|؛¤ّ,¸¸,ّ¤؛|عــــلــــى وشــــــك الــــنــــــوم وشــريــط الــذكــريــات|؛¤ّ,¸¸,ّ¤؛

o0_police_0o · 19 May 2007, 12:39 AM

والصلاة والسلام على سيد الأنبياء والمرسلين

سيدنا ونبينا وقائدنا محمد

وعلى آل بيته الطيبين الطاهرين

وأصحابه الأخيار المنتجبين

على فترات متباعدة أمر على هالقسم

وعبثآ أحاول أشوف كل جديد فيه

عل وعسى إني ألامس واقع

شخص معين او إني اكون

قريب من حياته الشخصية

بحيث اتعرف على خصوصية كل عضو

سره وجود هالمدونة في منتدى ومجالس شبكة خلان

ولكن في الغالب ألاقي نفسي على القشور ساكن

وبين الخواطر والمنقولات ضايع في مشاركات

بعض الأخوان والخوات الكريمات

فكانت مشاركتي هذي هي محادثة بيني وبين نفسي

أفرغ فيها بعض الهموم وأعيد قراءتها مرة ثانية

لأقنع نفسي إن الواقع لا زال واقع

وعالم الخيال تركته لأصحاب

المثاليات وكلام العشق

والغرام

فإنتظرني يا o0_police_0o لأنه في العين قذى

و في القلب شجى

سأعود إليك بعد قيل

وفي أول هم

o0_police_0o · 20 May 2007, 02:18 AM

o0_police_0o · 21 May 2007, 12:11 AM

القصة هذي تؤلمني من أسابيع..

صديقنا وزميلنا في الدوام {جمعة}

من عشر سنوات ولما كنت جديد بينهم

كان جمعة أول من إستقبلني ودارت بيني وبينه سوالف

إنسان ما يخصه في حد أبد..في أغلب الأوقات يحب إنه ينعزل

ويجلس بروحه بعيد عن فلان وعلان...

في كل نهاية أسبوع يضطر إنه يقطع مسافة 600 الى 800 كيلو

عسب يروح يشوف أهله في عمان..

والمسافة بين الفجيرة وجعلان في عمان أعتقد تاخذ 8 ساعات درب

{جمعة} هو سائق عندنا....

وإنسان راعي إبتسامة

أبد ما شفناه مبوز أو ضايق خلقه

كل ما يجابلنا تكون ابتسامته سابقة لأي شي ثاني

من أسبوعين كنت قاعد في البيت براس الخيمة..

إتصل فيني ربيعي اللي يدوام وياي

وقال لي عظم الله أجرك في {جمعة}

بالبداية ما صدقت وقلت أكيد إنك تسولف

مو معقول,,أنا اليوم الصبح شايف جمعة في الكانتين

ومتريق ويانا وما فيه شي

والريال عمره في الأربعين..

قال لي ربيعي والله إنه متوفي قبل ساعة وشي

والحين هو في مستشفى خورفكان

واللي يداومون ويانا أغلبيتهم في المستشفى

في هالوقت صدق والله ما قدرت أهضم الموضوع

قلت معقولة توفى {جمعة} بهالسرعة

وكيف توفى وشو صار فيه

وأسئلة كثيرة تدور في راسي وأنا في مكاني متسمر

قالوا توفى بسبب مرض في القلب

تذكرت إنه أوقات لما أكون يالس ويا {جمعة}

يمسك صدره أسفل القلب ويقول فيني عصبة ويضغط

بإبهامه عسب يسكن الألم

وكان وقت الأكل أحيانآ

ما يقدر يكمل اللقمة والسبة هالعصبة اللي كان يقول عنها

ولكن بالأخير تبين إنها مش عصبة

كانت الشرايين منسده عنده ومحتاج لعملية قسطرة

ولكنه رحمة الله عليه أهمل هالشي بإعتقاده إنها عصبة

توفى جمعة بعد صلاة المغرب..

طلع من المسيد وكالعادة يجلس على هالكرسي

اللي جدام غرفته

وكان مسوي رياضة العصر

يمشي على طرف الميدان اللي عندنا

ولكن من قعد على الكرسي

مسك قلبه وصرخ بصوت خفيف

طلعوا ربعه اللي قاعدين داخل الغرفة

وكان ظنهم إنها العصبة اللي يتكلم عنها دايمآ المرحوم

لكن هالمرة زاد الوجع بشكل أكبر

وطاح جمعة من على الكرسي

وافترش الأرض..

ركضوا الأخوان بسرعة عسب يشيلونه بالأسعاف

ومن وصلوا مستشفى خورفكان

كان جمعه مسلم الروح لباريها

خذوا ورقة من المستشفى عن سبب الوفاة

وقالوا انهم بيتحركون فيه على عمان

عسب يدفنونه اهله وفي ديرته

ولكن حتى في موته ما إرتاح {جمعة}

من وصلوا الفجيرة ما قدروا يظهرون الجثة

الا بعد التشريح وتحقيق ثاني وكيف توفى الريال

يعني المسألة تعقدت شوي

وطالت القصة

ومن اكرام المست سرعة دفنه

ودفنوه بالفجيرة بعيد عن اهله وعياله

غريب

وظلت ذكرى جمعة لليوم في الدوام..

سيارة جمعة لازالت تحت المظلة

إن كان الميت تغرب حتى في موته

فكيف بالجماد..

الله يرحمك يا جمعة ويغمد روحك الجنة

آمين

وكل من يقرى القصة أتمنى إنه يترحم على جمعة

عاش غريب بعيد عن ديرته

ومات غريب

o0_police_0o · 23 May 2007, 11:59 AM

أول من يستقبلني لما أرجع من الدوام للبيت

هو حبيب القلب عبادي ربي يحفظه

أغيب عنه يومين في بداية

الأسبوع

الأحد والإثنين..ويشوفني الثلاثاء

وأغيب الأربعاء ويشوفني خميس وجمعة وسبت

والموال هذا مستمر طول السنة الا أيام

الإجازات والعطل والأعياد

البارحة نوينا أنا وعبادي إنا نروح البحر

والجو حار الحين.وهذا هو وقت البحر

الحبيب ما خلاني أتغدى على راحتي

وكل شوية {بـــابــا بـــحــر}

ناقص يقول علي بحر

المهم ظهرنا بعد صلاة العصر..والوناسة مرتسمة على ويه

عبادي والفرحة غامرة بوليس...

أحلى شي لما أشوف عبادي مستانس ويضحك

ضحكته تسوى الدنيا واللي فيها

لما وصلنا نزلت الحبيب

وخليته يسرح على

سيفة البحر

وهو يلعب وأنا اتابعه

فجاة عبود صرخ ومع هذي الصرخة انسحبنا

من الشاطئ...؟؟؟؟؟؟؟

مع انه ما كملنا 5 دقايق

لكن رحلتنا ما طلعت مثل ما نبغيها

يمكن عشان ما شلينا أم عبود ويانا

يمكن

الحبيب داس على شي وصابته حساسية

تعرفون شو في هالصورة

كلك عليها عسب تكبر

[عزيزي الزائر جميع محتويات الموقع التعليمية مجانية ولا تحتاج إلى رسوم خاصة أو تسجيل , لذلك لست مضطراً للتسجيل لدينا ما لم تكن لديك الرغبة في المشاركة بدروسك أو استفساراتك التي لا يمكن تجاهلها ولكن يتوجب عليك التسجيل للمشاهدة الرابطللتسجيل اضغط هنا]

كانت السيفة ممزورة من { الدول } وبالفصحى قنديل البحر

يعني لا نقدر نمشي حذال البحر

ولا نقدر نسبح

وتيتي تيتي

زي ما رحتي جيتي

وزعل الحبيب وراضيته بسيارة لاسلكية

ما يهون علي الغالي

والى اللقاء

o0_police_0o · 24 May 2007, 12:00 PM

سبحان الله

المآسي والآلام تقربنا لبعض أكثر

وتجمع كلمتنا وتخلينا نحس بالمحبة أكثر من

اي وقت مضى

مع إن القصة قديمة

لكنها غيرت أشياء كثيرة

كان يوم الخميس بتاريخ 10/8/2006

طالع من راس الخيمة على دبي وشايل عبادي والأهل

الوقت كان 5,30 العصر

ومن قبضت خط شارع الإمارات

شفت على السيد الثاني دورية مسرعة وسيارة إسعاف

راده بإتجاه راس الخيمة...

فكنت أكلم الأهل أقول أكيد شي حادث قوي والحين ينقلون

المصابين...

ما كملت مسافة إلا أشوف زحمة جدامي وعالم متيمعة

عرفت إنه في هالمكان مستوي الحادث

المهم

مشيت بالموتر شوي شوي..

لأنه المكان مزدحم

وفي هالوقت أعاين يمين ويسار

أبغي أشوف وين هالموتر اللي متسبب بالحادث

ما شفت جدامي الا داينا كبيرة منجلبة وسط الشارع

زادني الفضول أكثر أبغي أعرف وين الموتر الثاني

وشوي جاان أشوف الموتر الثاني طايح على يمين الشارع وسط الرمل

الموتر منتهي بالكامل...

أكلم الأهل أقول اكيد اللي بالموتر متوفي من زمان

ما كملت هالكلمة إلا وأحس بقلبي ينبض بسرعة

ولساني إنعقد في مكانه

شفت هالشي

ليت الموتر الخلفي مغطاي بقطعة قماش

زينة يسوونها الشباب

والموتر نفس موتر أخوي

لكن اللي خلاني أتأكد إنه موتره لما شفت الليت

ما قدرت أتمالك نفسي

بسرعة وقفت الموتر

ونزلت أركض صوب السيارة

بس أبغي أشوف رقم الموتر وأتأكد

ولما نزلت وشفت السيارة بالشكل هذا

ما قدرت أوقف على ريولي

الموتر هو موتر أخوي

شفت ربيعي موجود بالمكان ويصور الحادث

وهو في المرور يداوم..

سألته بصوت مخنوق بعبرة

عواس وين راعي الموتر

قالي ودوه المستشفى

سألني ليش تعرفه

قلت له هذا أخوي

جان يقولي ما فيه شي بس ريوله

ما صدقته قلت أكيد بس يطمني

ورجعت للموتر وعشرين ألف صورة في بالي

ورجع هو يركض وراي ويقولي لا تسرع أخوك ما فيه شي

قلت له مو مشكلة انا الحين بروح المستشفى

ورجعت سيده على مستشفى صقر

وفي الطريق إتصلت بأكبر أخواني وخبرته بالحادث

جان يقولي أنا الحين بالمستشفى وأخوك ما فيه شي غير كسر

بريوله بس..

مع كلام اخوي لازلت في شك..

صورة الموتر ما توحي إن الشخص اللي فيه ما صار به

شي الا كسر بريوله...

المهم وصلت المستشفى الساعة 6 ونص يمكن

يتبع....

o0_police_0o · 24 May 2007, 12:29 PM

والأهل بالسيارة خليتهم برع قسم الحوادث

لما دخلت شفت أخوي العود قاعد عند غرفة الأشعة

ييت وسلمت عليه وقعدت يمه..

وكلمته وسألته عن حال

اخوي الأصغر عني

جان يقولي هو مغمى عليه الحين

ويسوون له أشعة

قلت خير يا رب

وقمت أدعي عسى الله يرحمنا برحمته

وحذالي كانوا قاعدين إثنين شباب كناديرهم من تحت

كلها دم...

فسألت أخوي منو هذيل

قالي هذيل اللي طَلعوا علي أخوي من السيارة

فسألت الشباب عن الحادث وكيف صار

قالوا لي أخوك كان مسرع وااايد

وتدهورت سيارته لما فقد

السيطرة عليها

ودعم داينا

كبيرة

ونحن لحقنا عليه قبل ما يحترق وطلعناه من السقف

لأن المكينة شبت نار والاخوان ما قصروا

المهم..

القصة جدآ طويلة

وكيف عالجوه في مستشفى صقر

وخلاف شليناه على مستشفى خليفة

وبعدها زايد العسكري..

كان عنده كسر مضاعف في عظم الفخذ

وكسر في الكعب

ورضوض مختلفة في الجسم

لازم عملية وتثبيت مسامير وحدايد

ويغامر هذا اللي يوافق على عملية في مستشفى صقر

اللي أبغي أقوله إني حسيت بأخوي وحسيت بقيمة الأخوة

لما شفت أخواني كلهم بالمستشفى محاوطين أخوي من كل صوب

لما حسيت إني ممكن أفقد أخوي ويغيب عن عيني أبد

عرفت إن الدنيا قصيرة...

ولو ما عززت علاقتي بأهلي وأخواني

منو اللي راح يعيني باجر إن

طحت أنا لا سمح الله

الحمد لله أخوي الحين أهون عن قبل

لكن آثار الحادث لا زالت

حيث إنه ما يقدر يمشي بشكل طبيعي 100%

لازم يعري شوي على الخفيف...

وهذي صورته في العيد

اللي طاف

يسلم على الوالد

مع إني والله ما كنت أهتم قبل

إني أصور أبوي أو أخوي أو الوالدة

لكن المآسي تخلينا نحس بقدر بعض

ونتمى إنا نشوف بعض ولا تغيبنا الأقدار

ما حبيت اخوي كثر ما حبيته بعد الحادث

والله يحفظ الجميع

o0_police_0o · 26 May 2007, 09:57 AM

من يوم كنت صغير

هالقصر موجود في راس الخيمة

على نفس الحالة ولا تغير فيه شي

قصر ضخم ومساحته جدآ كبيرة وارتفاعه شاهق

يطل على الشارع الرئيسي _شارع الظيت_

لليوم محد سكن فيه ولحد قادر يسكن فيه بعد

والقصة أسمعها من كل شخص إنه هالمكان مسكون

وفيه جن وعفاريت وشياطين وكل شي مرعب

البارحة كنت أتمشى بالموتر والوالد معاي

فمرينا من صوب هالقصر

قلت خلني أسئله عن

قصة هالقصر

قالي نفس الكلام اللي سمعته وانا صغير

لكن الجديد في الكلام

انه هالقصر محد قادر يسكن فيه لسبب إنه صاحبه

غاصب الأرض من ناس ما راضين يبيعون أرضهم عليه

والله ما يضرب بعصا

فكانت فلوسه اللي بنى فيها القصر

حسرة عليه

لا يقدر يأجر ولا يقدر يسكن

تصوير القصر بتاريخ

25/5/2007

يعني البارحة

*·~-.¸¸,.-~*إياك وظلم من لا يجد ناصرآ إلا الله*·~-.¸¸,.-~*

والى اللقاء

o0_police_0o · 28 May 2007, 03:55 PM

يسألني البعض عن إسمي ورسمي

وكــيــف انـا وكـيـف اكــون

وكل هذا طبيعي يكون

من باب المعرفــة

وحب الفضول

من دخلت خلان وانا واضح المعالم في تواصلي

مع باقي الأخوان والأخوات,,,

ما احب الغموض مثل ما يحبه البعض

ولا أحب إني اكون عميق بحيث

يصعب على من يتعامل معاي

إنه يتعرف على شخصيتي

ولأجل هذا حطيت أقرب شي لي في توقيعي

بحيث إني أَعرِف عن نفسي وعن

إهتمامي وميولي..

ومافي شي بالدنيا أحبه قد ما أحب دوامي

حتى إنه يمكن افضل دوامي على حبيب

القلب..

ليش وشو السبب...؟؟

ما أدري

لكن غرامي بالدوام

[عزيزي الزائر جميع محتويات الموقع التعليمية مجانية ولا تحتاج إلى رسوم خاصة أو تسجيل , لذلك لست مضطراً للتسجيل لدينا ما لم تكن لديك الرغبة في المشاركة بدروسك أو استفساراتك التي لا يمكن تجاهلها ولكن يتوجب عليك التسجيل للمشاهدة الرابطللتسجيل اضغط هنا]

يسألني أخو بالمنتدى ويقول

هالفلم اللي بتوقيعك لمنو..؟؟

إستغربت من سؤاله..

كنت حاط في بالي إنه كل من يدخل على توقيعي

راح يعرف إنه اللي بالفلم هو أنا

والصورة الرمزية لي انا

ولكن كذا شخص سألني عن الفلم واللي بالفلم..؟؟

هــذا أنــا بكل بساطة

في خلان والواقع

كانت لفته على السريع

ونبذة عن شخصي المتواضع

بدل الحروف والجمل الطويلة والسرد

الممل

ربي يوفقكم

o0_police_0o · 31 May 2007, 11:07 AM

المسافة بالضبط بيني وبين الدوام

122 كيلوا..

وأقطعها في ساعة ونص أو أقل بعشرة دقايق

أحيانآ...

ومو كل موتر ينفع للطريق الطويل

يقولون السيارات الأمريكية مريحة أكثر من السيارات

اليابانية في الخطوط البعيدة..

وفي الطريق تكون ثابتة لا تلعب يمين ويسار

وعلى المنحنيات تلزق بالشارع وما تزلق على سرعات

عالية..

وفوق هذا السيارات الأمريكية تكد

المهم

شريت لي موتر للطريق بس

يعني اروح فيه الدوام

وارد..

ما افتر فيه بالبلاد أو احاوط فيه

لأنه مخصص للدوام

ويا حلاته من موتر كان

comaro 92

كد على الطريق معاي 3 سنوات

وكنت سيد الشارع لما امشي

لما اكون على سيد السرعة

وفي موتر وراي يبغي يتجاوزني

فبكل احترام يتم وراي من دون صوت ولا ليت

لما افتح له السيد ويمر بكرامته

نفس الشي لما ابغي اتجاوز

من بعيد يفتحون لي الطريق

يشوفون تمساح ياينهم

وكل شي عال العال على الطريق

ومحد يطلع من اللفة جدامي بشكل مفاجئ لي