السلام عليكم و رحمة الله و بركاته ..

هاهي قصتي بين ايديكم .. اتمنى ان يكون حظها جيدا معكم ..
و شكر و تقدير خاص للاخ العزيز ظـل القـمر على تشجعيه لي ..
لن نطيل عليكم ..
فلنبدا رحلتنا مع تمنياتي ان تنال قصتي على رضاكم ..

الــجــزء الاول

بسم الله الرحمن الرحيم

خليفه : تامرين امر فديتج يا غرشوبتنا
ام سعيد : وايه منك انت يالوتي
خليفه : هاهاهاهاها فديتج يالله امايه انا بظهر بخطف على احمد و بنظهر رباعه
ام سعيد : الله يحفظكم من الشر و ديروا بالكم على رواحكم و عن السرعه الزايده
خليفه : ان شاء الله امايه .. حبها على راسها و ظهر

ام سعيد حرمه عوده و تحب عيالها حب محد يتصوره و تخاف عليهم من كل شي و هم مب مقصرين وياها و ما يردونها بشي و و تحاول تعوضهم عن ابوهم ابو سعيد الله يرحمه توفي و عياله بامس الحايه له لكن قدر الله ما شاء فعل و الحمدالله على كل حال عندها 6 عيال ثلاث بنات و ثلاث شباب سعيد البجر عمره 27 معرس و ماخذ شما و عيالهم يابر و عمره ثلاث سنوات و شهد و عمرها سنتين و عقبه اخته حصه عمرها 26 معرسه و ماخذنها عبدالله ولد خالتها و عندها ولد واحد و اسمه خالد عمره سنة ست شهور و عقبها خليفه و عمره 24 سنة متخرج من جامعة الامارات و مقدم على وظيفه و قابلنيه عقبه اخته اليازيه و عمرها 22 تدرس بجامعة الامارات سنة رابعه ما باجي شي على تخرجها و عقب هادف و عمره 20 بالتقنيه سنة ثانيه و عقب الريم عمرها 18 سنة ثالث ثانوي و عقب دلوعتهم نوف

ام عبدالله : مرحبا الساع فديتك اشحالك
عبدالله : مرحبابج زود بخير و سهاله امايه انتي اشحالج ..
ام عبدالله : بخير يالغالي الحمدالله على كل حال الا وين شما مرتك
عبدالله : احينه بتيي امايه
وعلى دشت شما شاله ولدها سارت و حبت عمتها ام عبدالله و قعدت عدال ريلها
حصه : اشحالج عمو ربج بخير
ام عبدالله : بخير و سهاله بنتيه يسرج حالي فديته ولدي والله تعال خلوود تعال عنديه
عبدالله : سير عند يدووه خلود
خالد : ماليد يدوه لابثه مال وحث
عبدالله : هاهاهاهاهاها شو وحث بعد
بدر : اسميه ولدك عجبه والله ما ينلام ظاهر على ابوه
عبدالله : اسكت انت عاد من زينك
بدر : عالاقل احسن عنك البنات يتركضن وراي هب شرواك حليلك والله ..
ام عبدالله : شو هالمنكر مسود الويه ما تشوف مرته عداله عيب عليك اخوك العود
حصه : لا عمو خليه يرمس يعرف شغله عقب ..
بدر : شرده دام المهيريه نطقت ..
الكل : هههههههه
وعلى نزلت مهره اختهم من الدري
مهره : شو بليل ولا صبح احينه
عبدالله : لالا سيري رقدي بعدنه فير
مهره : زين يالله باي
حصه هههههههه حرام عليك عبدالله
مهره : هاااااا شو قلتو هههههههه اشحالكم شخباركم شو مسوين
بدر : عنبووج بنيه و جيه ربشة هبي هباج الرب
مهره : اخر واحد ترمس انت اكبر عنك احترمني
بدر : ااااه يالقهر امايه ليش يبتوني عقبها .
ام عبدالله : بعد ربك و الحمدالله على كل حال و زين يوم انها ظهرت اكبر عنك قلنا بتعلمه الهدواه ظهر الا العقل زينه
و جان ابوهم يدش عليهم ابوهم وايد حبهم و جنه اخوهم العود هب ابوهم عنده ثلاث عيال الله رزقه بيهم كان يبا الزود بس مرته تتعب بالحمل و قال اهم شي راحتها عيالي بيكبرون و بيبون لنا اطفال نتونس وياهم عبدالله البجر و عمر 28 ويا ولد عمه سعيد ريل اخته روح بالروح من يوم هم صغار ويا بعض و عقبه مهره اخته عمرها 23 وايدين اتقدمن لها بس هي ما تبا تريد تتفرغ لدراستها و عقب يصير خير و عقبها اخوها بدر و عمره 22 متخرج هالسنة و يشتغل ويا ابوه بالشركه


فهد و احمد و علي احلى ثلاثي اخوان و و فرق بينهم بس سنة اكبرهم فهد البجر و كل واحد يتريا الثاني يعرس عسب هو يعرس ما يبون يعرسون و الحرمه تشغلهم عن اخوانهم فهد عمره 25 و احمد 24 و علي 23 كلهم متخرجين من جامعة الامارات و يشتغلون ويا ابوهم الا علي ما كان يحب الشركات الخاصه و دارس علوم سياسيه و يشتغل بالوزاة الخارجيه بعدنه موظف يديد ابوهم بو فهد شديد و ملتزم وايد بالرغم من هالشي يحب عياله و هم يحبونه و مب مقصر وياهم بشي و امهم تعتبر شرات خواتهم معرسه صغيره و يابت عيالها و عندنا بنتين ميره و عمرها 20 سنة و غايه عمرها 18 سنة ثالث ثانوي ويا الريم روح بالروح ويا بعض بكل شي فرحهم و حزنهم والله يبعد الحزن عنهم
فهد : والله يا ريال الرنج محلاتها مالتي ماريد اغيرها هب غصب كل يوم ازيد شي و عقب ابيعها بعدني ما ينييت و لا تنسى انها هديه من دندونه فديتها
علي : هيه يا ريال من قدك دانوه معطتنك ويه هب شروانا
فهد : اسميك ناكر معروف مادرى منو ماخذلك ذيج اساعه المرصعه بالالماس و تقول مب معطتنه ويه
احمد : ماعليه يابوووي معروف عنه هالريال مب راعي واجب و ناكر معروف عقولتك
فهد : من زود كرمك امره صاك البلاد بخيرك
علي : حليلك يا احمد دورك اليوم الرب يعينك ههههههه
احمد : انا هب شرواك اسلم عمري علي هالدقس
فهد : احترموا عماركم مسودين الويه عاد اوني اخواكم العود
الكل ظحك و كان واصل خليفه عسب يشيل احمد و يسيرون المول
خليفه : حياااااااالله الريال
تخاشموووا و قعدو يسولفون
فهد : وين سايرن هااا ماشاءالله اشوفك كاشخ و ريحة العود تفوح
خليفه : اعيبك يا رياال خلينا نستانس دام ما دخلونا القفص
جان يرن تيلفون علي و سار عنهم
احمد : سلم على سونيتا و خبرها اليوم بنجابل عند الزباله
خليفه : هاهاهاهاهاهاهاهاهاها غربلااااااات ابليسك
فهد : يالله عيل شباب الله وياكم انا بعد ساير الربع يتريوني
ساروا احمد و خليفه المول و اجتمعوا ويا ربعهم فستار بكس و ساروا علي و فهد ويا بعض عند ربعهم لانهم شله وحده و مجارب عمارهم و مسوين شله حلووه و الحمدالله الله هادهنم بالرغم انهم سولفجين بس مب راعين بنات الا احمد الغريب انه ظهر غير عنهم و كان جيه راعي بنات شي بس هم الى دوم يعقن عمارهن عليه و كل ما نصحوه قال هذول بس اقضي وقتي وياهم لكن محطي وحده فبالي و ما تسوى شعره من هذول معنه دوم ربيعه خليفه ينصحه لكن ماشي فايده

وصلوا احمد و خليفه و وايهو ربعهم و طلبوا الى يبونه و قعدوا سوووالف
احمد : تصدقوون شباب افكر اغير سيارتي
يابر : و شو فخاطرك أي سيارة
احمد : كامري كوبي شو فناااانه شباب
خليفه : بس احيد مانعينها من البلاد
مبارك : هيه مانعينها للحين مب عارف السبب والله
احمد : بنشووف والله و عاد لو جيه السالفه بشوف باخذ كاين يمكن
خليفه : انا بعد مفكر اخذ كاين
مبارك : انت خذ اس و الثاني ياخذ تيربووو
يابر : هيه عسب مب كل يوم تيوونا متكافخين تظاربون على سيايركم
احمد : اسميييييييييك متفيج يالدقس شوووف شووف الجياكر
خليفه : وووووع شوو ها اخضر و احمر و اصفر جيه الوان الطيف
يابر : ههههههههههه حليلك يا احمد ثره ذوقك شرا ويهك
احمد : جب انته و جان يعدون من عندهم
خليفه : ماشاءالله اليوم مسوين سرك بالموول و يايبن مهرجين
البنيه : يتسخف الاخ
خليفه يرمس مبارك : بنات اخر زمن لا مذهب ولا حشمه
البنيه استحت و فارقت عنهم
احمد : خلووووووووف شو سويت ياخي شو هااا انا اعرف شقايل ادبها
خليفه : مانريد مشاكل و خليها تولي
مبارك : هيه صدقه خليفه

تموو ويا بعض لين الساعه وحده تقريبا و عقب كل واحد رد بيته دش خليفه بيت و يلاقي خواته سهرانات ليلة خميس و وياهم بنت خالتهم ..

خليفه : السلام عليكم و رحمة الله
كلهن : و عليك السلام و الرحمه
خليفه : اشحالكن ربكن الا بخير
كلهن : الحمدالله بخير و سهاله
الريم : وين كانت الحواطه اليوم
خليفه : وانتي شو لج اوووف مشكله الملقوفين
الريم: امبووك مطيح بالمول وين بتسير يعني
خليفه : ما يطوفج شي انتيه ساااااااحره لا والله الساحره جدامج مظلومه ياربي عليج حتى ما خليتنا انسلم على غايه اشحالج غايه السموحه بس بروحج شفتي
غايه : ماعليه خوويه اانا زينه الحمدالله انت علومك ربك بخير
خليفه : الحمدالله بخير و سهاله يالله عيل اترخص عنكم الحينه بسير حجرتيه
غايه : الرب حافظك
الريم : واااايه بذوووب ماروم عالرقه انا
خليفه : ريمووو يوزي احسلج اتعلمي منها من بدل ما قاعد تطنزين
الريم : انزين انزين اجلب ويهك الحينه
خليفه : الله يهديج يالدبه ويا راسج
خليفه و هو ساااايره حجرته شاف الليت بحجره اخته نوف مفتوح دق البات و دش
خليفه : السلام عليج
نووف : عليكم السلااام و الرحمه << بدلع
خليفه : اشحالج دلوعتي
نوف : انا زينه الحمدالله
نوف تحب االاشغال اليدويه وايد و كل يوم مسويه شي و هالمره مسويه شي لخليفه مسوتله قلب احمر و محطي عليه حرفه كان صدق فنااان وايد حلو وايد عيبه خليفه
خليفه : مشكوووووووورة فديتج و تسلم ايدج يارب و حبها عخشمها
نوف و هي مستحيه : خلاااص خليفه استحي
خليفه : فديييييت الى يستحون انزين فديتج انا ساير حجرتيه الحينه اوكيه
نوف : اوكي ما يرذر بباي
خليفه : نسينااااا شي .. سارت ولوت عليه و حبته
نوف : تصبح على خير خويه
خليفه : وانتي من اهل الخير مع السلامه

سار خليفه يرقد و نوف خلصت شغلها و رقدت و تمت الريم ويا غايه لانها بايته عندها لي الفير صلن و سارن يرقدن

نسير لعايلة دندونه الى طروها الثلاثي المرح هم ثلاث دانه و عمرها 19 سنة و اخوها العود خليفه و عمره 27 سنة معرس و عنده عبااادي و عمره ثلاث سنوات و ريماني و عمرها 10 شهور و عقب 19 سنه امهم يابت ولد عقب دانه و السبب بعد انها وايد تتعب بالحمال عسب جيه فرق وايد بينهم

دانه : امااااااااايه امااااااااااايه
ام خليفه : لبيه يا بنتي امري
دانه : ما يامر عليج عدو فديتج يستوي غايه و الريم اييون عنديه لان يايه من العين البارحة و ما شايفتها من زمان
ام خيفه : ماعليه يا بنتيه و ما يحتاي سوال حياهم الله البيت بيتهم
دانه : يعلني ما خلا من هالويه تسلمين فديتج ..
ام خليفه : دندونه شارتلج جلابيه خضره و ابوج ماخذلج مرتعشه .. دانه فخاطرها بمرتعشه هي شايفتنها بس متاكده ان ذوق ابوها حلوه و تحيد مرة ظهرت وياه و خبرته عنها و شافها يعني اكيد يابلها الى تباها
دانه : انزين امايه مشكورين و ما تقصرون
ام خليفه : خلاص فديتج باجر الصبح ان شاء الله يربيها و تعالي عندي اشوفها ..
دانه : حاظر امايه ..

سارت دانه قسمها حلوو وايد لونه احمر و ابيض و ابوها مدلعنها وايد و ما يردلها طلب و كل يوم ماخذه للقسم شي و ذوقها ماشاءالله وايد حلو .. اتصلت فالريم على اساس انها تخبرهن هي و غايه اييون عندها طبعا وافقن لان دانه ربيعتهن و امهاتهن يعرفن بعض قعدن يسولف ويا بعض لي الساعه ثلاث بليل
دانه : يالله فديتج بسكر عنج خلص الجارج مال اليوم
الريم : هههههههه خلاص اوكيه فديتج
دانه : انشوفج على خير مع السلامه
الريم : ان شاء الله فداعة الله

الــجمعه
بيت ام سعيد
قبل صلاة اليمعه

طبعا سعيد ماحب يفارق امه و ماشاءالله البيت عود و عنده قسم له و لعياله لان بعدنهم يهال و ما يحتاي لهم بيت خاص و شما يوم الله يسير ان شاء الله بنبني بيت على ذوقنا و انصممه شرات ما نبا و طبعا سعيد وايد يحب مرته لانهم عرسوا عن حب و ما يحب يردلها طلب و يدري ان الحرمه تحب يكون عندها بيت بروحها تاثثه مثل ما تبا و حجره لعيالها و من هالسوالف .. قاعده شما ادخن ريلها و عاد اونه خالد عدالهم يريد يدخن عقب ابوه ..
سعيد : خلوودي شو تتريا
خالد : اترياك تخلث عثان ماما تثوي لي دخون
شما : فديييييتك يا ولدي
سعيد : احم احم وانا
سما : ههههه حتى من ولده فديتك انت و ولدك
دخنته شووي و ساروا الصاله سلم على امه سعيد و اترييا اخوانه و ساروا يصلون رباعه

و عقب يوم ردوا البيت طبعا الريم الحشره مسوتلهم سالفه عسب الدريول مشغول و ما يروم يوصلها و تبا تسير عند دانه عازمتهم عالغدى .. وصلوا الريال و على طول الريم خبرت خليفه وصلني عند دانه عازمتني فز قلبه و بدون تردد وافق و هالشي الى خلاهم يتسغربون لان دوم يوم تبا شي صح ما يردها بس لازم يقردن بالبدايه المهم قبل عن يتغدون سار و وصل غايه و الريم عند دانه .. و هم سايرين كان مشغل اغنيه

لجل عينك انا كلي لجل عينك وانا لبيه اذا انت تناديني
اجيك بشوقي قلبي واظمر سنينك انسيك الشقا وانت تنسيني
مشاعر تنسجم ما بيني وبينك يمرلها خفوقي في شرايينك
تزين دنيتي يا زين من زينك وهبك الله الحسن يا كامل الزيني
ظهرت الورد يا وردة بساتيني ولامسة القمر يا بهجة سنيني
نجوم الليل تسأل يا قمر وينك وتاخذ من ضيا وجهك عناويني
يا حظك وانت يا مكثر محبينك حبيب الروح بحساسك تناديني
يحسدوني وانا المجبور فعينك وعينك تستمد الحب من عينك

الريم : مشكووور خويه عالتوصيله و جم تبا
جان خليفه يظربها عايدها : هيه دريولج انا يالدبه يالله فارجي
غايه : فدييتها دندونه قاعده بره تسقى وردها
خليفه من سمع طاريها تم صااااخ .. ( واي فديت هالطاري انا فدييييت هالويه ) طبعا البنيه اول ما شافت الريال يطالعها تشغشت على طول و دشن داخل و جاان يزيد الصوت و دندونه تبتسم بس المهم ان محد لاحظ عليها دانه كانت لابسه الجلابيه الى امها معطتنيها اياها كاااان شكلها ينااان دندونه عيونها سود و وساع و شعرها طويل و كل من شافها شهد على جمالها و دوم الحريم يقولن ام خليفه خاشنه بنتها عن العرب و رقيقه لابعد حد و تحب الكل و الكل يحبها ..

دانه : اشحااااااااااالكن بنااااات صدق تولهت عليكن
غايه و الريم : و نحن بعد فديتج ما تدرين شقايل متولهين عليج
وصلن البيت و سلمن على ميثه ام خليفه و رحبت ابهن و قعدت وياهن شوي و خلتهن رواحهن طبعا على دوم اتجهن لقسم دندونه و كان مرتبنيه و مغيرته و طبعا وايد عيبهن البنات لانهم يحبن هالشغلات
الريم : وااااااي انتيه كل شي حلووه عندج ماشاءالله
دانه : فدييييييييتني والله
غايه : حراام عليييج لا تقهرينا
دانه : ههههههههههه وايد متاثرات بالمسلسل ثركن
الريم : سكتي امره كوبي بيست ههههه
دانه : حليلكم .. يالله حيالله من لفاااانااااا
الريم : دانووه وين الاب توب مالج اريد اشوف ايميلي النت عندنا مقطوع
دانه : هنيه تلقينه بالرف الثاني شيليه و وصلته بالتيلفون
الريم : اوكيييه فديتج تسلمين
غايه : دانه علومج و علوم الدراسة وياج
دانه : والله ماشي حالها الحمدالله امتحاناتنا ما باجي عليها شي
غايه : الله يوفقج فديتج
دانه : وياااااااج يارب انتي شو مسويه
غايه : ماشي الحال والله .. شفتي ديووور شو منزلين شنطه فناااانه ذيج البيضه الى اطرافها احمر يناااان
دانه : هههههههه قولي والله هااااااي الى خذتها
غايه : دندونه عمري اموت فيج حياتي
دانه : يااااااالوووتيه انتي هههههههه انزين بعطيج سلف هب لج بس خليني انا اكشخ بيها اول
غايه : انزين ماعليه اهم شي تيني .. ريمووووو عنبوو يايه عند البنيه و قاعده عالنت شووو هالمنكر و هي تقلد ام سعيد
الريم : لا تقلدين امااااايه ترى حقوق الطبع محفوظه يمنع النسخ
دانه : ههههههههههههههه انتي يالريم شي خياالي جيه نازله من كوكب
الريم : هيه هيه فدييييتني عسب اكون مميزه
غاااايه : مااااااالت ثره التميز استوى جيه ..

قعدن ويا بعض سوالف و ظحك و كل وحده ترمس الثانيه عن السوالف الى فاتتها و عقب تغدن و تمن ويا بعض لي عقب المغرب عقب سعيد كان مار ذاج الصوب و شلهن .. سارت دانه و فتحت الكتب و قعدت اذاكر لي ساعه 12 و عقبها انخمدت عسب ثاني يوم تكون نشيطه .. و قوم العين سارن دارهم عسب الدوامات و جيه ..

الســبت
الـصبح
بيت ابو خليفه

دانه تربع عالدري و نازلة سريعه و جان تعفد و باجي اربع دريات و يخطف خليفه اخوها .. حست باحراج يوم شاف اخوها خبالها
خليفه : صبحج الله بالخير يالخبله
دانه : مااااالت طاع شو يقول من بدل ما يقول كلمة حلوه عالصبح ويا راسك
خليفه : هب غصب اقول كلمة حلوه
دانه : وينها وينها ام عبدالله
ام عبدالله مرت خليفه : انا هنيه فديتج بس اشوف هالمزعجه ريماني مسويه حشره من الصبح .. سارت دانه و شلتها
دانه : واااااااايه فديييييت هالووويه هيه هالوايه الى تحب تشوفها
خليفه : شو قصدج
دانه : قصدي واضح و مافيه خربشات
ام خليفه : بسكن بسكن قردنا من الصبح خليفه خل اختك بحالها شو لك فيها
سارن اصطبحن على امهن و حبوها عراسها و قاعدو يتريقون ويا بعض اترييوا بو خليفه ليي ما ياهم و خلصووا سارت دانه الدوام و خليفه ويا ابوه ساار الشركه و و قعدت مهره مرت خليفه عند عموتها شوي و سارت ترقد و على الساعه 11 نشن هي و عيالها و ارتبش البيت

بـيت ابو فهد

ام فهد : نش عووووذ بالله هب رقاد
فهد : انزين امايه بنش بنش انتي سيري وانا بنش روحي جيه ريال طول عرض امه تقومه
ام فهد : لااا والله و جيه بروحك تقول انت يالله انقز
نش فهد بكسل و دش الحمام الله يعزكم و غسل و نزل تحت و لاقى خوانه و سلم على ابوه و قعد
ميره : فهووود يالدقس بلا حشره من الصبح خوز
علي : ايييييه انت خور عن اختيه
فهد : حاظر حاظر حضرت العم الدبلومسي
علي : احم احم
فهد : والله دنيااااااا صغارية و يرمسون بعد هيييييه وين ايااااااااام اول يوم الولد حشيم و مايرمس الا بامر ابوه
احمد : علاوي حاسب تراه بادي يغلط شوي
علي : هههههه هيه ادري الى يقول بنيه حشيم و ما رمس الا بامر بويه اقول جب و اكرمنا بسكاتك يالاخو
ابو فهد ساكت و يسمعهم و مرة متغصص منهم انفير ماتحمل يسكت زود
ابو فهد : بسكم قردنه من صباح الله خير مالت عليكم من اولاد
فهد : فدييييتك والله يابوي مالنا غيرك الله ثم انت لا تزعل علينا ترانا الا انسولف شو رايكم فيه
ابو فهد : يعني قاعد تقول هالرمسه عسب الراي نش من علي مسود الويه
ام فهد : ههههههههه فديتك يا ابو فهد
ابو فهد : فديييييييت هالضحكه
غايه : شيووووبه و يتفدووون
ابو فهد : عن الرمسه الباطله خليج ساكته اخير
خلصن ريوقهن و فهد و احمد ساروا ويا ابوهم الشركه و علي سار على شغله
فهد غرشوب شامسي ماشاءالله عليه اسمراني و طويل و طوله عذاب الخقه عرج من عروجه و امه تحاول وياه عسب يعرس لانه ولدها البجر و تريد تفرح به و هو رافض فكرة العرس يبا خوانه يعرسون عقب هو او انه كلهم ويا بعض محد قبل حد .. احمد ابيضاني و حلاته فعيوونه السوود و الوساع .. علي غير عنهم كلهم احلاهم عيونه وساع و شعره نااااعم و دومه مب متسفر ميره اختهم جمالها ناعم و رقيق لكنها مزعجه شووي غايه ناعمه و رقيقه و مغطيه على اختها فالجمال و كل من شافها شهد على جمالها امهن مربيتهن احسن التربيه و كل وقتها كان لهم و لريلها ..

يبت ابو سعيد المرحوم

هادف : مرحبا امايه
ام سعيد : هلا و غلا بولديه اشحالك يالغالي ربك الا بخير فديتك
هادف : بخير و سهاله اميه
هادف يحب امه حب ماتصوره حد و هي اجرب وحده له من عقب ابوه و طبعا الكل متاثر على وفاة ابوهم لكن هادف اكثر واحد توفي ابوه و هو عمره 10 سنوات و امه مقدره هالشي و قد ما تروم تحاول انها تغطي هالفراغ و هالحنان الى افتقده هادف ..
ام سعيد : شو بلاك يا ولدي هب شرات خوانك لو ما بتنسى اتناسى عمر استواله يالغالي
هادف : امايه ماروم ماروم احاول بس هب رايم يمكن لو اعرس بنسى هالشي و بنشغل ويا مرتيه و تدرين بحبي لميره وانا ياي اقولج اني اريد اتقدم لها و بخبر عمي بوفهد جان تصيح ام سعيد على حال ولدها و بعد استانست لانه يريد يعرس و الى خلاها تستانس اكثر انه يبا يعرس بارادته هب ان امه غاصبتنه لوى على امه
ام سعيد : خلاص فديتك فالك طيب ان شاء الله و شرات ما قلت رمس عمك و كلنا بنفرح لك ان شاء الله
هادف : ان شاء الله .. هادف انسان هادي لابعد حد ما يخصه بحد عايش حياته وحيد ما عنده غير امه يرمسها و يخبرها كل الى بخاطره و عنده ربع بس هب وايد وياهم
سار هادف و دق الباب عقسم سعيد عسب يرمسه بالموضوع و يرمس عمه
سعيد : حياااااااالله هادف اقرب اقرب ياخوي
هادف : الله يحيك خويه ما تقصر
سعيد : علومك ربك بخير
هادف : الحمدالله بخير و سهاله يسرك حالي
سعيد : عساه دووم يارب
هادف : بغيت اخبرك عن شي خويه و لو تسمح ترمس عمي
سعيد باستغراب : تفضل شو فخاطرك
هادف : اريد اعرس و اخذ بنت عمي ميره
سعيد : الله يبشرك بالخير و اخيييرا
هادف : ادري لازم الى اكبر عني يعرس قبل بس والله يا سعيد اريد اغير هالحياه و تدري لي عرست بنشغل ويا مرتيه و عيالي و يمكن بنسى شوي
سعيد : هب شرط الى اكبر عنك تدري بخليفه مادرى منو يتريا و بعدين الزواج نصيت و انت ياخوي اخيرلك تعرس عالاقل اتونس امايه
هادف : خلاص يالغالي انت وقت ما فضيت رمس عمي و رد لي جواب
سعيد : تم
اول ما ظهر هادف من عنده على طول سعيد خبر اخوه خليفه بالسالفة و ااستانس عليه وايد و عقب قرر سعيد يتصل بعمه لانه صدق كان حال هادف لا يسر صديج ولا عدو اتصل سعيد على موبايل عمه ما رد عليه درى انه بالبيت اتصل بالبيت
غايه : السلام عليكم
سعيد : عليج السلام غايه اشحالج يالغاليه ربج الا بخير
غايه : حيالله سعيد انا الحمدالله زينه انت علومك
سعيد : الحمدالله انا بخير و سهاله الا بغيت اتخبرج ابوج عدالج
غايه : هيه عدالي دقيقه بس
ابو فهد : مرحبا بولد اخويه حيالله سعيد
سعيد : الله يحيك عمي اشحالك و شو صحتك
ابو فهد : بخيرالحمدالله زينه يالغالي انت علومك و اشحال الاهل
سعيد : الحمدالله كلهم بخير و سهاله يسلمون عليك
ابو فهد : الله يسلمك وياهم من الشر
سعيد : يا عمي بغيت ارمسك عن موضوع لكن مب عارف شقايل ابدى
ابو فهد : قول سعيد امر تراك شرات ولدي و زود يالغالي شو فخاطركم
سعيد : يا عمي انت تدري بهادف و حالته الى ما تسر لا صديج ولا عدو و نحن قد ما نروم نحاول انظهره من هالحزن الى هو فيه لكن انت تدري به مب طايع و اليوم مرمس امايه و قايل يريد يعرس عالاقل بنشغل ويا مرته و عياله يمكن مب ينسى بس يتناسى الامر
ابو فهد : الله يبشرك بالخير يا ولدي و كلامك عدل و منوو يبا ولا مخلنها اختيار لامه
سعيد : لا عمي هو الى مختار
ابو فهد : منو
سعيد : بنتك ميره يا عمي
ابو فهد : هاااي الساااعه المباركه يا ولدي و نعم الساع والله
سعيد : الله يخليك عمي
ابو فهد : حيااااكم الله بـأي يا ولدي و ما بنحصل احسن عن هادف
سعيد : مشكور عمي و اخليك الحينه و انشوفك على خير
ابو فهد : لا تشكرني تراني حسبت ابوك ياولدي ان شاء الله الله يحفظك فداعة الله

سار سعيد لمرته و خبرها بالسالفة و صدق استانست شما لان مثل ما تدرون حالة هادف ما تسر و ان شاء الله خير و الله يتمم كل شي على خير يارب

بــوظبي
بيت بو خليفه

دانه قاعده بالبلكونه و كان الجو فنااااااان و الريح يهب عليها و هي مستانسه و قاعده تغني

هل الفرح بانوره بهل الوفا و الزين
والسعد هل بشارة فبوظبي و العين

دانه : اااااه يا قلبي شكثر يعاني معقوله يعني هو يترياني اخلص دراستي انزين شو فيها لو عرست وانا ادرس تراني احبه و برتب وقتي عسب اروم اعطيه حقه و اعطي دراستي حقها بس لو يبنا عيال شو بسوي بعد عادي وايد بنات يدرسن و هن حوامل لالا صح شو معيلنه عالعيال و الربشه خليني اعيش حياتي وياه بالاول فديته اااااه لو يدري بحبي له اااااه ..

من زود الحب هالبنيه يينت و قامت ترمس روحها حب دانه و خليفه من صغرهم كبروا و كبر وياهم انبني بالثقه و الموده قلوبهم حبت بعض دون سابق انذار صح انهم يران و هب من عايله وحده بس وايد ويا بعض و من ايام الطفوله هم ويا بعض تحيد اول يوم كانو يلعبون ويا بعض كانت طفولتهم حلوووه وايد و الكل درى بحبهم من يوم هم صغار و للحين هالحب يزيد و يكبر ..

خليفه من الصوب الثاني قاعد بحجرته و تعبااان و مزجم من تغير الجو و كل ما قعد تخيلها وياه كل ما نش تخيلها وياه بكل خطوه يخطيها يتخيلها وياه مب بس حبيبة قلبه كانت ظله و دوم اييب لامه طاريها و يسال خواته عنها ..

خليفه : لو تقدمت لها الحينه بيوافقون عمي وايد يحبنا و ماعتقد بيغلي علي بنته صح هي دلوعته و يحبها وايد بس بعد لازم بتعرس و بتسير بيت ريلها هادف بعدنه يدرس و بيعرس الحينه انا استويت شيبه و مب معرس لالا لازم يتغير هالشي بس اااااااااه لو اشووفها و اعرف الى بخاطرها هل هي تحبني للحين او لا و عض عشفايفه بقهر ..

انتهى الـجزء ..
للعلم فدائما يكون الجزء الاول قصير لتعريف بالشخصيات فقط ..
في انتظار ردوكم و ارائكم ..