to meet you too
البنت وهي تكلمني قالت: من وين انت؟
قلت له: توقعي
البنت: من أسيا بس من وين بالضبط ما اعرف
قلت لها: انا وولد عمي من الامارات
قالت: وين هذي؟؟
قلت لها: دبي (طبعاً كلهم ما يعرفون الا دبي)
طبعاَ هذا كله مقدمات للنقاش الجديد
قالت: أحمد تعرف أني أتمنى يكون عندي ربع أسيوين (من اسيا)
من قالت جيه صدري انشق وولد عمي مندمج في المحادثه ,,, صدمتنا بكلمتها تبااا ربع من اسيا
قلت لها: أسيا كلها تمنى ترابعج ,,,, سمعي بخبرج شو السالفه
قالت:اي سالفه؟؟
قلت لها:الله يسلمج نحن دوم نقعد في الكوفي ونشوف البنات ونختار هذي لي وهذي لك
بس مره وحده قطعنا هالسوالف وتمينا كل ما نيلس في الكوفي نحش فيكم وفي المدرسين
قاطعتي قالت: شو قلتوا عندنا
قلت: مش مهم ,,, المهم في يوم من الايام دخلتي علينا الكوفي وطلعتي بسرعه ورسمنا صورتج في عقولنا من جمالج الخارق (وهي مبتسمه وفرحانه)
وقلت لها اليوم من الخاطر تضايقنا وقبل ما اتييين كنا نرمس عندج انا وولد عمي
يوم تكلمتي جدام الطلاب وقلتي محاضرة الــ UN بتكون في الروم الثاني مب هنا
تخبلنا عليج وقلنا كيف كيف نكلمها
قلت لها: تعرفين نستحي انييي ونرمس بدون اي سبب مقنع
بس الحمدلله بروحج يتييي ولا بعد تبين صديق عربي
والله ان العرب يتمنون كلمه منج بس مب يصادقونج
المهم البنت صدقت عمرها وتمت مستانسه وطول الحصه تمت تكلمني تكتب لي في ورقه وانا ارد عليها طبعاً هنيه ولد عمي ما يعرف شو نقول لانه كتابه أما المحادثه الاولى كانت كلام لان الدكتور بعده ما وصل
كتب كلام عجييييب وخطير طلعت من الكلاس شال الاوراق في يد سالني ولدعمي
قال: شو قلتوا في الاوراق؟
قلت له: قالت لي كلام ما تصدقه
حرقه الفضول وقال يا أخي يالله قول
قلت له: قالت جيه جيه وتبانا انكون جيه
ما صدق ويوم راويته الاوراق أنصدم قال حضك ولد عمي
المهم طلعنا سرنا البيت وانا طول اليوم أقراء الاوراق وأفكر فيهن
ولد عمي: يقولي ادري ان موضوع خذ مجرى الجديه بس ولد عمي اتكل على الله
قلت له: ما عليه خلني بفكر
ضحك وطلع من الغرفه عني
نشيت الصبح وكالعادة أدخنت وتعطر وحطيت دهن عود وطلعنا وطول الدرب ولد عمي يضحك عليه
يقول: شعليك اليوم دخون وعود والعطر من كيلو ينشم ,,, يلعن ابو الحب يوم يعذب الانسان
وانا سارح بتفكير مش معاهم وعقب هو نبهني
وصلنا الجامعه وتلاقيت مع البنت في غرفة الكمبيوتر
صبحت عليها وسرت يلست أجيك أيميلي وهي بندت كمبيوترها ويت يلست عدالي قالت شو رايك انسير أنحش في الطلاب ونختار بنات لك انت وولد عمك وشباب لي (وضحكت) تقصد أنسير الكوفي
سرنا وفي الكوفي كل الطلاب كانوا يالسين قالت تعالوا بنيلس معاهم سرنا وعرفتنا على بعض
وتمت تمدح فينا وقالت كلام واااايد عنا ومعظم كلامه كان عن فضايحنا وقالت لهم ان كل ما نيلس في الكوفي نحش في الطلاب والمدرسين
وتموا يسالونا كل واحد يبااا يعرف شو قلنا عنه وخبرناهم.... وخبرناهم بالالقاب الي طلعناهن عليهم واستانسوا وايد على الالقاب وطلعوا علينا القاب هم ذيك الحين (فرش)
عقب سرنا الكلاس وبعدين طلعنا وردينا البيت وانا بعدني اقراء الاوراق وأفكر فيهن
وعقب قلت بتكل على الله والي فيه الخير بيصير
كتبت ايميل للبنت وخبرتها بكل شي وما ردت عليه
بالباجر ما عندنا دوام بس سرنا الجامعه انا وولد عمي عندنا شويه شغل
وشفنا البنت اول ما شفناه يت ولوت عليه وتمت تصيح (دموع الفرح)
قالت: انا قريت ايميلك بس ما قدرت ارد عليك ما صدقت عمري ...... انتوا احسن ربع عرفتهم في حياتي
المهم سالفة الباكستاني معاي كبرت والكل قام يسمع عنها
لان ولد عمي لسانه متبري منه
مرت الايام ونحن كل يوم نشوفها ونكلمها وعزمتني كمن مره وعزمتها وعقب كل مره اقدم تقرير كامل مكمل حق ولد عمي
وقبل نهاية العام في فترة الامتحانات قلت لها بنخلص الامتحان النهائي وبنطلع على طول على المطار تمت تصيح وقالت صدق بفتقدكم
هديتها وقلت لها بنكون على اتصال كل يوم وخبرتها اني طول اليوم وكل يوم افكر فيها وكتب فيها قصيدة لاخوي الكبير اشاكي فيها عنج
أصرت عليه أسمعها القصيدة واشرحها له رفضت قلت لها عقب مب الحين
عقب كمن يوم يتني وقالت دخيلك اخر السفر يومين بس قلت لها والله فالج طيب اسبوع لو تبين هب يومين قالت اوكي اخره اسبوع
وأخرت السفر اسبوع عشان خاطرها ,,,,,, طبعاً طلبت أأخره عشان تسوي لي مفاجاة وبالفعل سوت لي فجاة وكانت احلى وأغلى فجاة مرت عليه في حياتي
عشان ما نستبق الاحداث في الجزء الرابع بخبركم عن شو المفاجاة وشو الي صار في العايله ,,,,,,,,,
أما الجزء الثالث بيكون قصير جداً وهو عبارة عن القصيدة الي كتبتها لاخوي وبتكون في قسم الشعر أن شاءالله
أجمل تحيه
نجم سهيل