الجزء الثاني ..
*****************
انقضت هذيج الليلة بسرعة .. مثل معظم ليالي طفولتي ... ما احس فيها .. الا اذا هاجمني فيها واحد من كوابيسي الغريبة!!
لليوم اذكر صدمتي وانا القى العابنا "الطينية" مكسرة ... وزعل شويخ مني وهي تظن اني انا اللي كسرتها... ههههههههههههه ,, والذكرى الاقوى ... يوم انه خلود "اخوي الاصغر مني بسنة" اعترف انه هو كسره ..." لاني ما خبرته ولا زقرته يوم رحت العب بالطين" .... اذكر اني انتقمت منه انتقاااام بشـــــع .. عظيت اذنه من خااااااطري وهو يصرخ وينادي امي!!... للحين اذكر منظر الدم ....... ما يستاهل؟!..... محد قاله يتعدى على العاب شوق!! .... حليله استعوفت فيه هذاك اليوم .... وهو يوم يذكر السالفة يضحك ويقول " مجرمة البيت انتي!! " .. بس انا ما كنت اخرب وايد في البيت مثله ومثل اخواني الاصغر منه بسنة ... خلوف و سلطون .. هذيلا مرة قلبت عليهم البيت ادورهم .. وهم في المخزن .. يوم سمعت حركة في المخزن دخلت .. وجااااان انصدم بالمنظر اللي جدامي ..
تخيلوا شو كانوا يسوون؟!
كانوا يايبين الجدر الكبييييييييييرة .. اللي نطيخ فيها لما يكون عند حد من معارفنا عزا . او عندنا عزيمة ظيوف .. او شي جي ... يايبن الجدر هاي .... و حاطين فيها عيش يساوي نصف الكمية الموجودة في اليونية ... وحاطين فوقه كمية مثله من السكر ... + ما لا يقل عن 30 قوطي صابون تايد !!!!! .... لا وقاعدين يخلطون بايديهم وريولهم !!!!!
يودت راسي وانا اقولهم : شو سويييييييتوا؟!
خلوف "اكبر من سلطان" : يالسين نعدله ..
ا ن ا : شو تعدلون منه !!!!
سلطون : عشان امايه يوم تطبخ .. يطلع طعم العيش حلو .. لان وياه سكر ..
ا ن ا : والصابون ؟!؟!؟!؟!
خلوف : عشان يكون نظيف يوم تغسله ....
سلطون : هيه .. جفنا في الاعلان جي... وايد ينظف ها الصابون ...
ا ن ا " وانا اصك على اسناني" : ينظف الثياب ... مش الاكل !!! .. هيييييييييييين اما خبرتها عليكم الحين !! ... وسيدة ياية بطلع .. توصلني اصواتهم ...لا شوااااااق!! .. انزين شو سوينا!!
ا ن ا : وتسال؟!..... تستهبل خلوف؟!
كملت طريجي ... وانا اسمع اصوات خطواتهم المذعورة عالارض ... بس وين بيشردون .. اللي سووه مب هين .. شو يبونا ناكل صابون ؟!
صدق استهبال ....
هالاثنين مرات يكونون مثل توم وجيري ... ومرات عادي تحصل واحد منهم راقد وهو ميود ايد الثاني ... يا عيني عالاخوة ..
مرة رحنا العزبة العصر .. انا وخلوف.. انا دوم احب اسير العزبة ويا ابوي .. طفنا الدكان .. خذت لي جبس وعصير ... وخلوف خذا كيك وعصير .. حطيت اغراضي في سدة السيارة .. على اساس يوم نخلص شغل باكله ... وصلنا العزبة .. ورحت الدرس الينوبي ... هناك كله يحطون الكباشة "الصغار" .. يعني هم مش كبار كفاية .. احب اروح واطالعهم ... ييعبوني يوم يوقفون على الشبج ... احب امسح على روسهم .. بعدين استأنفت الجولة للدرس الشرجي ... هناك نحط كل الصخلان الصغاااااااااااااااااار والحملان بعد .. هم وامهاتهم .. بس شو وناسة!!!... الصخلان وايد دلوعين .. ما احبهم .. اول ما تيود واحد منهم قام يزغ بشكل هستيري ... الحملان ما في احسن منهم ... لو تعودوا على انهم يكونون ويا الاوادم ... بتلعب وياهم ويسوون وياك مواقف لييييين ينبط بطنك من الضحك ... شوي ويدخل خلوف .. وهو يايب اكله وياه .. فاج عصيره " كان على شكل كوب " .. وميود الكيكة ياكلها ... هههههههههههه اللي غفل عنه انه شي عنز بطرانة .. تحب تجرب كل شي غريب وتذوقه ... تقربت من خلوف " اللي مب وايد ويا العزبة والهوش" .. تم هو يريوس وهو زايغ ... وهي تمشي صوبه .. تبا تذووووق ... ما حس خلوف الا وظهره لاصق في الشبج .. وما بايده حيلة .. زايغ من العنز ... شغل الوناااااان وتم يصيح ... والعنز ولا همها .. فجت ثمها عالاخر وعضت نص الكيكة وقعدت تاكلها ... شكله عيبها الطعم .. وقربت ثمها من العصير .....دخلت لسانها وقعدت تشرب منه وانا مب قادرة اتحرك من مكاني ..... ميتة ضحك عالمنظر !!!!... شو من عنز هاي!!,,, كيك وعصير شو هالتطور ... يوم تفيجت رحت ورغتها عن خلوف .. اللي جز نفسه وايده ... دلووع هالولد .. جان يفر عليها الكيك وفر العصير برا .. وطلع وهو مغيييييظ .. والحبيبة وراه تتحسب عنده زيادة ..
طبعا انا سييييييييدة رحت لابوي .. عسب اخبره عن هالسالفة .. لقيته ميود الحليب ويصبه في مرضعة كبيرة ... وانا موووووتي هالمهمة ... احب اعطي الحملان حليب " اللي امهاتهم عافنهم" ... بدا ابوي وعطا واحد منهم ... والثاني يوعان يبا .. وابوي مطنشنه .... تعرفون شو سوى؟!
راح و وقف ورا ابوي .. ومشى رييييييوس لمسافة معينة .. وفجاة شغل العدااااااد عالسرعة القصوى وياي طاااااااااااااير وركض على ظهر ابوي ونقز من عليه ... .. تخيلوا!!!.,.. واذا تبون الصورة توضح .. تخيلوا سيارة تمشي فوق جسر ... ها الجسر اللي تمشي تحته السفن .. ويوم تمشي تحته السفينه .. ينفج من النص .. تخيلوا كيف السيارة تنقز من طرف الجسر للطرف الثاني .... نفس الحركة سواها هالحمل ... وابوي يزقر عليها: الله يغربك!! ...
تعرفون؟!... مرات احس ابوي يعامل الهوش بخشونة .. عادي لو غيض عليهن يفصخ نعاله ويجوتهن!!!... مرة زعلت منه .. وابوي الوحيد اللي يوم ازعل منه .. اواجعه وانا اصيح!!.. بس هو يفهمني .. وما يهون عليه ازعل .. والا اصيح .. ما يخلي دقيقة تمر الا وهو عندي يخفف عني .. ويراضيني .....................
مرت هالايام .. كبرنا .. كبرت معانا احلامنا .. وآمالنا ... وللاسف .. همومنا بعد تكبر معانا .. كنا نحزن علشان لعبة .. او حد صارخ علينا .. لكن اليوم ... فهمنا الدنيا اكثر .. وعرفناها اكثر .. صح مش بشكل كافي .. لكن يبقى اللي نعرفه مؤلم احيانا... واحيانا قاسي ,,,
اكثر شي يعذبك .. لما تلقى انه اهلك .. مش اهلك .. اهل بالدم والصلة نعم .. لكن ما يشاركونك همومك .. ما يحسون بالمك ... بالعكس ... هم اللي يزيدونك الم .. هم اللي يكون اول من يطعنك .. في وقت انت تمد ايدك لهم ... تحتاج ينتشلونك قبل ما تهوي لاعماق الالم .. وتتفاجا ..انه هم اللي يرمونك .... أي الم اكثر من هذا!!!
في هذاك اليوم ... ما كنت ادري باللي يصير حواليه .. كل همي كطفلة اروح العب ويا شويخ .. كنا نلعب .. يت عموه ودخلت .. وعادي سوالف ويا ماما .. بس فجاة بدت الاصوات تعلى .. والنفوس تغضب .. والقلوب تحقد .. شو اللي صار ؟!.. شو الموضوع؟!... ابدا مش فاهمين ... شويخ بدت تصيح .. التفت لها وانا اقول لها : بلاااااج شواخ؟!.. تقول : ما تسمعينهم؟! وردت تصيح .. طلعت عموه وسحبت شواخ من ايدها .. وشواخ تحلف انها ما سوت شي ولا ظاربت حد ...
التفتت لي بعيون كلها دموع ..ودموع مشبعة بالالم .. عيون كانت هذي اخر نظرة تجمعني فيها .. وما عدت اشوفها بعدين ...
صرت انطوائية .. انا وشويخ كنا روح وحدة .. روح ومزروعة في جسمين .. احلامنا وحدة .. همومنا وحدة .. ضحكنا واحد .. وبكانا واحد .. بس وينها الحين؟!
شويخ خلاص راحت .. وخلتني بروحي .. لا تشوفني ولا اشوفها .. ولا حتى من بعيد ... تصدقون ؟!... مرة شفتها في حديقة البيت .. لمحتها من بعيد ... بس ما نطقت بحرف!!!,,, حتى عيونها تحاشتني ... تهرب مني .. وانا اللي كنت انتظر بس اطمن عليها .. شويخ مش بنت عمتي بس .. شويخ جزء مني .. خواتي اللي هن خواتي ما وصلن لهالمنزلة .. بس معقولة هذا كله راح؟! .... لحظتها طالعت للسما ... وقلت بصوت حسيته من قلبي. ... هالامر متروك لك يا زمن .. متروك لك ..
تعودت على هالحركة .. صرت كل ما احزن .. اطالع للسما .. يمكن صارت صديقتي .. ويمكن لان اقدر اقول لها أي شي .. ويبقى سر بيني وبينها ... تصدقون ارتاح!!!
************
اسمحولي عالتاخير ... وان شاءالله يكون هذا الجزء اوكي .. ....
03 Mar 2005, 03:40 PM
انا ... وزماني
