سـاعـدونـيـهـ

Emaratee · 18 Mar 2006, 09:37 PM

ما اجمل أن يرى الإنسان النور بعد الظلام
والراحه والطمأنينه بعد الحيرة والضيق
اضع مشكلتي اليوم علي اجد بين طيات خلان من يهدي قلبي إلى النور والراحه

.: :. لا يشعر بالمصيبه إلا من عاشها .: :.

ربما يَعجب البعض من مشكلتي وربما يسخر البعض الآخرويراها بالشيء التافه السخيف..

ولكنني اشعر بأنها شده تلاحقني .. وضيقا في حالي .. فأنا أعاني منها كثيرا ..

دائي إرتفاع صوتي فأين دوائي ..!

ريم احترمي نفسج ولا ترفعين صوتج على امج
لم اكن اقصد

ريم والله اني حذالج واسمعج مافي داعي اتصرخين
لم اكن اقصد

ريم فضحتينا ما تم حد الا وسمع السالفه حشه ولا مكرفون
لم اكن اقصد

ريم ريم ريم .. صوت صوت صوت ..

مررت بمواقف كثيره احرجت في بعضها .. وجرحت في معظمها ..

فماذا افعل ..! إنه اسلوبي الذي كبرت عليه طبع سيء ترعرع فيني ويصعب علي التخلص منه ..

فعندما اندمج في موضوع ارفع صوتي .. وعندما اتحدث مع صديقاتي ارفع صوتي ..

وعندما ادخل في مناقشات حاده ارفع صوتي .. ليس لأنني على ضعف بل لأنه طبعي ..

اعلم بانني كبرت على هذا التصرف الذي يصدم به من هم حديثو التعرف بي ..

يخال لهم عند رؤيتي فتاه عذبه رقيقه ولكن سرعان ما يكتشفو الواقع الذي فرضني فتاه صوتها حاد مزعج

هذه الامور كلها لو كانت تهمني فهي لا تهمني مثل اهتمامي لنيل رضى امي وابي ..

نهانا الشرع من رفع اصواتنا عليهم وبين لنا عقوبة الامر ..

ولكن وللأسف اجد نفسي ارفع صوتي على أغلى من هم في حياتي ..

اقسم انني لا اقصد ذلك انه طبعي فانا اتكلم بإسلوب عادي فأرى ملامح الضيق على وجه امي ظناً منها أني لا احترمها

وملامح العتاب من ابي .. فهل أنا عاقه ..! إن استمر بي الامر على هذا المنوال ..!

اقول لأبي دائما اني لا اقصد عندما يقول لا ترفعي صوتك واحاول ان اظبط نفسي واكمل النقاش بهدوء ولكن سرعان

اجد صوتي يزلزل المكان ..

فماذا افعل ..! يقالي لي كثيرا سأواجه العديد من المشاكل في المستقبل فلا يوجد رجل يقبل بإمره ترفع صوتها عليه وان كانت كما اقول لا تقصد ..

كيف لي التخلص من هذه العاده ..!

انتظر ردردكم التي ستمنحني مزيجاً من الأمل والتفاءل ..

ما شجعني طرح مشكلتي بين إيديكم رؤيتي لردودكم المقنعه في مشاكل غيري اعلم أن مشكلتي تختلف عن باقي المشاكل ولكنها تبقى مشكله بالنسبه لي ..

وما جعلني اتردد خوفي من ان تخرجو كما دخلتم .. دون اي كلمه .. من يدري علها تنير دربي هذه الكلمه فلا تحرموني منها ..

واسمحو لي ان اطلت عليكم ..

واسال الله لي ولكم العفو والعافيه ..

ريماني

maryame · 18 Mar 2006, 10:12 PM

السلام عليكم...

شو هالحركات يا ريماني دامج بتحطين اسمج ليش ماحطيتيه روحج.. حركات
اونه الاماراتي بيسويلج واسطه يعني ..<< اسولف وياج الغاليه
أصلا كم يسوى ان يكون الموضوع باسمج وينور القسم ويحليه

الحمدلله انج عرفتي انها مشكله ((فادكراك المشكله هي نصف الحل)) << احم احم
عالأقل بتريحيني شوي من حشرتج ..لووول..

((اجد نفسي ارفع صوتي على أغلى من هم في حياتي))
..فديت روحج أدري انج تقصديني خلاص فديتج مسموحه

((يخال لهم عند رؤيتي فتاه عذبه رقيقه ))
فهذي أنا معاج ..لوول

الحل:
<<< خخخخخ

الصوت العالي مطلوب
لكن مب دايما ..
مزعج
لكن مب دايما..
وناسه
لكن مب دايما..

ف باختصار هذي مشكله محد يروم يغييرها لأنها جزء من شخصيتج ومافي انسان كامل..

والسموحه منج يالغاليه..

صدى الليل · 18 Mar 2006, 10:45 PM

السلام عليكم ورحمة الله وبركاته
أختي ريماني
بالنسبه لصوت العالي أحيانا الواحد يرفع صوته من دون مايحس
خاصه إذا كان يرمس وحد قاطعه أو كثر الكلام من كذا صوب
لكن تقدرين تغيرين هالشي انتي يوم تنفعلين يعلى صوتج فحاولي
أنج يوم ترمسين حد تنتظرينه لين يخلص رمسه ويسكت عقب بدي رمسي
وأول مايقاطعونج أو يدشون عرض أو أياا صوت متدخل سكتي ليين يخلص
صح بتنحرق اعصابج شوي لكن سوي كنترول على نفسج وبتعودين أنه
دايما يكون معدل صوتج الطبيعي ولاينرفع عن حده خلي أعصابج دايما هاديه
وصووتج أن شااء الله دايما بيكون هاادي وأنتي مثل ماقلتي أنه فجأه يتغير صوتج
ويصير عالي هذا دليل على أنه طبيعة صوتج عاديه لكن يوم تندمجين أو تناقشين
لا إرادي يزيد مستوى صوتج وهذي حلها جدا بسيط تحكمي بأعصابج وتكلمي بهدوء
وإذا واجهتي أيا من العوائق ألي قلتها ألزمي الصمت دقايق وبتلاحظين أنه صوتج مايعلى
وشكرااا لج ريماني ..
وشكراا لك Emaratee..

Meyassy · 19 Mar 2006, 12:44 AM

السلام عليكم ورحمة الله وبركاته

افا عليج الغالية ما بنقرا المشكلة ونظهر مثل ما دخلنا

ومشكلتج مب تافهة ولا شي بالعكس

هذا شي تعودتي عليه من يوم صغيرة يعني هذا طبع فيج انج دوم صوتج عالي

واوقات النقاش تحتدين و .... و....

حلو انج تنتقدين نفسج وهذه بداية التغيير

شوفي الغالية

حاولي انج ادربين عمرج على اسلوب التعامل واسلوب الحوار

وتذكري دائما انه ما يليق بوحدة انها ترفع صوتها وهي ترمس .. البنت يجب انها تكون رقيقة في اسلوبها ورمستها ..

حاولي قبل لا تردين او ترمسين اذا حسيتي انج بترمسين بصوت عالي خذي نفس عميق وعدي من واحد لي ثلاث بتكون خفت الحدة والعصبية وحاولي انج تردين بصوت منخفض وهادي

وبقولج شي بس لا تضحكين عليه .. وانت يالسة في غرفتج حاول تتدربين يلسي حد من خواتج او حتى صورة ويلسي رمسها بصوت هادي وكرري المحاولة وعقب سيري يلسي ويا الوالدة او حد من هلج وسولفي وياهم وشوفي اذا تقدرين تتحكمبين فنفسج او لا ..

طبعا هذا الشي ما بيي في يوم وليله .. يباله وقت المهم انج ما تملين لانه شي تعودتي عليه سنين مستحيل بيتغير بسرعه يباله وقت وصبر منج .. وكل ما حسيتي انج ما ترومين قولي حق عمرج لا بحاول وبحاول لي ما اغير هذه العادة السيئة .. وصدقيني بتقدرين

جربي مرة ومليون والف وان شاءالله بتتغلبين على هذه الصفة ..

وان شاءالله اتمنى نشوف رد بانج قدرتي وبالتجربة انج تتغيرين وشو راي الي حولج بعد هذا التغيير

متاكدة انه بيكون ردة فعل جميلة عليج بالاول لانج بتحسين انج انسة رقيقة والي حولج بيستانسون على هذا التغيير ..

بانتظار ردج

والسموحة منج

Emaratee · 19 Mar 2006, 01:52 AM

شكرا لكم

والعفو وفالكم طيب اخواني و اخواتي ..

ولي عوده

الظبــي · 19 Mar 2006, 08:51 AM

السلام عليكم و رحمة الله و بركاته ..

الغاليه مشكلتج تشابه مشكلة اخت عزيزيه عليه جدا ..

يمكن انت تعودتي على هالأسلوب من الصغر .. او انج من النوع اللي وايد حركي
يعني تكونين متحمسه في طرح المواضيع اكثر من اللزوم ..

بما ان صوتج عالي اكيد فيج روح المرح ..

بس طبعا ما ننسى اذا ارتفع صوتج لأعلى الدرجات و في اماكن عامه يسبب احراج !!

الغاليه

يعني انت تحسين لو رمستي بصوت واطي ما بتوصل المعلومه او السالفه اللي بترمسين بها ؟
او انج ما تسمعين حسج يوم ترمسين بصوت منخفض ؟

ماشالله عليها مياسي عطتج نصايح حلوه و انا بزيد عليج
ترى يمكن تكون فيج اسباب عضويه !! الله لا يقول انشالله
بس فعلا ربيعتيه اللي اعرفها شراتج اقترحت عليها
تراجع عيادة الانف و الاذن و الحنجرة اتضح ان طبلة الاذن عندها غير سليمة
عسب جييه ترمس بصوت عالي !! عرفتي ليش ؟ عسب تسمع صوتها
و ترى هي ما تحس انها يالسه تزاعج ..

والله اعلم ..
خويتكم شمس و قمر ..

شوق البحر · 19 Mar 2006, 12:23 PM

++~
ريماني
~++

هلا الغالية

افا عليج لا تحاتين من شي ..

مثل ما فهمت من كلامج هي مجرد عادة عندج .. مش عارفة كيف تسيطرين عليها ..

مثل ما قالت مياسي .. اضبطي نفسج اختي

ادري الكلام سهل..والتطبيق صعب

بس بما انج تبين هالشي من خاطرج معناها بتقدرين عليج

يوم اي حد يرمسج ذكري نفسج ان للحوار آداب..هالشخص ما خلص كلامه بترياه يخلص ..

يقول كل اللي عنده وبعدين بتكلم ..

هالشخص يالس حذالي .. اذا حتى اليلسة لازم تراعينها ..

جابلي الوالد او الوالدة ربي يحفظهم فـ يلسة عدل..و دون ما تحسين بتشوفين نفسج تتكلمين باسلوب مختلف

واذا ما فادت وياج هالطريقة ...

دربي نفسج ^_^

يلسي ويا نفسج في الحجرة مثلا او اي مكان تكونين فيه بروحج ..

وحاولي ترمسين مع نفسج ..اتخيلي مواقف اتصير او حد يكلمج بعصبية..

وادربي تردين في مثل هالمواقف وحطي في عقلج انطباع عن كيفية تصرفج ..

...و تقدرين تلاحظين هل صوتج عالي والا قدرتي تضبطينه ..

شوي شوي بتحسين نفسج صرتي احسن..واكيد يباله مثابرة ومتابعة مش في يوم وليلة بتتحسنين .. .

السموحة منج اختي وربي يحفظج

الروح · 19 Mar 2006, 01:49 PM

وعليكم السلام ورحمة الله..
شكرا لك اخوي اماراتي على هذي المبادرة الطيبة منك..

ومثل ماقالوا خواتي في ردودهن..

بالفعل هذا الشي مابيصير بين يوم وليله..ومثل هذي الحالة تحتاج لوقت وطولة بال..
لان انتي من الصغر تعودتي على هذا الاسلوب وكبرتي عليه ..يعني مرت عليج سنين..
والحين في الكبر موضوعج فقط يحتاج لصبر وتأني بالرد..

يعني قبل ماتردين على اي شخص.. حسي بنبرة صوتج كيف بتكون..واذا ادركتيها صدقيني بتقدرين تسيطرين عليها بكل سهووولة.

والله الموفق لج غلايه

وفايا · 19 Mar 2006, 03:13 PM

وعليكم السلام ورحمه الله وبركاته

مابزيد على اللي قالنه خواتي.. وعليج بالصبر وانتي تحاولين وان شاء الله بتوصلين للي تريدينه.. بس ابا اقولج عندي خويه تعاني من نفس المشكله صوتها ينسمع من بين اليدران <-- تبالغ لوول ،، لكن تصدقين والله احب هالشي فيها واعتقد اني بشتاق لازعاج صوتها اذا فـ يوم عدلته <-- تواسي ريماني ^_*

Emaratee · 19 Mar 2006, 04:43 PM

شكرا لكم اخواني واخواتي على هالردود الرائعه ..

وإن شاء الله الأخت تستفيد من هالشيء

الذين يشاهدون محتوى الموضوع الآن : 1 ( الأعضاء 0 والزوار 1)

(View-All) الاعضاء الذين شاهدوا الموضوع : 0
There are no names to display.