وعليكم السلام ورحمة الله وبركاته

مرحبا بج الغلا


قد أكون عايشة نفس المشكلة ولكن كل انسان وله ظروفه الخاصة الي بها يقدر يتحكم بالموضوع

المهم

الشروط الموجودة طبيعي معظم الرياييل يقولون هالكلام ما نباها تدرس ولا شغل ولا سواقة

وحد منهم يضع شرط واحد من هذه الشروط وكل انسان وتفكير طبعا

الحين الريال زين وما عليه كلام حسب ما فهمت من الموضوع والعلة في أهله بانها ما ترتاح لهم

ولانها بتعيش وياهم في بيت واحد ..

وني قول لها مب شرط انه يكون شرات اهله او انج ما تكونين سعيده وياهم .. يمكن عقب ما تختلطين بهم ترتاحين وياهم ..

في ناس كثرة ما نرتاح لهم وعقب ما نقعد معاهم ونتخالط بهم تتغير فكرتنا .. يا غير انج تقدرين باسلوبج الطيب ومعاملتج الطيبة انج تكسبين حبهم ..

طبعا الامر ما بيي في يوم وليلة يباله شوي وقت ويحتاج منج صبر..

بالنسبة لرد الوالدة ياما سمعناه مب هي بس

الحين الوالدة مب قصدها انج رخيصة ولكن ما تبا تخسر ناس هي عرفتهم او انهم من اهلكم ..

هي تشوف الولد ما عليه كلام ومن هالناحية ما تبا تخسره كزوج لبنتها ..

اذا هو زين وما عليه كلام شعليج من هله ومثل ما قلت لج قبل انتي تقدرين تتقربين منهم والكلمة الطيبة والاسلوب الطيب ما في احسن منهن حتى لو هو شو ما كان طبعهم مستحيل يقابلون معاملتج الطيبة باسلوب سيئ ..

بالنسبة للدارسة انتي عمرج 23 يعني تقريبا في النهاية اذا ما خاب ظني اقصد ما باقي لج شي وتخلصين وما ااعتقد انه بيمانع تكملينها اذا رمستيه في الموضوع وتناقشتوا بهدوء ..

اما عن الدوام والسيارة بصراحة ما فيها شي اذا ما داومتي ولا سقتي سيارة دام انه ما يبا يعني اكيد هو بيلبي كل احتياجاتج وما بيقصر معاج ..

ختيه الغالية

بالنسبة لصلاة الاستخارة اقولج ردي عيديها واستخيري لاني احس كل خوفج منحصر في اهله وكلمة الوالدة محسستنج بالقهر

شلي الخوف من قلبج وقدري موقف الوالدة وليش ردت عليج بهالرد وتاكدي انج مب رخيصة عندها

وصلي استخارة وشوفي شو تحسين .. واذا نفس الشي مب مرتاحة رمسي الوالدة مرة ومرتين والف والا رمسي حد عود يعني يدج او عمج حد ممكن يفهمج ونفس الوقت يقدر يقنعهم دام انكم بعدكم ما ملجتم يعني الامر بعده بايديكم ..

وعسى ربي اييسر امرج ويوفقج ان شاءالله

والسموحة جان طولت عليكم

 

وعليكم السلام ورحمة الله وبركاته

أختي عسى أن تكرهوا شيئا وهو خير لكم
حاولي قد ماتقدرين أنج تقنعين أهلج وإذا صاار
وأصروا على رايهم عرفي انه هذا خير لج
بالنسبة لصلاة الإستخاره يمكن أنتي نفسياا
من رفضج له من الأول حاسه بهالأحساس
حاولي تنظرين للموضوع بأنه عاادي
ومابيصير إلا إلي يكتبه لج ربج
ارتاحي وصلي استخاره من دون ضغوط ولاتفكير زايد
وبالنسبة له ولأهله أنتي تقدرين تغيرين هالشي بس يباله صبر منج
هوه ممكن تقنعينه وتغيرين رايه يوم تعرفين سبب رفضه لهالأشيااء
وأهله تكسبينهم ولو بمجامله المهم تغيرين أسلوبهم ويااج
وكلي امرج لله وخلج على يقين أنه كل ألي يصير خير بأذن الله
ودايما كوني واثقه من نفسج وواثقه أنه الله بيسهلج أمورج..
شكراا لج أختي
وشكراا لج شوق..

 

وعليكم السلام ورحمة الله وبركـــــــــاته ...

وربي يعطيك ِ ألف ألف عافيــــــــــة غاليتي شوق البحر على جهودك الطيبة ...

إلى صاحبة المشكلة ...

أختي العزيزة ...

الزواج سنة الحياة ... وكلنا نعرف أن أهلنا مستحيل يرخصون فينا ..

وهم يتمنون لنا الأفضل ...

ومادام الوالد والوالدة وأهلك كلهم موافقين .. وسمعته طيبة وحسنة فليش الرفض !!! ...

غاليتي ... أنا حاسة إنك زعلانة بسبب كلام الوالدة الله يطول بعمرها إنها ماراح تزعل هالناس ..!

صدقيني يالغلا ...

مستحيل أمك ترخص فيك لأي أحد لو مهما يكون ...

وأنا عندي إحساس إن كلام أمك مو من قلبها ...

بس هي تبي تفرح فيكي ... وتتمنى لك أفضل الناس ...

ولولا إنها متأكدة مية بالمية إنهم ناس حشام و يشرفون .. .. ماكان قربت فيهم و وافقت عليهم ...

وصدقيني فديتك ....

مافي أحد بهالدنيا يحبك ويحب مصلحتك وسعادتك مثل الأهل والعائلة ...

أنا من رأيي تصلين الاستخارة بنفس مرتاحة ...

وكمان تتشاورين مع الوالدة والقريبات وتأخذين برأيهم ...

وصدقيني ...

ابتسامة طفل .. ورضا زوجك .. تسوى الدنيا ومافيها ...

ومافي شئ يعوض عنها لا دراسة ولا سياقة السيارة ...>>> وجهة نظر ...

أتمنى إن شاء الله إننا نفرح فيكي من قريب ...

والله الله فينا ... لازم تعزمينا عالعرس ... ونبي طباخ إماراتي شعبي ...خخخخخخخخخ ...>>> فاضية الأخت ...

هونيها وتهمون يالغالية ... وكل واحد ياخذ نصيبه في هالدنيا ...

ربي يسعدك ويوفقك لكل خير وسعادة ...

أتمنى من كل قلبي أعرف آخر أخبارك ...

والسموحة عالإطالة ...

ربي يحفظكم ...

 

بصراحه مرّت اختي بنفس الشعور

وملجت منه ، وكانت ما اطّيجه موووول

بس كانت تخبّي هالشعور من أهلها

لأنها شافت اشكثر هم فرحانين وما بغت تحرمهم هالفرحه

كانت اتيي عندي واتصيح تقول أحس اني ما أطيجه

بس كنت أهدّيـها وأقولها تأكدي هذا نصيبج

ولو كان مب نصيبج كان بيصير شي وبيكنسل كل السالفه

تمّت متغصصه حتى عرّست به

حتى أذكر يوم العرس يتني ودمعتها في عينها

يبت بطرف المنديل ومسحته وأقولها لا تخربين الميك أب هذا عرسج ولازم تفرحين

-------------- مرت الأيام والشهور ---------------

ردّت من شهر العسل وهي مستانسه

اتحريت كالعاده اتبيّن لأهلها انها مستانسه ومو في خاطرها شي

بس الظاهر انها صدق مستانسه يوم قلت

هييييييه الحين عسى صدق مستانسه ؟!

قالت هيه

قلتلها وريلج

قالت أحبّه

>_<

صدق بنات هههههههههههههههه

يعني قبل عيشتينا في خوف وتفكير

والحين يا مسهل هالكلمة ع لسانها ، واتحبه بعد واتغار عليه

^.^

والحين عندها بنوته حلوه قبل يومين يابتها

والله يديم عليها هالسعاده ياربّـي

لأنها تستاهل كل الخير

والسموحه

 

شوووووق البحر اختي الغالية

احيي فيج النفس المؤمنة الساعية للخيروالمحبة للاخرين
اشجعج على روحج النقية بمساعدة المحتاج

يا الله ..حرام جي يسوون في البنت
صح الله سبحانة مقسم الارزاق وهو ارحم الراحمين
بس حرام جي يسون فيها

اختي

حاولي توسطين وحده من خالاتج او اي وحده لها تأثير على امج

هذة الحياة حجارة اذا بقيتى تتخطين الحجارة شليها ابلطف

حاولى تقنعين امج بالكلام او بالفعل ولا تنسين التوكل بالله

حاولى بأشد الطرق

لا اله الا الله

حاولي تقنعين امج بالطيب وعليج بالدعاء والاستغفار وجربي تقراين سوره البقره
ادعي ربج.. تحري الاوقات مثل اخرالليل او بين الاذان والاقامة
ولا تنسين نصيبج بتاخذينه.. ماعليج الا بذل الأسباب ولجوئج لربج
وحاولي بتصرفاتج وطريقت وفهمج لامج تنكسرين وتنذلين لها
عشان ترحمج وتعطف عليج ( الام قلبها رحوم على بنتها )
والله يكتبلج الي فيه الخير

ولاتنسين كلام ربنا اختي
من ترك شيئا لله عوضه الله خير منه... وانت بطاعج لامج ماراح تخسرين باذن الله...

الله ييسر امورج ويجعل لج من كل هم فرج ومن كل ضيق مخرج .
ويرزقج الزوج الصالح اللى يسعدج ويعوضج خير فى الدنيا الاخره.
امين امين امين .انه سميع مجيب


عذرا على الاطالة

 

مداخله ..

رد من صاحبة المشكلة عالردود ..


:
:
:


البنت تقول لكم ان الردود تفرح وتسر الخاطر خصوصا انها مواساة وتشجيع ، لكن كيف تقدر تستخير وهي نفسيتها تعبانة بالقو ؟؟.... وكل ما استخارت تنش ثاني يوم مصدعة وتعبانة ....

وعن سالفة امها قالت .. انها مول ما تحب ترد حد .. خصوصا انه هالناس من اهلها .. من جيه وافقت وبدون اي شروط حتى ...

و كمعلومة اخرى ... هالريال اهله خاطبين له كذا بنت قبل وكلهم من العايلة ، ومحد رضى فيه مول .. فـ اللي شاغل بالها لييييييييش كلهم رفضوه ؟؟ .. وليش محد وافق عليه غير امها ؟؟؟؟


:
:


السموحة .. كان رد من البنت وتم وضعه حسب رغبتها

ولازلنا بانتظاركم

 

مرحبا شواقة

اقول لاختنا

حاولي تفكرين بكالمنا الي قلنا قبل عشان تهدى نفسيتج وترتاح شوي

واهم شي تشلين الخوف من قلبج .. الخوف هو الي متعب نفسيتج ترا

وفكري بهدوء شوي وبتقتنعين وقتها صلي استخارة على راحة

طبيعي الام تتحيز لهم لانهم اهليتها وما تبا تخسرهم واي ام مكانها بتسوي نفس الشي لكن صدقيني هذا مب معناته انج رخيصة عندها ..

وبعدين سالفة انه تقدم لاكثر من وحدة ورفضنها مب شرط يكون فيه شي يمكن كل وحدة فيهن لها وجهة نظر خاصة او انها في حد ثاني في بالها او او او ما نقدر نجزم بان الرفض لانه مب زين او انه اهله مب زينين ..

اليوم كنت ارمس ويا وحدة ربيعيتي من فترة ما شفتها واكتشفت انه عندها مشكلة وكانت حالتها صعبة والله اني احترق قلبي عليها وكانت مشكلتها نفس مشكلتج تقريبا ..

وقلت لها نفس الكلام الي سبق وقلته لج في بداية الموضوع

لي ما هدت واقتنعت وقالت انها بتفكر بهدوء وبترد تصلي استخارة

اختي الغالية

بليز شلي الخوف من قلبج ولا تفكرين ليش فلانه رفضته وليش وليش .. انتي ريحي اعصابج

وفكري وقولي هذا من اهلي واكيد بيحافظ عليه واكيد مع الايام والعشرة بتتقربين منه وبتشوفين انه خوفج الحين ما كان له اي داعي ..

جربي وما بتخسرين شي

وعسى ربي يفرج همج

 

مرحبا شوق ..

أختي الغاليه ..

انتي حليتي المشكله .. ومافي داعي انج تسوين أي شي ..

صلاة الاستخاره ..

بس ..هذا هو ..

انتي شو تقولين ف دعاء الاستخاره ..

اذا كان خير لي في ديني ومعاشي وعاقبه أمري فيسره لي ..
وان كان شرا لي في ديني ومعاشي وعلقبة أمري فاصرفني عنه و اصرفه عني ..

أنا ما حافظتنه عدل ..بس هو شي جذه

تراه اذا كان في خير لج بيتيسر .. واذا كان مافيه خير بينصرف عنج حتى لو حددوا الملجه
عادي و واايد عادي بعد انها تتكنسل نفس اليوم ..

يالغاليه صلاة الاستخاره ما تتوقف على اللي تحلمينه أو تحسين فيه ..

هذا شي من عند ربج .. انتي توكلتي على ربج ونعم الوكيل .. خلاص ثقي فربج وخلي ايمانج به قوي

 

باسم الله الرحمن الرحيم ..

انا اول مره اشارك في هالاقسم وانشالله اقدر افيدكم بشي ...

اقول لاختي ,,

ماخاب من استخار ,,

واكيد الانسان يوم بيصلي الاستخاره,, الله بيسخر له الخييير ,, اذا الله كاتب انج تتزوجين هالشخص بتتزوجينه ,, ودام انج صليت استخاره ,, حطي في بااالج انج راحت ترتاحين يوم بتاخذينه لانج استخرتي ,, واذا الله كاتب انج ماتاخذينه ترا محد يقدر يوقف جدام القدر ويغصبج على الزواج ...

(( وعسى ان تكرهوا شيئا وهو خيرا لكم وعسى ان تحبوا شيئا وهو شر لكم ))...


وانا فهمت من الموضوع انه اهلها مصرين على الزواج ..
لو عندها حد من اهلها مثل عمها او خالها ناس متفاهمين ,, تروح تكلمهم وتفهمهم وتقوللهم انهم يكلمون اهلها ويقنعونهم ..

وبعد اقوللهاا انها تدعيى ربها في الثلث الاخيير من الليل ,وتدعي من الخاااااطر , لانها ساعه استجابه ,,وتتفاءل وانشالله الله يستجييب دعائها


واقوللها حطي في بالج انه اي شي الله كاتبه تراه هو خير لج .. انتي سويتي الي عليج وقلتلي لاهلج انج ماتبينه وصليتي استخااااااره و الي عليج الحيين انج تدعيييييييييييين وتكثرييييييين من الدعااااء ,, صدقيييييني انه الدعااااااء وايد له أثر ..


هذا الي اقدر اقووله ,,

و الله يوفقج ..

اختج لونلي