جاء موعد السفر بعد إنتظار طويل دام ما يقارب السنه , وبعد هذه الفتره وبتوفيق من الله عز وجل تم تحديد جهة السفر وموعد الرحله ، ومرت الايام سريعه وانا بين سوق وسوق وصبحنا فالاسواق وليلنا على النت نبحث عن الدوله والمنطقه والجامعه والناس وما إلى ذلك من أشياء.
عاد في الاسبوع الاخير كانت المعاناه وأصعب ما على الانسان فراق أحبابه ولكن ما يصبرنا هو الامل في لقائهم بعد حين ،

ييت صوب الريم ابو قذيله ،،، للوداع مسافر(ن) عنه
قلتلــــه يالغـــالي اللــــيله ،،، ع السفر عزمي مسونه
خرس نطقه مول واحليله،،، والمدامع جاوبت عنه
خر دمعه وخرس الشيله،،، كالغياثي الوابلي كنه
ماقدرت يا سعيد تقبيله ،،، شفت انا العظام خاننه

ومن بعدها فراق الأهل والأصحاب

والحمدلله فتره وعدت على خير
ويمكن ان تصبح دافع للشخص للتميز و تزيد من اصراره ليكون مميزا

وفي هذا الوقت هوه الفرصه لتعرف معزتك في قلوب الناس..

لقد تأخر الوقت الآن وللحديث بقيه
أنتظروا قصة العائله

 

عاد انا مب لين هناك فاللغه العربيه الفصحه (مب مهجن لاتخافون)
ولكن طغة العاميه على الفصيح ، وزادها الانجليزي تجريح ، وعاد اللهجه السعوديه ما شاء الله عليه ألها جاذبيه غير طبيعيه

المهم يامتابعيني ويا متابعات الاحياء منكم والاموات

اليوم بخبركم عن اول يوم وصلنا المطار أشكالنا فقراء وكلنا فقراء لله

وصلنا المطار وكان الوقت العصر بتوقيتهم مب بتوقيتكم يعني فيه حركه فالمطار اللا ونحن عاد واصلين وانشوف الخلق ما درينا اللا وصوت يظهر بين الحمر يقول (نورت البلاد والله ، الحمدلله على السلامه ) اللا ونحن في تفكيرنا مناك وتارسين روسنا الربع (لاتتقربون من العرب انتوا سايريين تتعلمون ) ردينا السلام ، المهم عاد الحين نحن في بالنا حد بيستقبلنا فالمطار وبيخبرنا وماعرف شوه ، واحنا حليلنا مكودين الشنط ويالسين اتقول طلابين منها البلاد اول مره انشوفها وما اندل شيء فيها والاخس من هذا انه افهم واحد فينا يوم يقولون له : how r u? قال الهرم يسبنى خلونا انروح عنه.

المهم هانت وما قصروا خوان شما (السعوديين) دلونا وين التكاسي وعطونا عنوان فندق عدال الجامعه ، ووصلنا بالسلامه الحمدلله وكان الدريول من (تهران انجيلووس) ايراني يعني
هذا عاد اول يوم
ونحن عاد نتفكر فالبلاد والمباني اللي اكبر طابق هوه طابقين الله يعزج يالعين

وفي الصباح الباكر وقبل اذان الفجر بــ5 ساعات نحن واعيين شو الريوق ياخاون شما؟؟ قالو والله يبنا البارحه شيء زين (خلوها على الله )
انزين اذنا فالفندق (عشان يتبارك يقولون انه كان بيخسر) وصلينا جماعه ووعينا اليران حليلهم.
عاد سرنا صوب الجامعه وعندنا خارطه حق الجامعه وعاد كنا جماعه ومب متفقين ، يعني كل واحد بشوره ، المهم بعد منازعات وحروب اتفقنا على واحد وهو اكبر واحد فينا (العاقل اونه) عاد الجامعه مب جامعت الامارات كل مبنى فبقعه جنهن متزاعلات ، جامعه كبيييييييييييييييره وهم معلمين النا على المبنى اللي يبونا انسيرله وخلص اليوم الاول ونحن اندور المبنى ، ويا اليوم الثاني ونحن نتابع اكتشاف الجامعه اللي مالها نهايه بس هالمره كنا ظاهرين الله يسلمكم الساعه 5 الفجر وحصلنا المبنى الساعه 3 الظهر خخخخخخخخخ

وعاد الذكاء كنا انلف عليه كل يوم وناخذ من عندهم ريوق وانكمل لفتنا على الجامعه واللي احلى من هذا انه الخارطه غابت وراح الامير (امير الحمله) وسأل اهل المبنى اذا عندهم خارطه وعطوه (الحمدلله والشكر)

هذا اللي يمشي ورا شواب
المهم وصلنا قلنا هاه منو اللي بيرمسهم بيتفاهم معهم قال الاخ انا امره الحيه عندي واذا انها تغلقت الامور افزع علي يا بوشهاب قلتله ابشر بعزك والله ، المهم بعد 5 دقايق من دخولنا اللا وينجلب هذاك المبنى كله ضحك وعاد كانن يشتغلن فيه مزايين (الله لايرويكم) بس افتتنوا الشباب فيهن ، نحن يايين قبل الدوام بأسبوع وهالاسبوع دواموه في نكاتبهن وما قصروا اللا يابولهن الذبايح والهدايا وماعرف شوه....
عاد ترا كان محد يداوم فعشان جي اول مره حليلهم يشوفون وحده تسولف وياهم وتعطيهم ويه ومب متنقبه
متعودين على البلاد ،، اللا بعد اسبوع يوم بدا الدوام عدد الطلاب 35 الف طالب فالجامعه ،، و34 الف بنات والف سعوديين ، واحنا اللي على بالنا انقول والله بنشتاق للعرب وبينا الهوم سك على قولتهم ،، اللا وثاني اسبوع واحنا سايرين انقطع فالرمول ومعزبين فالرمله ولا بعد بكناديرنا وشالين ذبايح ونسوي المجبوس السنع << عز الله تعلمنا انجليزي


بسكم بسكم وايد خبرتكم عاد بعدين بتستوي مشاكل

 

(القلب له في غير ذي الدار نيات،،، والوصل من دون الحبيب كليفي)

(وسافر من تود وحال دونه ،،، بحر وبرور واخطار ومصايب)

شعراء استطاعوا التعبير عن ما يجول في خواطرهم من مشاعر واحاسيس ،، ولكنني ولو عبرت بالشعر والبحور والأوزان والقوافي وكتبت الدواووين ، لأ أظن انها كافيه للتعبير عن شوقي لمن شغفني حبه ،، وملك تفكيري ، وصنع مستقبلي، وملأ حياتي ، ورسم طموحاتي ، وحقق أمنياتي...
الحب كلمه عظيمه والأحساس به أعظم ....
الحب داء ودواء في نفس الوقت ....
ما أجمل ان يكون لك شخص تملكه ويملكك ، يكون كل طموحك رضاءه عنك، وتعمل بتميز لتكون متميزا عنده ، ولكن ليس بتصنع بما لا تملك ....
زاد الشوق للأحبه ،، وامتلأ الصدر شوقا حتى فاض ،،
................... ........... .................. ...........

 

من بعد همسات من القلب نرجع الى يوميات الغربه ،،
الغربه وما ادراك ما الغربه ،،، (والله حلوه) مادري ليش الناس مستكبرتنها
المهم ،، عيبتني قصيده للإمام الشافعي :
تغرب عن الاوطان في طلب العلا *** وسافر ففي الاسفار خمس فوائد
تفريج هم واكتساب معيشة *** وعلم وآداب وصحــــــــبة ماجد
فإن قيل في الاسفار ذل وغربة *** وقطع فيافٍ وارتكاب الـــــشدائد
فمـــوت الفتى خير له من حياته *** بدار هوان بين واش وحاســـــد

عاد عندما قرءتها اول مره شعرت بالحماس والاعتزاز وقد وجدت دافع للسفر ،، حتى أأنني وضعتها شعار لي فالسفر ،، ونك فالمسنجر بعد ..
ولكن تفاجأت برد على القصيده من احد الشعار المحطمين نفسيا وقد قال في قصيدته:
تخلف عن الاسفار ان كنت طالبا *** نجاة ففي الاسفار سبع عوائق
تنكر اخوان وفقد أحبــــــــــــــــة *** وتشتيت اموال وخيفة سارق
وكثرة ايحاش ٍ وقلة مـــــــــؤنس *** وأعظمها ياصاح سكنى الفنادق
فان قيل في الاسفار كسب معيشة*** وعلم وآداب وصحبة فائــــــــق
فقل ذاك دهر تقادم عهـــــــــده *** واعقبه دهر كثير العوائـــــــق
وهذا مقالي والسلام مؤبـــــــد *** وجرب ففي التجريب علم الحقائق

عاد شو ردة الفعل ،، ياحليلي والله حطم الطموح الاخ ،، ولكن جربنا والحمدلله ثبت العكس بس شيء من كلامه الصراحه صدق فيه ...

وهذا اللي قدرت اظهره لكم قبل الرقاد بسير ارقد الحين واشوفكم في صفحه يديده إن شاء الله ...

 

اليوم عاد بخبركم شيء يديد،،
عاد بعد مرور الايام وبدينا نتعلم وعرفنا أنه يوم حد يقولك how r u.؟ يعني كيف الحال... ولازم اتقوله بخير الحمدلله ..
عاد اللي سكن في عايله واللي في دورم الجامعه واللي في شقق ،، المهم خويكم اللي هوه بو شهاب، سكن في عايله ، والحمدلله عائله جيده على قولة السعوديين ، المهم اول يوم يينا واتفقنا وياهم وشفنا العايله اللي مكونه من بوي فرند والقيرل فرند حقه(البيت حق الحرمه) يعني الريال لاجئ، وعندهم بنت مزيونه ياحليلها عاد اسمها ما يناسب (شينا) ،، بس هااه لايسير تفكيركم بعيد تراها جلبه عزكم الله ،،
المهم مر الاسبوع الاول وتأقلمت وياهم، ايي واسولف معهم وهيك من هيك وهون من هون، و عاد قالت الحرمه انته ويه خير علي لأنهم رقوها في شغلها اول ما ييت عندهم ، ومرت الايام وعاد قالولها خلاص سيري اشتغلي في مدينه ثانيه ، تبعد عنا 4 ساعات بالطايره وبيضاعفون راتبها يعني وهيه استانسسست ، وبتي على الاسبوعين مره ، قلنا ما عليه بيتم الريال،
عاااد الريال وايد وفي ،، والصراحه طماشه ما شاء الله عليه.. امره الحرمه ظاهره من الباب ومن الباب الثاني داخلات بنات وشباب وصباحي ، عاد انا ما ياني رقاد من الازعاج ،، ترى بيوتهم وايد كبيره وماتسمع شيء امرره ، اللا مرات عادي تسمع النمل يوم يمشي،...
المهم مرت الايام والبيت على هذي الحاله وصار موقف لو اني ما ادري انه في ناس اندر إيج كان خبرتكم ،بس مب زين اخبركم وفي مراهقين،،،
المهم في يوم من الايام وبينما كان الزير اللي عندنا في نشوة السكر وانا داخل البيت قال انا اليوم ابا اتعلم عربي قلتله ابشر والله ،، علمناه كيف يرحب ومن بعدها من ادخل قال:( مرحبا مرحبتين بخير شحالك؟؟) مره وحده ايبهن عاد انا اختار اللي يعيبني


...(احس اني مليت وايد كتبت) بعدين بخبركم شو صار (فلم اكشن). ....