بما اني من أهل البحر " الحضر " وعشاقه .. أهوى أهل البر " البدو " بلا شك .. وأعتبرهم نصفي الثاني ..

وأقول:-

أقرب تقهوى من دلالي
بعطيك منهـا شـرب فـنـجال

أبغيك يا زين الخصالي
بمشي معك في كل الأحوال

في برّكم فوق الرمالـي
أو فـالـبـحر نـتـرزق الـحـال

أبغيك تصفالي حلالـي
امــحــال ولا أرقــب مــجـال

 

ضقت في يوم من زود لهموم ..

وقلت:-

يا خوي مليت هم ٍ بين ضلعيني
والهم كافر يشل القلب بجروحه

لا تخدعك بسمتي قدّام مغليني
تضحك شفاتي لكن في داخلي صوحه

 

نشدني شخص من فتره إن كنت احضري ولا ابدوي ..

وكان جوابي:-

احضري من ريلي لراسي
والحضر عزّي ومندوسي

والبحر لي عشق ٍ وباسي
انخلق فالنفس مغروسي

واعرفه غدار ٍ وقاسي
لكن امن الخير متروسي

وان تعب به كلّ غطـّاسي
واجب ايكافيه بفلوسي

 

أبيات في أغلى ما يكون .. الوطن الحبيب

باتت ميادين الشعر وقّاده
كل ٍ يمثل لابته واجداده

وبكل فخر آنا أمثل داري
دار النشاما والفحول القاده

دار الإمارات وعسى يحفظها
ربّي عن اطماع العدو واحقاده

دار ٍ تعانق في ثراها زايد
ورجال من فوق الثرى سداده

ماقول تسوى ارواحنا لا والله
لكن تسوى ارواحنا وزياده

 

من أرشيف صيف 2007 ..

أمشي وادور عن براد ٍ م لهبوب
مليت جو البيت مع المكيف

يالين شفت الجو حر ٍ ولاهوب
بعده نويت أشرد وأسافر وأصيـّف

 

أساء الظن بي شخص فالسابق .. وللأسف حلف .. وكأنه متأكد ..

وقلت له:

كـفــّر ترى ظنـك فالكتـاب مكتـوب
كانك تخاف الله وحكمـه وشرعـه

ويقال بعض الظن كالإثم محسـوب
والآدمي يحكم ترى بعين طبعه

 

همسة .. بعنوان .. قالت وقلت ..



قالت تفضل قول ياللي تودّه
قلت العفو ماقصد ولاهو بودّي

قالت تدلل وأبشر بدون ردّه
قلت الصراحة ماتوقعت ردّي

قالت قصيد ٍ في عيونك وعدّه
قلت القصيد اللي بها ما يُعدّي

قالت كلام ٍ عندك ومنت قدّه
قلت الكلام ميمع ٍ ما يسدّي

قالت إذا انك تستحي منه بدّه
قلت الحيا لولاه بيحت سدّي