المستوى: 24
المسافة بالضبط بيني وبين الدوام 122 كيلوا.. وأقطعها في ساعة ونص أو أقل بعشرة دقايق أحيانآ... ومو كل موتر ينفع للطريق الطويل يقولون السيارات الأمريكية مريحة أكثر من السيارات اليابانية في الخطوط البعيدة.. وفي الطريق تكون ثابتة لا تلعب يمين ويسار وعلى المنحنيات تلزق بالشارع وما تزلق على سرعات عالية.. وفوق هذا السيارات الأمريكية تكد المهم شريت لي موتر للطريق بس يعني اروح فيه الدوام وارد.. ما افتر فيه بالبلاد أو احاوط فيه لأنه مخصص للدوام ويا حلاته من موتر كان comaro 92 كد على الطريق معاي 3 سنوات وكنت سيد الشارع لما امشي لما اكون على سيد السرعة وفي موتر وراي يبغي يتجاوزني فبكل احترام يتم وراي من دون صوت ولا ليت لما افتح له السيد ويمر بكرامته نفس الشي لما ابغي اتجاوز من بعيد يفتحون لي الطريق يشوفون تمساح ياينهم وكل شي عال العال على الطريق ومحد يطلع من اللفة جدامي بشكل مفاجئ لي ولحد يذري وراي ويلزق بالموتر يعني كنت مرتاح وأنا أسوق هالكومارو لكن لما ارتفع سعر البترول اضطريت إني أبيعه لأنه 8 سلندر ويشرب بترول شرب اليهد المهم بعت السيارة ورحت العوير في دبي أدور لي سيارة مستعملة ثانية للطريق ونصحوني بسيارة صغيرة وإقتصادية وشاورت نسيبي فكان رده اني آخذ سيارة ألمانية golf شركة الفولكسفايجن السيارة كل شي فيها زين اقتصادية وخفيفة وثابته على الطريق لكن شي واحد ما عجبني وهو اللي ظلمني على الطريق RESPECT محد يسويلي سالفة يوم أسوق يلفون علي ويلزقون ورى الموتر ومن بعيد يديمون لي ان شافوني ماسك السيد اليسار وعند الإشارة إن تأخرت شوي صمخوني بهرناتهم وعلى اللفة إن ما ظهرت بسرعة شوي وبيدعموني حتى أصحاب التكاسي قاموا يتفلسفون علي وين راحت ايام الكومارو.. لما أمشي بالسيارة الصغيرة هذي على بالهم باكستاني يسوق أو هندي.. يا الله ينزل سعر البترول وبرد الكومارو وبراويهم قطاع الطرق هذيلا لكن البترول كل ما ياه وقت الا ويزيد... الظاهر اني بركب سيكل في نهاية المشوار.. وبعدها ترحمو علي لأنهم هالمرة بيدعموني