الجزء العاشر


عفرا ...... دخلت مثل كل مره ... همجية .... وغاليه وياها لكن برقة ...

في هالممر الطويل يمشون ...

عفرا: ويه هلكت ... من زمان ما ييت هني ولا سويت رياضه
غاليه: هههههه تستهبلين
عفرا: هههه والله ريولنا عورتنا من كثر ما نمشي
غاليه: تبين الصراحه هو صح تعب بس نستفيد في نفس الوقت
عفرا: من شووووووه تستفيدين ...... الله يخليج روحج منقرضه
غاليه: سخيفه ما تظحكين هههههههه


ودخلن المكتب بدون لا احم ولا دستور ... ولا حتى دقّن الباب .....

عفرا: خالييييييييييييييييييييييييييييييي

لف بالكرسي صوبهن ...... يوم شافهن ارتسمت ع ويهه ابتسامة ..... انشرح ويهه ... حس ان في شي مميز اليوم ...


يوسف: هلا والله .....
عفرا ( تجدمت ووصلت عند خالها وحبت راسه ) : شحااالك خالي حبيبي ؟
يوسف: انا بخير الحمدلله . انتي شحالج ؟
غاليه: عمي شحالك ؟ شخبارك ؟
يوسف: هلا والله بـ غاليتي انا ......
عفرا: لا لا لحظة بدينا .. جيه ادلّع غاليه يعني وانا لا ؟ مسرع ما نسيتني
يوسف: افا والله ... حد ينسى روحه ؟ انتي روحي
غاليه: وانا ؟
يوسف: انتي قلبي
عفرا: ههههههه يعني انا اغلى ... لان الروح اغلى من القلب
غاليه: هاهاه ما تظحكين ويا ويهج
يوسف: شحالكن ؟ وينكن ما شايفنكن من زمان
عفرا: والله خالي شوه نسوي ؟ الجامعة وبلاويها
يوسف: شوه تبين فالجامعة ؟ يلسي عندي هني فالبيت واللي تبينه بيوصل لج
عفرا: لاااا جيه ؟ انا ما قلت لك محتايه شي .. لكن جامعة وبنات وسوالف جيه يعني نقضي وقتنا
غاليه: الشهادة تنفع عمي فالمستقبل
يوسف: شوه تبون بها الشهادة ..... والله تعالن عندي هني البيت .. وأأثث لكن حجرتين فوق .. ع ذوقكن اختارن أي حجرتين تبون .... وتيلسون عندي
عفرا: خالي يوم بيطردوني من الجامعة بفكر في عرضك المغري الصراحه
غاليه: هههههه انتي ما وراج شغل وافقي من الحين .... بلا توفل بلا خرابيط
عفرا: اسكتي انزين .... لا تذكريني بالمأساة
يوسف: انزين .... سيرن ريحن الحين فوق .. في حجرة من الحجر ..... و انا عندي كم شغله اخلصها في نص ساعة او ساعة بالكثير ... وافضى لكن اليوم بطوله ...
عفرا: خلاص عيل ... عقب ساعه نحن عندك هني ...
غاليه: ما يخصنا لو ما كنت مخلص
يوسف: ههههه افا عليكن والله اهد عقبها كل شي واجابلكن
عفرا: خلاص عيل ... يالله غاليه
غاليه: يالله


طلعن عفرا وغاليه .. وسارن فوق .. وهن يرمسن عن هالبيت اللي من متى ما داخلينه ....


عفرا: بل هالتحفة لين الحين هني
غاليه: ههههه الله اكبر قولي ما شاء الله عن اطيح وتنكسر الحين
عفرا: هههههه غيّر الاثاث
غاليه: هيه غيره .... بس حلو ما شاء الله
عفرا: الحين لو تسألينه ... بيقولج خشب اصلي من الهند ما ادري من وين ... وايد متفيج الصراحه خالي يوسف
غاليه: وايد يهتم في هالبيت
عفرا: يا ريت لو معرّس بعد
غاليه: انا قلت الحين بنيي بنشوف حرمه فالبيت ماخذنها بالسر ههههههه
عفرا: ههههه فلم هندي !
غاليه: جااايز .. كل شي جايز في هالعايلة .....
عفرا: هيه والله .. شفتي مروانو الدب
غاليه: ههههه ويه عفاري كيف قطعج
عفرا: يوم اقولج
غاليه: انا كانت فيه ظحكه بس مسكت عمريه
عفرا: مالت عليج بدال ما ادافعين عني
غاليه: احمد ريل اختج ما قصّر ههههههه
عفرا: انتي سخيفه اصلاً ... جدام احمد وطارق وهزاع وابويه عادي عندج ..... بس جدام الباقين لا !
غاليه: يعني عفاري احمد وطارق دايماً اييون يوم انا هناك .. وبعدين ما آخذ واعطي وياهم وايد .. وابوج شرات ابويه ... وهزاع انزين بايعينها .... لكن بعد استحي منه .. اما الصراحه عيال خالج لا اسمحي لي
عفرا ( تقلدها ) .. عيال خالج ... اللي يقول مب عيال عمج !
غاليه: أي حجرة الحين نيلس فيها
عفرا: انتي في حجرة وانا في حجرة ....
غاليه: لا والله ! .. حلفي ؟ شوه اسوي ايلس في حجرة ما ادري كم مساحتها روحي ؟
عفرا: ههههه نستغل الفرصه فاضي هالبيييييييييت
غاليه: ههه لا تستهبلين ...
عفرا: تعالي ندخل هالحجرة ....
غاليه: دخلي أي حجرة الحين وفكيني


دخلت عفرا وغاليه الحجرة .....

عفرا: برقد انا
غاليه: يالله عن العبط .....
عفرا: شوه تبيني اسوي ؟
غاليه: يلسي ويايه
عفرا: اجابلج ؟ مصدقه عمرج ويهج حلو .. مليت منج امس واليوم بطوله ويايه
غاليه: هههههه مالت عليج والله .. بتشوفين ....
عفرا: ههههه اسولف


عقب ما ظحكن .. وسولفن .. وخلصن ..... شافن ان في حد راقد ..... ماتن من الزياغ .... تيبسن في مكانهن ......


وبسرعه ظهرن برع وصكن الباب ....

عفرا: شفتي غلّوي ؟
غاليه: شفت شفت .... وياريتني ما شفت
عفرا: منوه هذا ؟
غاليه: شدراني ... ونحن مالت علينا ما لقينا غيرها يعني ندخلها !
عفرا: لحظة .. تذكرين هالحجرة ؟
غاليه: شوه اذكر فيها ؟
عفرا: هالحجرة .... عموه سارة الله يرحمها كانت تيلس فيها .... تحيدين
غاليه :اووه انتي وايد متفيجه ..
عفرا: غلّوي تذكري .... يوم كنا نحتشر ليش ان واحد من عيال خالي سيف الله يرحمه ..... كان له حجرة في هالبيت
غاليه: هيه اذكر .... لحظة .. اكبرهم شوه اسمه ؟
عفرا: عمر
غاليه: هيه ... هذا هو بنفسه .. هذا كانت له حجرة في هالبيت ....

عفرا + غاليه : ليكووووووووون


غاليه: اويه الحين شوه نسوي؟
عفرا: شوه نسوي يعني ؟
غاليه: اييييييه وين سايرة ؟
عفرا: بسير اشوف لي حجرة ثانية ايلس فيها
غاليه: ط هاي والله
عفرا: غلّوي مب تسوين لي حركات الحين ..... امشي نسير نريّح في أي حجرة من الحجر ....


عمر ...... جنه كان صوت بنات ! ... هذا مستحيل يكون كمال .... ولا حد من الخدم .. اصلاً ما يتجرأون يدخلون هني بدون ما يدقون الباب .. معقولة دقّوه و انا ما سمعت ..... بس صوت بنات وكل اللي فالبيت هني رياييل .... منوه ياي ؟


نش عمر من مكانه ..... سار وفتح الباب ... طل طله ..... ما في حد ! ..... ظهر ومشى ... وطل من فوق ... يشوف في حد تحت ؟ ما في حد ...

عمر ... برد ارقد .... احسن لي .... ما اعتقد في حد ... انا كنت اتخيل ..... او حد من الخدم وانا ما ميزت الصوت !!


في صالة بو هزاع ...

عبدالعزيز: عمّوه يالله قومي سوي لي
ام هزاع: قلت لك عقب ..... اصبر
عبدالعزيز: لا الحين ابااااه
سلامه: انته ايه .... مب تتأمّر ع اميه
عبدالعزيز ( اطالعها بنظرة ) : ما رمستج انتي
حصه: ههههههه سكتي عنه ...
آمنة: هذا شوه يبا منج امايه ؟
عذيجه: يبا كريم كراميل ......
سلامة: جيه رمضان
عبدالعزيز: عموه شوفيها هي تحط عليه الحين
سلامة: ههههههه ويه زيغتني سيد عبدالعزيز
عبدالعزيز: قومي سيري بيتكم يا بوي .. بسج من كم يوم يالسه هني ؟
سلامة: بيت ابويه
عبدالعزيز: بيت عمتيه
حصه: سلااااامه بس ... سكتي عنه
سلامه: هههه يظحك يوم يرد ...
ام هزاع: انزين اصبر .. عقب شويه بسير وبسوي لك
عبدالعزيز: لا الحين ... عمر بيي ياخذني وانتي بعدج
ام هزاع: انا بقوله ما ايي الحين
عبدالعزيز: ما بيسمع رمستج .. نشي
آمنة: عبدالعزيز قم تعال ويايه المطبخ انا بسوي لك
عبدالعزيز: قولي والله ؟
آمنة: شوه اجذب عليك يعني ؟
عبدالعزيز: تعرفين تسوين ؟
حصه: قومي امون بيي وياج ... بنسوي .. عاد هو بياكل ياكل ما بياكل مشكلته
شمسه: عبدالعزيز وين سالم ؟
عبدالعزيز: رقد فالميلس
شمسه: ويه .... راقد هناك ؟!
عبدالعزيز: هيه شوه فيها ؟
شمسه: وجيه ما تقولي ؟

نشت شمسه بسرعه من مكانها سارت صوب الميلس تشوف ولدها .....

سلامة: امايه ...... راسي يعورني
ام هزاع: خذي لج حبّة بندول .....
سلامة: خذت .. كم آخذ
عبدالعزيز: سيري العيادة
سلامة: محد طلب رايك
عبدالعزيز: ههههه والله تظحكين معرسه وما ادري شوه ... وبتييب ياهل
سلامة: ما يخصك قلت لك
ام هزاع: يالله يا سلامة بلاج اليوم عليه خليه
سلامة: قاهر بي اليوم
عبدالعزيز: ليش؟
سلامة: سر اتصل في اخوك ايي يشلك
عبدالعزيز: مب ع كيفج بيت عمتيه
سلامة: قلت لك بيت ابويه
عبدالعزيز: عموه شوفيها
ام هزاع: قم قم انته قم سر ويا آمنة وحصه المطبخ قم
عبدالعزيز: الحين انا ريال تطرشيني المطبخ وهاي يالسه ؟
سلامة: هههههه الله يخليك لا تظحكني ريال اونه
ام هزاع: قم حبيبي والله فديتك انا يا عبدالعزيز سر شوف آمنة وحصه فالمطبخ يسون لك الكريم كرميل بس يوز عن سلامة هاي ما فينا ع حشرتها
عبدالعزيز: ههههه ويييييه قالوا لها ....... مب لـ شي بسير المطبخ بس عسب خاطر عموووه حبيبتيه
سلامة: احسن بعد .. تفج عنا شويه ....


ثاني يالس مثل كل مره فالظلام ...... يالس ع شبريته وصاك ع روحه الباب .. وحاط اللاب توب في حضنه ..

ثاني روحه بنفسه عنده موقع يديره ... موقع تصاميم وفلاشات وخربطات وتقنيات الكمبيوتر اللي ما تخلّص .... يدخل هالبرنامج ينزل هذاك يتعبث في هذا ويخرب هذاك ....

استوى شخص معروف فالنت .... بس بـ الاسم المستعار اللي اختاره لـ نفسه

(T H A)

يالس ومندمج في اللي يشتغل عليه ..... برنامج يديد خاص بالـ ماسنجر نزله ويالس يجرب فيه ويدخل هني ويطلع هناك ....


دخل عيه زايد

زايد: ما شبعت ؟
ثاني ( وهو بعده مندمج ): شوه بغيت ؟
زايد: ثاني بند هاللاب توب شويه وابغي ارمسك
ثاني: شوه تبا ؟
زايد: بنده

حس ثاني ان الموضوع شويه يعني مب وايد جاد ...... بند اللاب توب احتراماً لـ زايد ويلس يطالعه ....

ثاني: بندته شوه بغيت ؟
زايد: ثاني عايبنك الوضع
ثاني: أي وضع ؟
زايد: بيت عمي يوسف ..... وعيال عمي سيف الله يرحمه
ثاني: هو الصراحه مب عايبني بس شوه تبانا نسوي ؟
زايد: لازم نسوي شي .... وضع عمر مب عايبني
ثاني: بس والله ان ما شي مثل عيال عمي سيف .. ما شاء الله يوم تيلس وياهم والله تنسى كل شي عندك ...
زايد: تو الناس ! توك تدري
ثاني: لا ادري من زمان ... لكن يعني اضافات اضافات هههههههه
زايد: وهالشي اللي يقهر .... عمي يوسف مفضّل بدر ع الكل
ثاني: افففف يا هالبدر والله انه يقهر بخقته جنه محد دارس برع غيره
زايد: لا تنسى اكيد بيتخقق دامه من قوم وقوم ع قولته
ثاني: شوه قصده يعني ؟ خقته عليه وعلى ابوه لا ينسى ان امه تستوي عمتنا .... يعني بغا والا ما بغا فيه عرج منا ... وععععع مالت ... ويقهرني يوم يلبس بدل ويرفع هالشعر .. يلوع بالجبد..
زايد: ههههه تغار ليش انه احلى عنك
ثاني: اتخسي الا هو والله ..... اونه شوه ؟ احلى عني ... حبيبي انا ما يهمني اللي يسويه ... وانا ما تهمني المظاهر
زايد: هيه اشووووووفك واااايد
ثاني: ههههههه ما تهمني المظاهر جدامه طبعاً ... بس مظهري الشخصي ... احم احم اوف كورس لازم اهتم فيه
زايد: انزين انا ساير تبا شي ؟
ثاني: وين بتسير
زايد: بيت عمي يوسف
ثاني: ليش في اجتماع مغلق بعد ؟
زايد: لا ..... عمر هناك واتصل بي وقالي ايي نتعشى هناك وياه
ثاني: شي جميل ..... الله وياك ..


عمران .... يالس في حجرته يذاكر .... راشد ما يهون عليه يطلع للحين ومحد فالبيت ويا عمران غير فريد ..... وبعد ما يقدر يسير ييلس وياه ويخرب عليه مذاكرته .....

قال احسن شي يسويه ......... انه يسير يرقد ...

وبالفعل سار حجرته و تسبح وبدل ورقد .....

وصل سعيد البيت .. استغرب .. معقوله رقود ! لا وايد من وقت ! .. مستحيل ..


صعد فوق .. دخل اول شي حجرة عمر وعبدالعزيز ........ محد !

دخل حجرة مروان وعمران ... شاف عمران يذاكر

سعيد: عمران
عمران ( لف صوبه ): هلا سعيد
سعيد: وين الباقين ؟
عمران :محد فالبيت غيري وغير راشد ..
سعيد: ووين راشد ؟
عمران :ما ادري عنه والله الا من ساعه بس يا هني سألني احتاي شي ؟ قلت له لا ... وسار عني ولا شفته
سعيد: اها .... وانته خلصت ؟
عمران: باجي لي آخر شي وبخلص هالكتاب
سعيد ( ابتسم ): ييب عاد نسبة ترفع الراس
عمران: بدعواتكم
سعيد: الله يوفقك

وظهر سعيد وسار صوب حجرته وحجرة راشد ... ما حب يزعج اخوه يوم شافه مهيّأ الحجرة للرقاد .... فما فتح الليت ولا سوى حركة تزعجة ..

راشد: الحمدلله ع السلامة
سعيد: انته ما راقد !
راشد: لا توني مخلص سبوح وجيه ... واوني برقد
سعيد: اها ... عيل انته ما طالع من البيت
راشد: ما تفيجت .... وعمران بروحه هني
سعيد: عمران ريال بييلس يذاكر
راشد ( ابتسم ): ما يهون عليه بعد .. كلنا برع البيت وهو روحه هني ..
سعيد: هههه اوه اوه الاخ المثالي ... لاعب دور عمر اليوم
راشد: الله يخليك .. لا ما ابا العب دور عمر .. وايد صعب .. ( حب يستهبل ) وفالاخير ما بقيم اللعبة بعد
سعيد: ههههههه شوه هالاستهبال العجيب .... والله من الصبح ما سمعت استهبالاتكم
راشد: طبعاً ... بديناااااااااا بالطلعات والسيرات والييات اشوفها كثرت كثرت .... وباجر بتنسانا بعد
سعيد: حشى فـ ذمتك جان سويتها ونسيتكم ؟
راشد: ما يندرى ...... الحرمة تغيّر
سعيد: عاد جان بتغيرني ع هلي .. والله تيلس في بيت اهلها ولا تيي هني
راشد: هههه بل عليك من الحين تبا تيلسها في بيت اهلها وهي اصلا هناك .. حليلها ما تهنت
سعيد: هيه عيل هي تيي وتنسيني اخواني ...... شوه هالرمسة ؟
راشد: من باب المزاح يا اخي .... لا تخف ... بتكون شرات اختنا ان شاء الله .. وبهذه المناسبة ... طبعاً انا انقل اغراضي ...
سعيد: وين تنقلهم ؟
راشد: اممممم ما ادري ... الحجرة الي تحت
سعيد: وليش ان شاء الله ؟
راشد: خير ؟ ... استاذ سعيد بتعرّس انته
سعيد: لااااا .. سوينا الترتيبات .... الله يسلمك .. الحجرة اللي تحت بـ ممرها الطويل .. وحمامها الخاص .. ومساحتها الشاسعة انا باخذها .. لين الله يفرجها
راشد: يعني انته اللي بتنتقل
سعيد: هيه
راشد: يسسسس ..
سعيد: وبلاك وايد مستانس ؟
راشد: هاهاها ... تدري ما اصبر عن مناقرة اخواني ... ما كنت ابا اسير مكان ثاني بس جاملتك ههههه والا منوه يصبر عن استهبال مروان ودلع عبدالعزيز ونصايح عمر و تطوّع عمران من يصبحون كل واحد وميزته
سعيد: هههههه الله ياخذ عدوك .... وانا مب فالحسبه هاااااا .. خلاص برع
راشد: لا لا افا عليك.... ما بتسير بعيد متى ما زعلت ويا الحرمة تعال هني فوق شبريتك فالحفظ والصون ههههههه

في بيت يوسف ... حان وقت العشاء ...


يوسف: الله ياخذ عدوج يا عفاري ع هالسوالف ههههههه
عفرا: والله يدي صدق
يوسف: شوه تبيني انزين اسوي ؟
عفرا: عرّس خلنا نفرح فيك
غاليه: عفرا بس خلاص هههه
عفرا: مب ناوين تعشّونا ؟
يوسف: بلى ..... بس نتريا عيال خوالج ...


انصدمت عفرا ........ عيال خوالي ! ... أي خوال ؟!

وغاليه منصدمه اكثر عنها .......

انفتح الباب ....

زايد: السلام عليكم ...
يوسف: وعليكم السلام ..

ارتاحت غاليه يوم شافت اخوها .. اشوه عمها كان يقصد اخوها اكيد .... والا لو حد ثاني .. عادي تصيح ! ..

وعفرا رغم انها تخاف شوي من زايد الا انها هي الثانية ارتاحت نفسياً .. يالله زايد معقولة .. نمشّيها ..

زايد: اوه غاليه هني
غاليه: شفت عاد
زايد: شحالج عفرا ؟
عفرا: الحمدلله بخير ......
زايد: ليكون كلتوا عني ؟
يوسف: لا لا افا ناكل عنك وعن عمر ... شوه هالكلام ؟
زايد: ههه فيك الخير عمي .....


مب جنه في اسم غلط يابوا طاريه في هالمجلس ! ....


عمر: السلام عليكم .....

3 منصدمين ....

عفرا ... تبا حد يخشها يسوي أي شي .. بس ولا انها تيلس تجابل عمر ..

غاليه ... لصقت في زايد ...... انخشّت وراه ...

عمر .. ما يدري ان في بنات بيكونن على هالمائدة .. ما يعرف هل يجدم زيادة والا يرد من وين ما يا ...

يوسف: تعال عمر ....
عمر: هاه ؟

زايد حس بارتباك عمر .. وانه مب متعود ان عفرا او غاليه ييلسن وياه ... هو من كم سنة ما شايفنهن وآخر مره شافهن في هالبيت ... والحين عقب كم سنة بعد يرد يجمعهم هالبيت ..

زايد ( ابتسم) : عمر تعال يلس

عمر نزّل راسه وتجدم ويلس حذال عمه ...

يوسف .... ع يساره عفرا ...

وع يمينه .. عمر وحذال عمر زايد .. وعقب زايد غاليه ...

اللي مرتاحه الحين غاليه .. وهذا اهم شي بالنسبة لها .. اخوها موجود يعني في شي من الخوف راح ... اما اللي مول رايحه فيها عفرا .. صح انها قوية في مواقف وفي مواقف ويها يستوي شرات الطماط ..


يوسف: يالله بسم الله ...

بدو ياكلون وكل واحد صاخ .. ولا يرمس ... الوحيد اللي شوي الوضع بالنسبة له عادي هو زايد ...

زايد: غاليه تبيني احط لج من هذا ؟

وغاليه ما ترد ...

لف زايد صوبها وشافها كيف لاصقه فيه .... وشاف ويها اللي تحس شوي والدم بينفجر منه .. ما استغرب هالأمر ع اخته لانه يعرفها ويعرف بـ خجلها الزايد ...

حط لها فالصحن ع ذوقه و جدّمه لها ...

اما عفرا ما تبا تنحط فالموقف اللي فيه غاليه .... فـ روحها شلّت صحنها وحطت الله تباه في صحنها ..

وعلى ما زايد لف صوبها عسب يساعدها ... شافها مخلصه ... وعيبته انها تغلبت ع الوضع مب شرات اخته !.... هذا وهي وراه مندسه .. لو كانت مجابلة عمر شرات عفرا عيل شوه بتقول ؟


يوسف: غاليه بلاج ؟

وغاليه ما ترد ..

يوسف: شوه فيها غاليه يا زايد ؟
زايد: عمي ما فيها شي ....
يوسف: ما تاكل
زايد: لا ... تاكل ما عليك .... اكلها شرات العصافير هاي
عفرا: ما عليك خالي .... تعرف غاليه وايد تحب تدّلع ...
يوسف: عمر شوه استوى ع عرس اخوك ؟

انصدم عمر .... تمنّى لو بس هالمرة .... بس هالمرة وع هالمائدة عمه يسكت ... ولا يجرّح فيه جدام بنت عمته و بنت عمه ....

زايد تدارك الموضوع ....

زايد: عمي ... ثاني يسلم عليك ...
يوسف: الله لا يسلمه من ولد ...

عفرا غصباً عنها رفعت راسها و ظحكت بعفوية ....

عمر يوم شاف ان اللي يالسين يظحكون هو ابتسم ع رمسة عمه .....

زايد :ههههه لا ادّعي عليه حليله
يوسف: متى بيودر البلوى اللي عنده ؟
زايد: يقول تكنلوجيا وتقنية حديثة
يوسف: حديثة في عينه ... الا دمار والله دمار ..
زايد: ما عليه ... روحه بيمل من النت واللي فيه .. وبيعرف انه كان غلط
يوسف: وعلى ما يمل من النت .... جد نحن في قبورنا
عمر: بسم الله عليك عمي .... فال الله ولا فالك .... يكفينا طاري الموت ..


الكل سكت يوم عمر رمس ..... طلعت منه الرمسة مرة وحده ... كل حد حاس باحساسه .. وعمه سكت مب عسب ان امه اللي متوفيه ... عسب ان ابو عمر اللي هو اخوه هو اللي متوفي ..


مروان وهزاع .. هياته ..... عالآخر ..... وعقب ما شبعوا ردوا بيت بو هزاع .... شمسه ردت بيتها وحصه ظاهره الحين بترد البيت ....

مروان: ليكون بتباتين هني بعد ؟
هزاع: يالله يالله ردي بيت ريلج يالله
سلامة: والله لو ببات كيفي
مروان: ههههه والله لو انا بدال طارق .... والله ما خليتج هالكثر تباتين بيت اهلج
سلامة: ما تخربون ريلي عليه ....
مروان: نحن نخرّب ريلج عليج ؟! ريلج روحه والله .. اصلاً يروم لكن حليله ما يبا يزعلج اونه قاصه عليه
احمد: ههههه الحين شوه تبون بها الحرمة كيفها

آمنة نازلة من فوق لابسه عباتها وشيلتها ..

مروان: شوفي تعلمي من اختج .....
حصه: يالله مع السلامة
ام هزاع: بتسيرين روحج؟
حصه: هيه امايه ... يايه بسيارتيه ..
عبدالعزيز: حصه باجر مري عليه طلعيني
احمد: هيه تشتغل عندك
عبدالعزيز: هههههه والله ابا اطلع
حصه: ههههه باجر ما اقدر يوم ثاني شوف يناسبك وبظهرك ان شاء الله .. يالله ريلي روحه فالبيت فمان الله
ام هزاع: سيري فديتج بحفظ الله ..
احمد: سلمي على علي
حصه: يبلغ .. فمان الله
مروان: اتصلي في طارق يالله
سلامة:هههههه انته ابا اعرف جيه منقهر ؟
احمد: ياخي عرّس وتحكم في حرمتك
مروان: هو بـ ودّي لكن الميزانية ما تسمح للأسف عرس سعيد جريب
هزاع: ههههههه لا تظحكني اونك بتعرس
مروان: لييييييش مب مازر عينك ههههه
احمد: انته وياه بس وايد تظحكون هههه
آمنة: يالله احمد ..
مروان: قم قم .. يالله سر
ام هزاع: انا ابا اعرف انتي ظاهره عنيدة ع منوه يا بنيه ؟ باتي هني ... شكلج وايد تعبان
آمنة: امايه ما فيني شي ... برد البيت برقد وبرتاح ....
مروان: يالله عزوز نسير البيت
عبدالعزيز: عمر بيي ياخذني
مروان: وشحقه العباله ؟
عبدالعزيز: هو قال
مروان: قم نسير وانا بتصل به بقول ما اييك
عبدالعزيز: جيه تخرّب عليه ؟
مروان: وانته ان شاء الله لين متى ناوي تيلس ؟
ام هزاع: خله ما يخصك فيه
عبدالعزيز: الى ان يشاء الله

الكل ظحك غصباً عنه .. وخصوصاً مروان ... وييييه اليوم مفتقد عمران والله .. هههههه

احمد: امون متأكده ما فيج شي ؟
آمنة: ليش ؟ عندك شك ؟
احمد: ما ادري .... اخاف يستوي بج شرات آخر مره .. وفجأة تطيحين علينا
آمنة: لا تطمن .. ههه مسيطرة ع الوضع
احمد: اكيد ؟
آمنة: بلاك ؟ خلاص قلت لك ... واذا تعبت زيادة بقولك انزين
احمد: ليش ما تميتي بيت هلج ؟
آمنة: ليش ؟ تبا الفكه
احمد: لا بس اسأل
آمنة: انته كنت بتخليني ؟
احمد: هو الصراحه ما كنت بخليج .... لكن اذا تعبانه وايد هيه ... هناك عند امج ترتاحين اكثر
آمنة :وانته شدراك ارتاح اكثر هناك
احمد: معرووووووووفات بنات بو هزاع ... ما ترتاحن وتدلعن ع الآخر الا عند أمكن
آمنة: هيه فديتها والله امايه قلبها طيب وحنونه عسب جيه نحس بالارتياح يوم نسير صوبها
أحمد: نعم نعم .......
آمنة: شوه نعم نعم ؟
احمد: بلاج ... يعني اوافقج الرأي ...
آمنة: انزين الحين اسكت شويه برقد انا لين ما نوصل
احمد: انزين نزلي السّيت ع ورا .. احسن


نرد لـ بيت بو هزاع ....

طارق وعفرا وصلوا نفس الوقت ...

عفرا: وين وين ؟ ليكون الحين بتسيرون ؟
طارق: هيه ... شوفي الساعه كم .. بس
عفرا: لا تموا شوي انا ما يلست سولفت ... بسولف
طارق: ههه ليش يوعانه سوالف ؟ وين كنتي سايرة ؟
عفرا: بيت خالي يوسف
طارق: هههههه بيت المغامرات ع قولت احمد
عفرا: ههههه هيه
طارق: شحاله ؟
عفرا: الحمدلله .. يسلم عليكم
طارق: الله يسلمه ...
عفرا: الله يخليكم لا تسيرون
طارق: اصلا اختج اليوم انا منقهر منها ..... شكلها تبا تبات هني
عفرا: ههههه مب شي يديد
طارق: لا آسف .... ما بخليها اليوم ..
عفرا: ايواااااا وعصب طارق

طارق وهو ماشي ظحك ع رمسة عفرا .....

طارق: سيري الله يخليج سوي لي درب
عفرا: اصلا جنه الا محد هني .... ما اشوف سيايير الباقين
طارق: سيري شوفي

فتحت عفرا باب الصاله ....

عفرا: تعال قلت لك ما في حد ..
سلامة: منوه هذا ؟
عفرا: لا تخافين ريلج ....
هزاع: واخيراً ما بغيت
طارق: ليش؟
هزاع: ياخي شل حرمتك لوعت بجبودنا بدلعها الماصخ ... شلها وروحوا بيتكم ولا اتونا الا عقب سنة
طارق: هههههه بس عاد ها ... ما ارضى عليها
سلامة: يا ويهك هزاعو ومنوه يالس وياك من الصبح .. وامايه وابويه ساروا يرقدون !
هزاع: سوالفج بايخه
سلامة: مالت عليك مب منك من اللي ييلس وياك
عفرا: ههههههه حطوا عليه
هزاع: انتي قولي شوه سويتوا هناك
عفرا: انته صدق تعال جيه ما خبرتني ان عمر ولد خالك هناك ؟
سلامه: وهو مب ولد خالج ؟
طارق: متبيرة منهم ههههه
عفرا: لحظة خلوني اتفاهم
هزاع: والله انا ما كنت ادري ... عمر مب كل ما يخطي خطوة يقولي وين ساير ووين راد عسب اخبرج
عفرا: يلسنا ع الطاولة ... واونه بنبدأ ناكل .. ويقول خالي اتريوا عيال خالكم.. هني تيبست .. دخل زايد عقب وارتحت
سلامة: وايد عليج
طارق: حليلج يا عفرا هههههه
هزاع: الحين بالله عليج اونج تخافين من زايد
عفرا: لا لحظة .... وشوي الا وينزل عمر ولد خالي سيف الله يرحمه ..... وخلاص هني صدق متنا انا وغالية
سلامة: ويييييه غاليه اكيد تغيرت
هزاع: ما صاحت هههههه
عفرا: هههههه غاليه كانت محتميه بأخوها وانا حليلي اللي خالي ما هيئني نفسيا .... يالسه ومجابلة عمر .. بس سويت عمريه عادية .... غاليه ويها غدا شرا الطماط ... كانت بتصيح بس يودت عمرها
هزاع: هههههه تتأدبن عسب مره ثانيه ما يفضلكن علينا
عفرا: احم احم تغار
طارق: يالله سلامة
سلامة: يالله مع السلامه
هزاع: الى لقاء قريب ...


ظهروا طارق وسلامة سايرين بيتهم ... وعفرا يلست شويه ويا هزاع كل واحد يقول سالفة من سوالفه ... ومستمتعين بوقتهم ...


في صالة الشباب .... راشد اللي رقد ..... وعمران رقد ... عبدالعزيز رقد ..

عمر .. ظهر من الحجرة ... عقب ما تأكد ان عبدالعزيز رقد .. بند كل شي .. و ظهر العديات من عينه ... ولبس نظارته .. ونزل تحت ...

شاف سعيد ومروان يالسين ...

عمر: ما شاء الله واعين
سعيد: نترياك
عمر: شوه فيكم ؟
مروان: سعيد يبا ياخذ رايك في موضوع .. ومن الصبح اقوله يقولي عنه ... ومب طايع
عمر: ههههه يالله قول يا سعيد عسب تبرّد فواد مروان ..
مروان: هيه والله ابا اعرف .....
سعيد: قررنا يكون العرس نهاية 5
مروان: مب جنّه بسرعه
سعيد: لا ... ظنكم بسرعه ؟ هي يناسبها
عمر: هو كيفكم بسرعه مب بسرعه .... وكيفكم كيف بتزهبون لكن ...
سعيد: شوه ؟
عمر: عمران ثانوية عامة ... نسيت ؟
مروان: اوه صدق ناسي ان عمران ثانوية عامة ....
سعيد: انا ما نسيت
عمر : ما نسيت وبتسوي عرسك نهاية 5 ؟
مروان: بتكون بداية امتحانات عمران ..
سعيد: عمران ريّال ... شوه يبا به العرس ؟ بعدين انا اللي بعرّس

سكت عمر ... شوه بيرد ع اخوه يوم يرد عليه بهالطريقة ؟ .... لكن مروان رمس ....

مروان: سعيد ... انته كيف يعني بتستانس وبتسوي وعمران ثانوية عامة ؟ كيف بنفرح وعمران ثانوية عامه ... البيت بيرتبش اكيد .. ونحن لازم نهيّأ له الجو المناسب للمذاكرة ... وبعدين لا تنسى عمران اخوك ... من حقه يفرح باول اخو بيعرس بيننا ...

صخ سعيد ...

مروان : والله هذا رايي يعني .. ( ومسك الجهاز وتم يجلب فالقنوات ) .. وانته وحرمتك كيفكم ..

نش سعيد من مكانه وسار فوق ...


عمر: مروان كنت تقدر تقول له هذا كله بس بأسلوب اخف
مروان: تدري شوه .. انصدمت يوم رد عليك هالرد ( وابتسم ) ... انا هالأسلوب ظهر مني ليش انه رد علينا جيه .. مب لان العرس ما يناسب ... لكن بعد لو تفكر فيها عمر .. نحن بنتم نحاتي عمران وكيف حالته بتكون ... حتى لو تحط في بالك انه عادي عنده .. وانه ما يهتم وايد ... بس في شي في قلبه ... بيقوله .... كيف اخوك ما فكّر فيك .... وبيتغاضى عن كونه ولد او بنت ما يهمه العرس !

ابتسم عمر ... وتم يطالع مروان واي قناة بيحط ...


سعيد: انزين ابا ارمسج عن موعد العرس ...
بدور: خلّصنا منه
سعيد: لا اصبري .. بغيّر اليوم
بدور: ليكون بتجدمه ؟
سعيد: لا .. بأخره
بدور: وليش ان شاء الله ؟
سعيد: عمران اخويه بيبدأ امتحاناته شهر 5 وفي سته بيخلص .. كيف انا عرّس في هالفترة !
بدور: سعيد رمسنا في هالسالفه .. وقلنا عمران ريال ما يهمه عرس الحريم ! ... وهو اللي بيعرس والا انته
سعيد: حتى ولو
بدور: شوه حتى ولو ؟
سعيد: بدور فهميني ... انا قلت لج ... انا عندي اول شي اخواني ... عندي 5 اخوان بهتم بـ مشاعر كل واحد فيهم قبل ما اعرس وعقب ما اعرس بعد ..
بدور: وانا ؟
سعيد: انا ما قلت عنج انتي شي ... لكن ... لو تفكرين فيها .. بيتنا بيكون ربشه .. وسيرات وييات .. وشغل وجيه .... الجو ما بيكون مناسب لـ عمران انه يذاكر
بدور: اللي يقول عاد اخوك بيذاكر ....
سعيد: بيذاكر والا ! .. كيفه ... لكن انا ما بسوي شي يخلي في قلبه شي عليه ...
بدور: انزين واذا بتأجله متى بتخليه ؟
سعيد: نهاية سته وبداية سبعة
بدور: سعيد !
سعيد: شوه ؟ مب وايد بعيد .. شهر اخرناه
بدور: انته تدري لو فهد عرف اني اجلته أكثر شوه بيسوي ! انا ما ابا احرج نفسي معاه .. سعيد نحن ما عندنا هالكثر تأخير !
سعيد: مثل ما فهد اخوج ... عمران اخويه ...
بدور: افففف
سعيد: يالله عاد اقل عن شهر بعد ... وفهد انا برمسه جان تبين ... ع قولتج ما تبين تحرجين عمرج وياه
بدور: لا خلاص ... انا روحي برمسه .. وبقوله ..
سعيد: يعني موافقة
بدور: شوه نسوي بعد
سعيد: لا .. شكلج مب راضيه .. انا ما احب اسوي شي وفي شخص مب راضي عليه
بدور: يوم تعرف اني مب راضيه جيه تسويه ؟
سعيد: بدوووووور يالله عاد .. والله انزين شسوي ... مهما يكون اخويه
بدرو: انزين خلاص قلنا لك
سعيد: من قلبج ......
بدور: هيه ...
سعيد ( ابتسم ): انزين شوه تسوين الحين ؟
بدور: ما شي .. كنت برقد
سعيد: عيل تصبحين ع خير
بدور: وانته شوه تسوي ؟
سعيد: كنت يالس تحت ويا اخواني مروان وعمر .. وصعدت ارمسج
بدور: اها ......
سعيد: يالله عيل ما بطوّل عليج .. تصبحين ع خير
بدور: وانته من اهله .. بسك سهر انته بعد .. وسر ارقد
سعيد: ههههه ان شاء الله .. فمان الله ...


اليوم الثاني .....

آمنة يالسه روحها في قسمها فوق ...

سمعت صوت التيلفون يرن ... سارت وردت ...

آمنة: هلا امايه
عذيجة: شحالج ؟ شخبارج ؟
آمنة: الحمدلله .. انتوا شحالكم ؟
عذيجة: الحمدلله بخير .... احمد سار الدوام ؟
آمنة: افففففف لا تتخبرين يا امايه والله كل فاديييي
عذيجة: جيه عاد ؟
آمنة: تدري به احمد وع قولته بقدم استقالتيه ... واليوم يالله بالغصب لين نش ... وعقب تم يحن ع راسي اونه انتي تعبانه فـ انا ما بداوم
عذيجة: ويه فدييييته .. وانتي ليكون صدق تعبانه ؟
آمنة: لا امايه لا تعبانه ولا شي ....
عذيجة: آمنة مب عليه .. ادري بج ما تقولين انج تعبانه لين تطيحين
آمنة: ههههه لا امايه والله ما فيني شي هذا احمد يخرّف
عذيجة: انزين عيل بخليج الحين ... بتصل في سلامة اتخبرها عن حالها
آمنة: غريبة ما يتكم الصبح ؟
عذيجة: لا ما يتنا .. بس الا ريلها يا تريّق ويايه وسار
آمنة: هيييييه .. خلاص عيل .. بسير انا اكمّل رقادي ..
عذيجة: سيري .. واذا بغيتي أي شي اتصلي بي ..
آمنة: ان شاء الله .. فمان الله
عذيجة: الله يحفظج حبيبتيه ..


دخلت آمنة بترقد ..... عقب ما بندت عن امها .... وعقب ما احمد طلع روحها لين سار الدوام ... تقولون ياهل ويقولون له سير المدرسة ..... !

رن مبايلها ......

آمنة: الو
احمد: امون
آمنة: شوه ؟
احمد: ملل
آمنة: احمد صل ع النبي توك ساير الدوام
احمد: ههههههه اللهم صلي وسلم عليه .... تعالي بس لو تيين تشوفين الملفات اللي عندي .. متى بخلصهن ؟ ما ادري !
آمنة: هذا دواه اللي يأجّل
احمد: تدرين بي اني ما أأجّل شغلي لو شوه يستوي .. صح اني وايد ارمس واقول ما بداوم لكن شغلي ما يتأجل صح ؟
آمنة ( ابتسمت ): صح .....
احمد: ايواااا جيه كوني صادقه
آمنة: احلف عاد !
احمد: هههه انزين
آمنة: خير ؟
احمد: شوفي السده الثانية فالكبت ... بتشوفين اوراق ..
آمنة: اوراق شوه ؟
احمد: اوراق مكتوب عليها اسم عيسى اخويه
آمنة: انزين
احمد: ظهريها الله يخليج واتصلي تحت خل حد يصعد ويوديهن له
آمنة: عيسى تحت ؟
احمد: هيه ... يتريا الاوراق
آمنة: انزين عيل ....

بندت آمنة عن احمد ... وسارت دوّرت الاوراق طبعا السده فوق تحت احمد جالبنها .... هالسده بس اللي آمنة معطيه تصريح حق احمد ان يسوي فيها كل هالخربطان .. اوراق واقلام واغراض وووو ... فتحتها وياها اكتئاب .... ادوّر في هذا كله !


بس الحمدلله الورقه كانت فوق .. وبسهولة حصلتها .....

اتصلت تحت محد رد عليها وتمت تتصل وتتصل محد يرد .... واتصلت فالمطبخ عسب حد من الخدم يرد ... لكن لا حياة لمن تنادي .....

ظهرت برع يمكن حد من الخدم ياي فوق ينظف لكن ما في حد ! ..... وين ساروا ؟!


ردت اتصلت في احمد ...

آمنة: احمد محد يرد عليه
احمد: وينهم ؟
آمنة: شدراني .... اتصلت تحت ما في حد يرد عليه .. واتصلت المطبخ محد يرد !
احمد: عيسى يالس يتريا تحت
آمنة: انا شسوي ؟
احمد: نزلي عطيه الارواق
آمنة: شوووووووه ؟ انا روحي انزل تحت .... وعيسى روحه يالس تحت .. واعطيه الاوراق ؟
احمد: شوه فيها ؟
آمنة: لا آسفه
احمد: امون يالله عاد جيه عيسى شوه بيسوي بج
آمنة: احمد تعرفني اني استحي .. ما اقدر
احمد: ترا بقوله يصعد هو فوق
آمنة: يالسخييييييف بايخ ... عن الحركات
احمد: هههه شسوي بج يالله نزلي حرام والله يتريا الاوراق
آمنة: افففففف
احمد: يالله امونه .. نزلي
آمنة: ما يقدر يتريا لين ما انته تيي ؟
احمد: الحين يباهن الصبح انا برد الظهر .....
آمنة: والله انك يا احمد ........ هالحركة تدري بي انقهر منها وتسويها
أحمد: مب بايدي والله مب بايدي .. تبيني ايي البيت يعني واصعد فوق وانزل الاوراق حق عيسى وعقب ارد الدوام .... وين استوت ؟
آمنة: انزين خلاص ..... بنزل اعطيه الاوراق ... وامري لله
احمد: عقب اتصلي عسب اطمن ما متّي هههههه
آمنة: ما يظحك سخيف انزين
أحمد: هههه ما عليه مقبولة منج .... يالله سيري

بندت آمنة عن احمد و شلّت الاوراق ونزلت تحت .... شافت عيسى يالس .. وعيسى روحه يوم يشوفها يستحي .. لان يدري بها حرمة اخوه تستحي منه ... وما تنزل جدامه هو واخوانه الا لو احمد كان يالس .... تكون عاديه اما لو هو مب هني تستحي ...

آمنة: تفضل الاوراق
عيسى: شكراً ..

وشل الاوراق وع طول ظهر .... وردت هي صعدت فوق ...

رن مبايلها ...

احمد: ها شوه استوى ؟
آمنة: يعني شوه استوى ؟
احمد: عطيتيه الاوراق ؟
آمنة: هيه
احمد: وشوه تسوين الحين ؟
آمنة: شوه اسوي يعني ؟ ابا ارقد
احمد: حلفيييي .. حرااااام
آمنة: شوه ؟
احمد: فيني رقاد هههههه
آمنة: هههه انته والله متفيج يالله يالله بند
احمد: مع السلامه
آمنة: فمان الله ....


جربت الامتحانات ...... وصدق بس لعب !

عمر ضاغط ع عمران .... كان وايد مخلنه ع راحته الفترة اللي طافت ... صح انه كان يذاكر لكن كان يطلع بعد ! ...... وعمر كان مخلنه ع راحته


مروان واقف جدّام التسريحة ..... و يعدّل سفرته ....... وعمران ماسك الكتاب في ايد والمبايل في ايد .....

عمران: بتظهر ؟
مروان: هيه
عمران: ويا منوه ؟
مروان: ويا هزاع طبعاً
عمران: وهو انته عندك غيره !
مروان: ذاكر انته ذاكر وخل المبايل ع صوب ....
عمران: هذا احمد
مروان: احمد والا غيره .. هذا احمد بعد ما وراه مذاكرة .....
عمران: خلّص
مروان: هيييييييه خلص .... وهو ولا يعرف ولا حرف من الكتاب


وسمعوا صوت الباب ...... انفتح ..

مروان: تعال تعال الله يخليك جابل اخوك اللي ما يذاكر
راشد: عمران ما خلصت ؟
مروان: وين بيخلص وهو مجابل احمدو ماله
عمران: حتى المبايل وربعي يبون يمنعوني منهم
راشد: ما نمنعك بس ذاكر
مروان: انصحه انصحه ... خل اييب نسبه ويدرس في مكان محترم والا مصيره بيكون فالجبال ويا القروب الجهادي
راشد: عمران بلى الخربطان اللي تسويه
عمران: هذا يقص علييييييييك والله
مروان ( وهو طالع ) : اوكيه انا اقص عليك ....... خلاص راشد لا تصدق ...... يالله جااااو

نزل مروان تحت .... شاف عمر يالس وعبدالعزيز منسدح وحاط راسه ع ريل عمر .....

مروان: ما شاء الله جو رومانسي
عبدالعزيز ( وهو حاط ريل ع ريل ) : وين بتسير ؟
مروان: عشتوووووووو ...... حرمتيه وانا ما ادري!
عبدالعزيز: ههااااااي حلوة
عمر :وين بتسير؟
مروان: يا الللللللله وانا اقول عزوز ظاهر ع منوه
عبدالعزيز: مب كان احسن تجاوبني انا
مروان: لا ما كان احسن
عبدالعزيز: عيل يالله جاوب عمّور
مروان: بظهر ويا هزاع ..... شي يديد
عبدالعزيز: لا جديم وبايخ
مروان: احسن لان محد طلب رايك
عمر: لا اله الا الله بلاكم انتوا اليوم ؟
مروان: والله قول حق اللي منسدح وحاط راسه ع ريلك ... وحاط ريل ع ريل
عبدالعزيز: عمر يحبني ..... وبعدين انا ما قلت شي غلط
عمر ( ظرب عبدالعزيز بالخفيف ع راسه ) : بس اسكت انته
مروان: ههااااااااي دليل الحب
عبدالعزيز: عادي ما يعور ......
مروان: سر سر حلّق الله يخليك ...... قص هالشعر ...
عبدالعزيز: تغاااااااار
مروان: من ؟
عبدالعزيز: شعري
مروان: من زينه .....
عمر: عبدالعزيز هالمرة يوم بتسير قصره زيادة
عبدالعزيز: ليييييش؟ جيه احلى
عمر: وايد طويل !
عبدالعزيز: ما اباه قصير انته تباني اقصه فوق الاذن ..... انا بقصه لين تحت اذني ... وبطلوه من ورا الله يخليك
عمر: سو اللي تباه
عبدالعزيز: حبيبي والله اخويه ادري بك ...... يعيبك شكلي الحلو ...... لاني اشبهك
عمر: هههههه بس اسكت يالواثق ... وقم عني بسير اشوف عمران
عبدالعزيز: لا والله ؟ وجيه ان شاء الله ؟ هو صغير ؟
عمر: بسير اشوفه يبا شي ما شيات
عبدالعزيز: ليش بشكار انته عنده ؟
عمر: يا سلام !
عبدالعزيز: والله ما نشيت انزين
عمر: احلف انته بس !
عبدالعزيز: والله حلفت ......
عمر: عبدالعزيز قم
عبدالعزيز: والله حلفت اني ما انش ...... واشوفك تقومني غصب عن ريلك ..... بزعل وبتشوف بعد
عمر: شوه هالغيره شوه هالحقد !
عبدالعزيز: مب حقد بس وايد ادلعهم هالايام ...... وخاصة عمران ...
عمر: انزين هو ثانوية عامة ...... انته الا اجازة ..... تطلع وتدخل ع كيفك بعد
عبدالعزيز: كيفكم والله ... حتى طلعت الثاني ولا قلت لي ولا سويت أي شي
عمر: طلعت الثاني مب الاول ... مستواك مثل ما هو ما تحسّن
عبدالعزيز: اوكيه احسن من ولا شي
عمر: بعد تهدد !
عبدالعزيز: والله كيفك انا قلت لك ... ما بخوز يعني ما بخووووووووز


دخل فريد نفس الوقت ... وهو شال صينية العشا مالت عمران .....

عبدالعزيز: هذو فريد بيودي العشا
فريد: انته شوه فيك ؟ليش وايد ترمس ؟
عبدالعزيز: ما فيني شي ....
فريد: انته تزعل عمر ؟
عبدالعزيز: انااااااا ؟ انا ما زعلته والله هو اللي مزعلني
فريد: انا ما اصدقك انته ......
عبدالعزيز: شكراً استاذ فريد ع التدخل
عمر: هههههههه فريد ود العشا فوق حق عمران وشوفه جان يبا شي ...


هند في محاولة اقناع لأمها انها تسير الجامعة ... لكن !!

هند: انزين بسير ... بسجل
جواهر: وابوج ؟
هند: ابويه ما بيدري
جواهر: اتخبلتي انتي !
هند: الله يخليج امايه مب حالة ... يعني نسبتي عالية .. ومدرسة خاصة .. ابا اكمل دراستيه
جواهر: قالج ابوج تبين في أي دولة برع سيري ... بس فالبلاد !
هند: انزين انا ما ابا برع ... برع في وين مثلاً ؟
جواهر: قالج عند عمج ... في كندا ...
هند: اوهوووووو كل ما قلت لكم قلتوا عند عمي ... مستحيل ...
جواهر: كيفج عيل
هند: انزين انتي قولي له ...
جواهر: والله هو بيي وقولي له ...

نفس الوقت دخل بدر ...

بدر: هااااااي
جواهر: اهلا ...
بدر: شوه فيكم ؟
هند: ما فينا شي
جواهر: قولي حق بدر يمكن يقنع ابوج
بدر: شوه السالفه
هند: بدر ما بيقوله
بدر: انزين قولي يمكن اقدر اساعد
جواهر: تباك تقول حق ابوك انها تدرس فالجامعة
بدر: درسي منوه ميودنج ؟
جواهر: تبا هني ... مب برع ... وابوك مستحيل يوافق ...
بدر: هنووووووود والله انج متفيجه ... يا بابا درسي برع وفكي عمرج ...
هند: ما ابا برع .. ربيعاتي كلهن هني ...
بدر: ربيعاتج بيكرفن كراف ... وبيدرسن ... وبيخلصن .... وعقب شهاداتهن تعتبر ولا شــــي ..
هند: انزين عادي ثرني يالسه في البيت .. و يلستيه ما منها فايدة ... بسير الجامعة .. وبدرس روحي وبعد نفس الحالة بتكون شهادتيه ع قولتكم ولا شي .. انا راضيه
بدر: والله تبين سيري قنعي ابوج روحج ... لاني انا بعد ما اباج تدرسين هني


ونش بدر سار فوق ...

هند: افففففف يقهر يقهر يقهر ... اول مره اشوف اخو يقول حق اخته لا درسي برع ... غيرك يتمنى اخته تقول ما ابا ادرس برع ... اففف
جواهر: ابوج ويعرف مستقبلج وين بيكون احسن ...
هند: والحين شوه كان مصيري ؟ يالسه فالبيت ...
جواهر: يبا يستانس فيج ويفتخر فيج يوم بتدرسين برع
هند: خل يفتخر في بدر اللي درس في امريكا ... خلاص ... مب مهم انا يفتخر فيني ...


سكتت جواهر عن بنتها ولا ردت عليها ... لانها تدري لو كملت وياها ... هند بتفتح سوالف وسوالف وانتوا وانتوا وانتوا ... وبدر وبدر وبدر ... فـ تسكت احسن ...



يتبع ..

تحياتي

بنوتة بوظبي