.. شمــــــــس صــيف .. وزخــــة مطــــــــــــر ..


قصه اجتماعيه
تدور حول..

علاقات عائليه متدهوره .. عدم ثقه .. عدم امان ..
حب عاصف.. وحب مدفون ..
احوال اجتماعيه متفرقه ..

هند وقصتها الكبيره مع ولد عمها سيف ..

سيف وعيونه الي تلوم هند باستمرار ..

عنود وعذبه وخالد وفاهم .. ومفترق طرق ..!!

بو هند وبو سيف .. ومراهقه متأخره ..

الزوجه وصراع الزوج اللاهث وراء المتعه ..موقف وتضحيه !!

في النصف الاخر يوجد هنالك امان.. هدوء .. استقرار ورمال حارقه !!
ووجوه تشع بالرضى والموده .. وتنبعث منها رائحة الاصاله.. والصدق والنقاء

الخال وعائلته البسيطه في تعاملها .. الكبيره بقلوبها

غيث وعيون يسكنها الصمت.. ومشاعر يدفنها تحت الرمال ويحرص على كتمان سرها

ورعب ونفور في نفس هند اتجاهه

هل سيكون لحرارة شمس الباديه اثر في حياة عائله تكاد تخنقها اساليب الحياه الخاطئه
وهل ستنقشع في يوم .. ضبابة الغرور
وتنجلي.. لتكشف عن روعة احساس مجهول
يعيد الاستقرار.. للنفوس الحائره ..!!؟؟
ويكون اول الغيث قطره ..

في.. شمـــــس صيــــــف .. وزخـــة مطــــــر ..












***********
علام تدفــــــــــن ماضي العمر كفاك !!
نسيتني امـــــــــ غرور النفس اغراك

مرت شــــــــــهور ولم تحفل بفرقتنا
وما الفــــــــــت لقلبي حين ناداك

قد كنــــــــت افضي لكم حزني لتدفنه
فمن سيـــــــــــدفن احزاني بذكراك !!

استرجع الامـــــــــــس بالذكرى لينسيني
مرارة اليــــــــــــوم من يا امس حلاك !!

اني لاســــــــــأل قلب قد عهدت به
من المحـــــــــــبة من يا قلب قساك..؟

ما كنت بالامــــــــــس تقوى ان تفارقني
يوما .. فمـــــــــن بعد هذا البعد قواك ؟!!

قررت يـــــــا صاحي ان انساك مبتعدا
فصبر على البــــــــعد واستحمل خطاياك

نعم سأنســــــــــــاك لكن بعد معجزة
نعـــــم سأنساك
اذا نســـــــيت فوأدي ســــــــوف انساك
*************


البدايـــــــــة
بو هند في غرفته مع ام هند .. بعد ماجهز ورتب نفسه.. وحطت له ام هند اغراضه في الشنطه ..وصاها عـلى العيال وهو يعدل سفرته مستعيل
ام هند : لاتحاتي شي يابو هند .. هالله هالله فـي عمرك ولاتقطعنا بالتلفون
بو هند : ان شاء الله .. من اوصل سوريا بدقلكم وجاني ابطيت عليكم لا تستهمين بنخلص اشغالنا وكشتاتنا ورادين
مد بو هند ايده بظرف وعطاه لام هند ..
بو هند : جان قصركم شي سحبوا من البنك وهذي البطاقه عندج .. وخلي هند تسحبلج
ام هند : ماعليه .. لفلوس في الخزنه وما علينا قصيره لين ترد بالسلامه
ما كانت هذي اول سفرات بو هند لسوريا
بو هند متعود كل فتره والثانيه يطلع مع ربعه واخوه بو سيف مثل هالسفرات
على قولتهم .. اشغال وكشتات !!
نزل بو هند الصاله بيوادع عياله.. الي يلقاهم طبعا .. والي مايلقاهم مايتعب عمره بالسوأل عنهم ..
مجرد توصيه لام هند .." انتبهي لعيالج وعن يهيتون "
العنود واقفه تحت تتريا ابوها ينزل وامها وراه.. ووراهم الخدامه تنزل الشنطه
عنود : ابويا الحين بتسافر ..؟
بو هند : هيه بنتي .. عمج وربعه يتريوني في السياره خاري
عنود : الله يحفظك يابويا .. ونتريا تلفونك
مشا بو هند للباب وعيون ام هند والعنود ترقبه.. اشر الهن بيده يودع وظهر
هاللحظه سئلت عنود امها السوأل الي ماكل حال ام هند وحارق قلبها من فتره
عنود : امايا .. ليش ابويا دوم يسافر سوريا .. شو هالشغله الي هناك وماخذتنه عنا هالكثر ؟
ماعرفت ام هند شو ترد عبنتها .. ولكن حاولت تعطي بو هند بعض الاعذار
ام هند : ابوج عنده شغل اهناك .. ولولا شغله ومراكضه مابنقدر نعيش ولا بيقدر يعيشكن.. كل الرياييل جي لاتتحسبين الا ابوج جي
طالعت عنود امها بحيره وفكرة بربيعاتها واهلهن ..
عنود مب ياهل .. بنت في الصف الثاني ثنوي تعتبر كبيره وفاهمه .. وما يقنعها هالتبرير ولا يدش عقلها
عنود : انزين امي شو هالشغل الي في سوريا .. مثل شو يعني ؟
ام هند وهي محتاره : شدراني انا بالشغل .. ابوج يقول شغل .. ومنيه كشته
عنود : امي بصراحه ..يمكن ان ابويا عنده اشغال .. بس بالعقل.. ريال راعي حلال ورجاب وشغله في البلديه.. وماعنده مشاريع خاصه يرابع عشانهن .. شو الشغله الي تطلعله في سوريا ..!! وكل شهر والثاني رايحلها ؟!
ام هند ماعجبها كلام العنود ومااستساغته ولا بغت ترد عليها ..
ام هند : فكي عمرج انتي من هالسوالف وفكيني .. وسيري ذاكريلج كلمتين للامتحان
عنود : حاضر امي ..بس عاد انتي انتبهي لريلج ..ما وصيج.. وعن تفجينه جي ماتعرفين شو يسوي من وراج .. هالسيرات انا مب مطمنه الهن صراحه .. وانا الحين حذرتج ونبهتج انتي عاد كيفج هههههه
فجة ام هند عيونها في بنتها.. شو دراها عنود بهالامور.. لا يكون تعرف شي والا سمعت بشي وانا ما اعرفه !!؟
حست عنود ان امها بتعصب عليها ..و يمكن امها ماتتقبل مزاحها.. ونتيجه لذلك تفرها بتلفونها الي بيدها او بالمزهريه الي على الطاوله.. فنشت تبى تشرد قبل لا يصير شي من هذا
راحت عنود وخلت وراها كلامها يدور في فكر امها ..
وبعد ما تخلصت ام هند من صدمة هالافكار العنوديه .. قالت لنفسها " هذا كلام بنت ياهل ماتعرف شي .. شله انا افكر فيه واهتمبه .. الله يسجيج يا عنود دورتي بمخي "
بعد ما طلعت عنود فوق ..دقت الباب على هند ودشت .. هند الي كانت رايحه في سابع نومه
هند وهي تبطل عيونها بكسل : عنــــــــود شو تبين موعيتني ..؟
عنود : قومي بسج رقاد اذن العصر وداخلين على المغرب .. وابوج سافر وانتي نايمه ولا على بالج حتى تنشين توادعينه ..َ!!
هند : اذا على سفرة الوالد .. شو الجديد ؟ تراها مب اول ولا اخر سفراته
وبعدين انا مصليه العصر قبل ماانام
عنود : انزين نشي احس اني ضايقه وابى حد اتكلم وياه
هند : عنود انا راده من الجامعه تعبانه .. الله يخليج وقت ثاني .. سيري تكلمي ويا سلامي ولا شموس
عنود : وهيلا اشعرفهن .. تلقينهن الحين يلعبن سوني والا يحلن واجباتهن
"سلامه وشمسه .. الاولى في اول اعدادي والثانيه في خامس ابتدائي"
هند ترفع عيونها وتفكر : ومطور ومحمد وين ؟
عنود : يالله عاد هند .. شو تبيني اسولف ويا هيلا لمقلع .. وبعدين هيلا اصلا ان يلسوا في البيت وشفناهم زين
" مطر ومحمد .. اصغر عن هند .. مطر في الجامعه وعمره 20 .. ومحمد سنه اولى جامعه ..18 "
هند : والمطلوب الحين ؟
عنود برقه وحيله: قومي تسبحي وتلبسي وخلينا نسير عند بنات عمي ضاحي
هند بعصبيه : والله انج متفيقه .. عنود لو سمحتي هكو الدرب.. وان ما طلعتي الحين بالزين وخليتني انام .. بطلعج من اهنيه بعاهه مستديمه
نشت عنود واقفه برعب
عنود : قل اعوذ برب الفلق .. نامي نامي الشيخه هند .. والله مايسوى عليه
هند بعصبيه بعد ما فقدة صبرها
هند : عنوووووووود
من عقبها ماسمعت هند الا صوت كرخة الباب ورا عنود الي صمخة اذنيها.. وبضيقه عقت نفسها على السرير وهي تحس ان راحتها راحت بمجرد ما ارتفع ضغطها بالصراخ على عنود

&&&&&&

بعد المغرب نزلت هند وشافت امها واخوانها يالسين
هند : مسا الخير
الجميع : مسا النور
ام هند : زين يوم نزلتي الحين .. قبضي شموس درسيها من الصبح يالسه بمعياه ويا عنود
هند : اكيد .. من مته عنود اصلا الها بارض تدرس خواتها ..!!
عنود : والله عاد انا مافيه ادرس وحده غبيه .. لو سلامي عادي بدرسها
هند : ايه .. احترمي اختج ولا تسمينها الغبيه .. والله هالكلام بيأثر على البنت كثر ماتكررينه دوم جدامها
شموس وهي تتبزا والصيحه واقفه فـحلجها : انا مب غبيه .. هذي انتي الغبيه ماتعرفين تدرسين .. وبعدين انا مااباج تدرسيني
ام هند : انزين برايها عنود جان ماتبى تدرس ختها.. وشموس ترتاح لج انتي يا هند وضاريه عليج اكثر
هند : زين امايا بدرسها .. عادي بس عاد انتي خفي هالبزا عن عنود .. خلها تقبضها مره وحده بس تدرسها بدون ما تزاعج عليها وتضربها
عنود متمسكنه : حرام عليج والله مااضربها بس يوم تقهرني .. وبعدين انا لو بدرسها احس اني يالسه ادرس عمري هيه ماتستفيد شي
هند : لان انتي ماعندج صبر .. ومب من خاطرج تدرسينها
عنود تتصنع البرأه : خلاص عاد هند .. تعرفوني عاد انتوا .. انا مااحب ادرس الا ... الاغبياء
" قالتها والضحكه تضهر من عيونها قبل ثمها "
رفست شمسه الكتب الي عند اريولها وانجلبت على بطنها وحطة راسها بين يديها على الارض وتمت تصيح بدلع وزعلانه
يلسن عنود وسلامه يضحكن .. وسارت هند عند شمسه بتراضيها
ام هند : عنـــــود اسميج وذاا .. ماترومين تزخين لسانج شوي .. خلي البنت بتدرس
هند : بس شماسي حبيبي.. خلي عنود الغبيه اهنيه.. وتعالي بنسير ندرس.. يالله بطرشلج باسكن روبن ومابنطرشلها .. وبنطلب عشا من برا بعد.. يالله حبيبي
بهالكلام رضت شموس بسرعه ورفعت راسها تمسح دموعها
شمسه : بنطرش بيتزا ؟
هند : ههههههه هيه بنطرش
عنود تغايض شموس : ونحن بنطرش ماكدونالد هممممم وبنطلب باسكن قبلكن.. ومن ايون بنربع وبنشل الاكل مالكم وبنااكله كله عنكم ههههههه
شموس : ها ها ماترومين .. انا بسير مع هند ندرس برا وبنترياهم
سلامه : حشه ياللحفه .. انزين انا طرشولي انا معاكم
عنود : ههههههه شموس بخليهم ايوم من الباب الوراني هاهاها
هند بشده : بس عاد عنود عن لمغايض
مسكت هند ايد شموس وشلت كتبها وراحن برا في الحوش بييلسن وشموس تخز عنود بنظرات العداء
عنود : ملل .. سلامي قومي بنحط فلم ونطالع
سلامه متحمسه : اوكي يالله
ام هند : عنود درستي اليوم ؟
عنود بلا مبالاه : ماعليه شي .. واجب تاريخ برايه يولي
ام هند : يالله يالله سيري درسي وعن الكسل .. والظهر تقولين عليج امتحان عربي وين الي عليهم امتحان ؟
عنود : عادي امي سهل .. وبنغش المعلمه طيبه وايد .. ماتقول شي
ام هند : اسميج مابتفلحين على هالحاله .. الله يهديج.. يالله جدامي اشوف.. ماتطلعين من حجرتج الا عقب ماتخلصين دراسه

&&&&&

في الطرف الثاني .. وفي الصوب الجنوبي من بيت بو هند .. كان بيت شبيه لبيت بو هند " سعيد " .. كان بيت بو سيف " ضاحي " اخو بو هند الاكبر
صوت اليده تعيبه كان يطلع من سور البيت ويدخل في البيت الي حذاله " بيت سعيد "
وهند واختها شمسه يسمعنه من مكانهن ويضحكن
هند : شكلها يدوه تواجع البشاكير .. اسمعها محتشره ههههههههه
شموس : يمكن يايه صوبنا اسمع صوتها قريب
هند : يمكن .. يالله انتي خلينا نكمل دراسه

&&&&&

اليده تعيبه دشت من الباب الجانبي للفله ودخلت بيت ولدها سعيد وشافت البنات يالسات خاري
اليده من بعيد : منو هيلااا ..؟ هندوه والا عنود؟
نشت هند وشموس من سمعنها ترمسهن وسارن صوبها
هند وايهت يدتها وشموس بعد
هند : انا هند يدوه .. شحالج اليوم ؟
اليده : بخير بنتي .. وين امج ؟ هالطباخ جتل الصرم مايسقيهن .. وعطشهن .. خلي امج الحين تخبر البيدار حمود ايي من المزرعه اباه
هند : ان شاء الله يدوه .. تعالي يلسي بزقرلج اماه الحين
وبدون ماتزقرها .. ام هند سمعت صوت اليده وظهرت تسلم عليها وتشوف شو بلاها
ام هند : يا مرحبا .. ها عمتيه خير اسمع الحسوس مشتله
اليده : شمسيتوا ؟
وايهة ام هند اليده وحاولتها
اليده : ماياكم خبر عن الربع ؟ " تقصد عيالها سعيد وضاحي "
ام هند : لا عمتيه .. هبابهم .. طيارتهم طايره الساعه ست والحين ثمان ويبالهم ساعه وبيوصلون ان شاء الله ويدقولنا
اليده : هيييه على خير ان شاء الله .. تعالي الحين انتي اباج .. برويج الصرم الي مات.. ونبى نشوفله طريقه .. وابى حمود البيدار باجر ايي بنقص اعيال النخل الينوبي وبنزرعهن وبنقص الصرم الميت و بنحرق روسهن جان فيها فايده بيحين ...
ومشت اليده مع ام هند مع كلامهن سايرات صوب بيت ضاحي بيشوفن النخل ويعابلنه بطريقتهن
في بيت ضاحي حدرت اليده تعيبه وام هند البيت عقب ماطالعن النخل واحتشرن شوي ويا البشكار..
عذبه وخواتها فطيم وولميا يالسات وعندهن احمد وناصر عيال عذبه ..
ام هند : ام احمد اهنيه .. يامرحبا الساع .. مته الوصول؟
عذبه : هلا عموه .. فديتج الا من شوي يايه
فطيم : حشرناها حشره لين مااقنعت ريلها وييت .. حشه زاخ فيها زخه.. تقول لزقة عنزروت هههههههه والي يشوفه يقول من زود الحب عاد .
اليده تعيبه : وشو حايتكن انت في الحرمه ..؟ شعنه ماتخلنها عند ريلها.. باجر يوم بيصبح معرس عليها .. بتنفعنها انتن وويوهكن ؟
لميا : مب جي عاد يدوه .. لاحول .. ثرها البنت ماخذنها من الشارع يصبح معرس عليها ومحد يدريبه هههههههه
عذبه : لا اله الا الله .. لاتفاولون على ريلي .. بروحه يباله الا هفه ويسويها
ام هند : جيه هوه بعده متنيحس ..؟ عنبوه بس عليه يوم عنده وحده مثلج .. شو بعده يبى
عذبه : اشدراني يا عموه .. ها الرياييل مايترس عينهم الا التراب ..
اليده تعيبه مايازلها في بو احمد.. صح انه ريال قبيلي ومب من اهلهم.. بس هيه تعزه معزه خاصه.. وتذكر ايام اول وربعتهم اللوليه ويا يده سالم.. صديق الطفوله .." ايام الصبا "
اليده : محشوم بو احمد عن سوالفكن هاي .. الا تسون مغيه " مزحه " انتن
فطيم : يالله يايدوه عاد انتي مستويه مثل ام العروسه .. محد يروم يقول شي عن فاهم" ريل عذبه " جدامج
اليده تعيبه مافهمت عـ رمسة فطيم
اليده : هاااا .. شو امه ومنو العروسه ..!! شوبلاها رمسج مخبقه .. امف عليج .. رمسي رمسه عدله والا سكتي
ام هند : ههههههههه يسون سوالف عليج يعلني مااخلى منهن .. عيل وين امكن؟
لميا : امي فوق فحجرتها
اليده : قومي سيري زقريها .. خبريها ان شيخه اهنيه
لميا : ان شاء الله يدوه
سارت لميا تزقر امها ونشت فطيم تقرب بالهوه لعمتها شيخه ويدتها
عذبه : شحال البنات عموه؟
ام هند : بخير ويسرج حالهن.. ماكلمتي ربيعتج " هند " وخبرتيها انج اهنيه؟
عذبه : لا والله ياعموه .. مامداني هذا السير .. الحين بسويلها متولهه عليها والله
عذبه من نفس عمر هند وتعتبر توأم روحها .. بس عذبه عرست على طول عقب الثانويه العامه وماكملة جامعه .. اما هند السنه خريجه وهذي سنتها الرابعه في الجامعه.. وفطيم اصغر عن عذبه وهيه في الجامعه .. ولميا قد عنود ونفس الصف.
ام سيف : مرحبا اساع .. حي من يانا ..
نشت عذبه وسلمت على امها .. وعقب توايهن شيخه وام سيف
ام سيف : متخالفين دوم انتي وابوج ..
عذبه : لا والله .. لا تقولين انه سافر ؟
ام سيف : هيه نعم انه سافر .. ثره يقر هوه في الدار .. جنه مولعين فيه شلق
اليده : يعلكن تسدن عوقه بو السيافي.. شو تبينه انتي بتحرسينه عن يتفري ويفري عن عمره .. والا بترصغينه عدالج وبتطعمينه شرى البعير
ضحكن البنات على يدتهن .. وام سيف اصلا ماتزداد بروحها حارقه اعصابها على ريلها ضاحي .. ومب متحمله النجره ويا عمتها هاللحظه بالذات .. فسكتت
ام هند : اسميج ياعمتيه .. محد قال جي .. بس عاد ها عيالج مصخوها بسيراتهم .. وخلوا العرب ترمس فيهم .. ويا كثر الشايعات الي ظهروها .. الا فلان معرس بسوريه .. وهذاك عنده كمن ولد .. وهذاك يابها بالسر وخشها في بيت اجار.. في ذمج يا عمتي .. مب خايفه انتي على عيالج من هالشي؟
اليده : منو قاله ..!! لا الله لا ارضاها ولا اباها هالرمسه .. اثرها من جي رفوع محتشره ومنتفخه من درت ان ضحيان بيسافر .. لالا عندكن حق .. بس عاد جانه ها الجلام صدق .. تراه منكن .. مارمتن تيودن ريالكن ..
عذبه : امايا صدق هالرمسه ؟
ام سيف : مايندرابها .. تخبري عمتج شيخه ..
ام هند : لالا انا هالرمسه مره مااصدقها .. ولا ادش راسي .. مرفوقين بو هند وبو سيف عن هالسوالف .. مره لاتظن هالظن فيهم ..
عذبه : وهالرمسه الي ظهرت ويرمسوبها العرب ..؟
ام هند : لالا ها الا مغيه .. وها الا من رباعتهم ويحطون عليهم .. سوالف
عذبه : ريحتيني عموه .. والله فديتها امايا ماتستاهل ابويا ياخذ عليها سوريه .. ولا انتي بعد عموه
اليده : عنبوه بناااات عرسوا عليهن .. شقا عيل حريم بعيالهن ونص راسن ابيض
ام سيف : عمتي محد يباها العديله.. لا البنت ..ولا العيوز.. وحيدج يوم بغى يعرس عليج حياة عمي بو ضاحي.. تراج زعلتي وربعتي ادورين خوانج ويلستي شهر زعلانه ماطعتي تردين .. عنبوه الا من عشر والا تسع سنين هالكلام .. قبل مايتوفى عمي بسنه
اليده : وابويا انا .. انا زعلت عليه مب منه .. عنبوه شيبه لحيته بيضا رابع الهند يتعالج ورد يقولي بيرد يعرس وياخذله هنديه تهمزه .. ترضونها انتوا باجر عمومة اعيالكن هنود ؟
ام هند : لا عمتي حشه محد يرضاها .. بس عاد هوه كان يسوي سوالف وانتي صدقتي وربعتي تزعلين هههههه ..
فطيم : يدوه ثرج كنتي رومانسيه وماتقهرين من حياة يدي .. سرعه تزعلين ههههههه
عذبه : يالله يامكر العياييز ههههههه
اليده : عيزوج ان شاء الله في طوي ياعذبوه .. علموج انتي بعد طولة اللسان
ام سيف : شوي شوي عالبنت .. هاي خاطر
عذبه : الله يسامحج يدوه .. عاد امبونه محد ينفعج ويراعيج ويحني كشتج غيري
اليده : يعلج ماعاد تحنينها ازيد .. يامسودة الويه .. مايبتيلي الحنا وانا موصيتنج عليه
عذبه : هههههههههه يبته يدوه.. وحطيته في حجرتج بعد.. على قولتج حطيه في الحجره عن تشوفه امج.. وحطينها ودسيناه عنها هههههه
اليده : هييييييه .. سمعتوه اذن العشا ؟ " حركات تتهرب من الموقف "
ام هند : هيه عمتي .. قومي جان بتصلين ..

&&&&&&&&

بعد صلاة العشا دخلت هند واختها عنود بيت عمها ضاحي .. بيسلمن على عذبه بعد ما كلمتهن وخبرتهن انها في زياره لبيت اهلها
يلسن سوالف في الصاله وعقب طلعن هند وعذبه فوق .. ويلس روحهن عشان يسولفن عراحتهن
هند : كم يوم بتيلسن ؟
عذبه : بيلس اسبوع ان شاء الله .. تدرين الريل مابيسأل عني ولا بيقولي تعالي .. وان قلتله بيي يقولي خبري الدريول اييج
هند : والله انه احسن لج .. مفتكه ..في رياييل مايخلون حريمهم يباتن برا البيت مول.. حي فاهم لو انه بايخ في وايد امور بس هالشي احسن شي فيه ههههههه
عذبه : حرام عليج هند .. انا نفسي فاهم يهتم بي ويحسسني انه مايصبر عني وعن وجودي في البيت
هند : والله انتن يالحريم الواحد يحتار فيكن .. اذا هوه اهتم بهالصوره وماخلاج تسيرين عنه وتباتين بتقولين مغصص عليه وحارمني من اهليه .. واذا خلاج تسيرين وتبطين .. قلتي مايهتمبي وما يحبني
عذبه انسانه رقيقه وايد واهاديه وحساسه .. تحب ريلها وعيالها بجنون.. بس هيه حزينه وتعيسه.. مب لاقيه ريل يحبها ويهتم ابها ويهيم فيها.. ولانها انسانه رومانسيه.. كان الزواج عندها اهم من الدراسه.. ومن تزوجة .. حبة ريلها وكأنه الفارس المنتظر .. بس مالقت منه هالشي متبادل .. وهذا الي مضايقنها
عندها زوج بارد .. قليل المشاعر والاحاسيس هذا اذا ما كان معدم .. شايف نفسه وخقاق .. ودايما يقولها بعرس عليج !!!
يعاملها كخادمه اغلب الاوقات .. مايعتبرها شي مهم في حياته .. والسبب.. انه انسان مخادع وصاحب نزوات وعلاقات حميمه بطرق غير شرعيه .. ومن قبل الزواج .. واستمر الى مابعد الزواج.. وهذا الي كان ماخذ فاهم عن عذبه.. وما كانت عذبه بالنسبه له الا الفرخه الي تفقس لـــه ولهله العيـــال ..
عذبه : يالله ياهند .. والله اني متروسه كلام .. نفسي اظهره كله وارتاح ..
هند : وال .. لهالدرجه ..!!؟
عذبه : والله احس اني ابى احظن حد واصيح عصدره وارتاح .. شخص يحبني .. والله اني ارتاح من ايي بيتنا وايلس امبينكم .. ماتعرفين كيف مغصصين عليه فاهم وهله
هند : الله يعينج ياحبيبي .. والله دوم افكر فيج وشاله همج .. مافي امل يعتدل هالريال ويعرف قيمتج ..!!
عذبه : انا صابره وبعدني بصبر .. احبه ومااقدر اتخيل اني ببتعد عنه.. وعيالي بموت ولا احسسهم بضيقه واشتت ابهم بينا
هند : ليش تقولين هالكلام ؟ انتي خايفه من شوه ..؟
عذبه بحزن : هند .. انا حاسه اني انا وفاهم مابنطول مع بعض .. حاسه ان بيي يوم وبنتطلق
هند : لا عذابي حرام .. ليش تفكرين بهالطريقه .. والعيال كيف .. شو بيكون مصيرهم ..؟
عذبه : لا تلوميني ياهند .. من كثر المشاكل الي بينا احس اننا مابنستمر اكثر من ما استمرينا .. خلاص
هند : عذبه لا يكون انتي يايه الحين زعلانه ؟
عذبه : شو الجديد .. مش اول مره ولا اخر مره صدقيني ..
هند : والسبب هالمره شو ؟
عذبه : وهو كان في سبب قبل علشان يكون في سبب الحين
هند : ااااااااااف .. شو علته هالريل شو الي يرضيه علشان يريحج ويفكج
عذبه : المشكله هوه لو يرمس ويطلع عيوب ومشاكل كنت بتفاهم معاه وبنتناقش.. بس هوه ساكت ومطنشني موليه .. حتى الكلام مايتنازل يكلمني.. تقول مريضه ويخاف يجاربني .. هذا حتى من خذته كلمه حلوه ماكد قالي.. احبج ماحق يقولها لي
هند : بس عليه اصلا انه ماخذنج .. يحلمبج ويتمناج .. والله لو يدريبه سيف والا عمي جان غسلوله شراعه وادبوه وخلوه يعرف هوه بنت منوه ماخذ
عذبه وعيونها في عيون هند : هند بصراحه .. انتي تشوفين فيني شي غلط.. ماينحب .. والا ماينطاق .. قوليلي عادي لاتستحين .. خليني اعرف شو الغلط الي فيني ومخلي فاهم باغضني " كارهني " لاتجامليني لاني بنت عمج.. قوليلي انا بشعه ..والا دبه .. والا مقرفه .. فيني ريحه مخليتنه ينفر مني.. قولي هند دخيلج
هند حست بقهر من هالريال وحست بحزن اكبر على بنت عمها
تقربت منها وحضنتها ودموعها تنزل على خدها بالم
هند : يخسي والله .. هوه الي عوف ومايتعاشر .. وبس عليه ماخذ قمر.. بنت الكل يتمناها .. وبس عليه يايبتله احمد وناصر .. يحمد ربه ويشكره ويصليله كل يوم ركعتين شكر
سمعن دق على الباب خلاهن يمسحن دموعهن بسرعه
عنود وفطيم ولميا على الباب
عذبه : تعالن تعالن .. اونكن تستحن
عنود : هههههههههه هيه فديتنا .. مأدبات ويايات نستأذن علشان نيلس وياكن
هند : ههههههه ياويلي على الادب ماعرفكن الا اليوم
فطيم : لالا حرمة اخوي المصون .. من زمان فديتنا نعرفه ويعرفنا .. بس انتي مب ماخذه بالج
هند : لو سمحتي .. بعيد عن كلمة حرم اخوي المصون.. لانه بعده ما صار وخير لين يصير .. وثانيا مبروك الادب عليكن بس مب لايق صراحه عليكن هههههههه
عنود : هههههههه صح .. وعلى طاري المصون هاي .. سمعت ان سيف بيخلص وبيرد على اخر السنه.. صح ..؟
"سيف مسافر امريكا يدرس والحين بيخلص وهو اكبر من هند بسنتين وبجر امه وابوه"
لميا : هيه صح .. وان شاء الله من يرد على طول ناوي يعرس .. مره ماشي تفاهم لا خطبه ولا ملجة ههههههه يعني تزهبي ياحرم اخوي المصون
هند وويها محمر : وانتن من وين تيبن هاللعلوم .. لعنبوه انحن اصحاب الشأن محد خبرنا ولا شاورونا .. ويا راسكن
عذبه : صدق هند ماتدرين ..؟ لعنبوه سيف من زمان قايل لهلي ومخبرين اهلج وخالصين ..
هند مستغربه : شو لهدرجه واثقين هلي من موافقتي وماخبروني لين الحين ..!!
عنود : هههههههههههه وحليلهم والله مساكين هلي .. اصلا هم رواحهم ما قرروا شي ولا ربطوا ولا رسموا .. انتي وولد عمج المصون فاضحين عماركم وحاطين الاهل جدام الامر الواقع هههههههه
فطيم : جي من خلقتكم تتناسبون.. كلكم غرور وعناد هههههههه
عذبه : بسكن عاد مصخره .. بتطفرن بهند .. ياتيلسن ساكتات بأدبكن الي دشيتن به .. والا تظهرن وتفكنا
عنود : انزين خلاص خلاص .. ليش حرجتن كنا نسولف بس .. كملن انتن سوالفكن انحن بنتم ساكتات
هند : سوري .. مانرمس باسرارنا عند يهال .. احنا مب مخبل .. عقب دقيقه من طلعتكن عنا بنلقا رمستنا منتشره في الفريج كامل وعليها بهارات بعد هههههههه
عذبه : صدقج .. يالله عيل فارجن هههههههه
فطيم : يالله عنود .. يالله لميا فارجن .. ماتسمعنا شو نقول
فجن عنود ولميا عيونهن في فطيم ..
لميا : حــــــوه وانتي ويانا بعد
عنود : انا مابظهر الا وفطيم جدامي
هند : والا اقولكن .. يلسن انتن وانا وعذبه بنظهر ..
عنود : لالا شو ها ..!!
هند : هههههههههه يالله عذبه قمنا نسير نتمشا خاري
عذبه وهي تغمز لهند : يالله ..
طلعن هند وعذبه .. وتمن الثلاثي المرح بروحهن .. بس جنه فطيم حست عمرها غلط بينهن .. فنشت بتطلع ..
فطيم : هند خذوني معاكم .. شكلي غلط ويا هالقزمتين
هند من عـ الباب : هههههههه تعالي فديتج
تمن عنود ولميا .. وتساؤل كبير على ويهن .. " ليش لهدرجه احنا يهال "

 

الجزء الاول

في صباح اليوم الثاني من سفر بو هند .. قررت ام هند تزور امها وتسلم على اخوها بو غيث..
حزة الظهر بعد ماتغدوا .. دخلت على بناتها الحجره
ام هند : هند .. عنود .. اليوم بسير صوب يدتكن عوشه .. بسلم عليها من زمان عدي بها .. واخوي راشد وعياله ..
هند : مته بتسيرين امي ..؟ ويمديج تسيرين وتردين؟
ام هند : هيه الا سلام وبنتعشا عندهم ورادين ان شاء الله
عنود : منو ها الي بيتعشون بعد .. ليش منو بيسير وياج ..؟
ام هند : منو غيركن .. والا تبني اسير بروحي ..!!
هند بتردد : بس امي .. انحن من زمان ماسرنا صوبهم .. ونستحي منهم
ام هند : من شو تستحن.. هيلا اهلكن .. ووايد ماسرتبكن صوبهم وانتن صغار .. وبتنا عندهم ولعبتن .. لعنبوه مب زين جي من كبرتن قطعتن عنهم ..
عنود : انا مب متحمسه للسيره صراحه .. ولو ان خاطريه اشوف بنات خالي راشد شقا غدن !! بخيته ويماني وعيال خالي غيث وسويلم .. يالله اذكرهم شرا الحلم .. بس بعد متعايزه اسير لين دارهم .. حشه في مقطعه هايلا عايشين
هند: هيه صدقج .. ونا خاطريه بعد اشوف عيال خالي .. اذكر بخوت كانت ربيعتيه .. وغيث وسالم الاشرار .. وعيال الفريج والله مقلع كانوا هههههه
ام هند : شو قلتن بتخاوني ؟
هند وهي مب مقتنعه : مادري امي .. زين اجلي لين باجر ..تونا رادين من دواماتنا وتعبانين .. باجر الاربعاء بنسير ومن وقت بعد
ام هند : لالا مااروم ااخر لين باجر .. يدتكن ميهوده شوي ورمستها اليوم .. وتشره عليه ماوصلتها من زمان
عنود : انا ماابى اسير
هند : ولا انا صراحه .. امي غير هالمره .. بس خلي مطور ومحمد يخاوونج
حطة ام هند في خاطرها من بناتها .. بس تحيدهن .. هن مايسون شي الا اذا كان على مزاجهن وكيفهن.. ومايحبن يظهرن من البيت وايد ..
ام هند : على هواكن يوم ماتبن اتسيرين .. بس تراني مب راضيه عليكن .. باجر من تعرسن اخافكن حته تتعايزن توصلني شرا اليوم وانتن ماتبن توصلن يدتكن .. لعنبوه هاي امكن ولاتبن تسيرين تسلمن عليها ..!!
التفتن هند وعنود على بعض وطالعن عمارهن .. وحسن بكلام امهن مثل الصوط على جسمهن
هند .. والله صدقها امي .. من مته ويدوه هيه الي تينا .. وانحن مول مافكرنا نسيرلها .. ويوم كبرنا بعدنا نترياها هيه الي تي وتسلم .. وهي حرمه كبيره وماتتحمل طريق وسياره وهز لين توصل ..اسمينا تافهات صدق
عنود.. فديتج يايدوه.. اسمينا مقصرين فيج .. بس لو بسير انا اخاف هند ماتطيع اتسير ويانا.. ومافيه اسير بروحي صوبهم .. بتم بروحي مابعرف شو اسوي وبمل اكيد
نشت ام هند بتسير عنهن يوم طال سكوتهن ..
هند : امايا
ام هند : خير هند
هند وهي تطالع عنود ومتردده : امايا نحن بنسير وياج ..
ام هند : وعنود ..؟
عنود : ونا بعد امي اكيد وشموس بعد وسلامي
هند : ومطر ومحمد .. كلنا بنسير وبنسلم على يدوه وخالي .. ترا واجب علينا والا لا ..!!
ام هند تبتسم : ياحيكن يوم الله نور مخوخكن وعقلكن

&&&&&

في غرفة هند .. يالسه هند تتلبس وتتعدل للسيره .. وعنود حذالها تلبس عباتها وشيلتها
عنود : هند .. شو تتوقعين عيال خالي راشد بيقولون يوم يشوفونا ..؟
هند : شو بعد بيقولون غير اننا كبرنا وغدينا يعريات ههههههه
عنود : ههههههه ويا ويهج .. تحيدينهم زين .. انحن من عشر اسنين ما طحنا ترابهم ؟
هند تفكر : هممم .. احيد بخيته اكثر شي .. وايد كانت اليه مغامرات وياها..
واحيد سويلم كنت دوم فليل اخذه معايا المطبخ اذا كنت ابى ماي.. لاني كنت اتروع وايد .. بقعتهم تخوف
عنود : هههههههههه سويلم طبجة مطور .. انا اذكر اكثر شي غيث الكبير ..
كان اكبر واحد واطول واحد .. وكان دوم يشلنا فوق وكان هادي وايد بس كل العيال يخافون منه لانه من يعصب مايشوف هههههههههه
وقفت هند وسرحت تفكر بغيث .. هند نسته طول هالسنين .. يمكن لانها ما كان الها مغامرات وايد معاه .. ويمكن لانه كان وايد هادي ومايحب ييلس مع البنات الي كبر هند واخته بخيته وكان اكثر شي يلاعب العيال الاصغر مثل عنود ومحمد وسلامي
شموس كانت ماانولدت
انتبهن البنات من دخل عليهن اخوهن مطر
مطر : يالله خلصن ورانا درب
هند : يالله فديتك خلصنا
مطور تم يطالعهن من فوق لين تحت .. وعقب تم يضحك بستهزاء
هند وعنود تغيضن من ضحكته
هند : ممكن تفهمني على شوه تضحك؟
مطر : بتخبركن انتن وين تتحرن عماركن سايرات متعدلات كل هالعدول ومترصصات ههههههههههه
عنود طالعت هند وردة تطالعه
عنود : وين بعد سايرين زياره وبنجابل عرب ولازم نتعدل
مطر : هههههه وانتن ماتدرن ان هالعرب مايبالهم كل هالتعديل هيلا مايعرفون هالسوالف .. سحن روسكن ولبسن لكن كندوره مخوره وخطفن
هند : انزين الوحده تتعدل لنفسها مب للناس .. وانحن اصلا مانظهر الا جي .. وها عدولنا
مطر : زين كيفكن .. بس ترا خالي راشد مايحب هالسوالف وهالصبايغ .. اظني بناته من استون ماكد حطن لا روج ولا كريم اساس ولا حتى يعرفن السشوار
فجن عنود وهند عيونهن وطالعن مطر بستنكار
عنود : مطر صدق هالكلام؟
مطر : ها الي اشوفه عليهن
مطر كان يسير بيت خاله بين فتره والثانيه واكثر المرات يودي امه تزور امها
هند : مستحيل اصلا مافي بنت في الدنيا ماتعرف السشوار وهالتعديل
مطر : اوكي يعرفنه بس مايسونه
هند : والله جايز .. بس انا اراهنك ان بنات عمي راشد مب هينات واكيد انهن مايستغنن عن هالسوالف
مطر : اوكي اليوم ترانا سايرين وبنشوف
هند بتحدي : اوكي مطر .. بنشوف

&&&&

في الطريج
هند وعنود ساكتات ومندمجات في سوالف امهن ومطر ..
محمد ماسار معاهم لانه كان متواعد ويا ربعه
سلامه وشموس متلاصقات ببعض ويسولفن بصوت واطي وشموس تتثاوب من التعب
عنود : مته بنوصل ؟
مطر : ليش مستعيله على الي جدامج
عنود : بصراحه .. ضاربني حفوز .. ومتهوبه من العرب الي سايريلهم
مطر : هههههههههههههههه خايفه ياكلونج
ام هند : وابويا عليكن .. مسكتات من ظهرنا وضاربنكن حفوز .. تقول عرس
هند : ههههههه ياحي العروس يضون عليها .. ماتسير هيه فازعه للمعرس بحفوزها ..
عنود : امايا .. خبرينا عن ابويا يوم خذج .. كيف دل بقعتكم هاي وقدر يوصلج وياخذج ..!!
ضحكوا كلهم على هالسوأل السخيف
ام هند : شقا بعد دلها البقعه ..!! ثره هوه من وين ظاهر عنا.. يده ويدته هل امه الا من اهلنا .. وباقي هله من خواله بعدهم عايشين حذالنا وباقي طايفتهم غابوا
مطر : انتن كيف تتخيلن بقعتهم ؟
هند : انا احيدها شعبيات بس ومب وايد .. حوالي عشرين بيت .. وعندهم مسيد .. ودكان صغيرون بعيد عن البيوت .. بصراحه الي اذكره صحرا هههههه
عنود : انا اذكر بيت عود كنا دوم نسير صوبه .. وفيه حرمات عيايز ثنتين .. وايد طيبات .. يعطنا فلوس ونسير الدكان هههههههههه
ام هند : هههههههههههه الله يرحمهن .. هذي شنينه وبنتها غريبه.. كان عندهن خير وايد .. وغابن في نفس السنه
عنود بفضول : ومنو ورثهن ؟
الجميع ضحكوا الا ام هند ..
ام هند : الورث لين الحين معلق .. ويتضاربون عليه عيال عمومتن وعيال بناتهن.. الله يرحمهن ماكان عندهن ولد .. ويوم عرست غروب يابت بنتين وغاب ريلها.. وخذوا بناتها عيال عمومتن البنات .. وتمن رواحهن في هذاك البيت العود لين غابن محد يشرف عليهن .. ومن توفن تكاتوا العرب البعيد والجريب وكل يدور نصيبه بالورث
مطر : وشو صار ..؟ تجاسموه؟
ام هند : لا من خمس اسنين وهوه معلق .. لاوزعوه ولا خلوه يتصدقوبه عنهن.. الله يرحمهن
" شنينه وغريبه كانت اللهن ذكرى خاصه في نفس هند .. كانت هند وبخيته دوم يسيرن يلقطن النبق في حوشهن .. وتذكر يوم رقن فوق البيت لان النبق اهناك اكثر واحلى .. لكن بدون مايخبرن هل البيت والا يدروبهن
يومها حصلن العيوز شنينه فوق السطح وناشله شعرها الاحمر الطويل المحناي .. وتتشمس على فراشها .. وفاجه برقعها.. وقبل كان البرقع شي الزامي ماينخلع عن الويه ابدا.. ومستحيل الحرمه تطلع او تجابل أي شخص بدونه .. عاده بدويه قديمه
المنظر هذا كان مايغيب عن ذهن هند .. وكأنها كانت تشوف مخلوق غريب..
هزيل كل مافيه يرتعش .. وكأن الزمن نحت عليها عمره الي فات وجفت اوديته وانهاره .. وتركت اثارها .. خطوط طويله متعرجه في جميع الاتجاهات ..
كانت هذي المره الاولى الي تشوف فيها هند حرمه عيوز هالقد .. وهذا دخل الرعب في نفسها او خافت انها في يوم من الايام تكبر وتتحول لعيوز شبيهه بالعيوز شنينه
ماكانت هند تحب هالفكره .. ومن عقبها هند ما رضت تسير بيت شنينه وغريبه .. ومن عقبها هند كرهت النبق .. والسطح "
وعلى الذكرى هذي .. ابتسمت هند ..
ووصلوا بيت يدتهم وخالهم راشد

&&&&&&

الكل في السياره كان مبهت ويطالع من الدريشه ..
هند : مطور .. كيف كل هذا استوى ..؟
عنود : مااصدق .. لالا مستحيل ها بقعة قوم خالي ويدوه ..!!؟
شموس : الله عندهم حديقه
سلامي بدون اهتمام : عادي انزين شو الغريب في المكان .. العين احلى
مطر : ههههههههههه ليش مستغربات .. الحين الدوله كلها تتطور الا بقعة قوم خالي بتم مثل اما هيه ..
ام هند : عنبوه من زمان مادين الشوارع ومعمرين البقعه والمدارس وكل شي اختلف
هند طالعت المكان.. صار متطور وايد .. مب هوه هالمكان الي تحيده يوم هيه عمرها ثنعشر سنه .. بصراحه هند حزة في نفسها على ذكرياتها الي راحت .. ليش تغير كل شي .." ماتوقعت ان الي تذكرته طول اليوم عن خالي وعياله وبقعتهم وبيوتهم .. حتى بيت شنينه ويرانهم.. يتغير فجأه
ليش انا مستغربه !! يوم تركنا احنا هالمكان وهجرناه بهله .. ماتحسرت وتضايقت .. نفس ما انا الحين تضايقت يوم تغيرت ذكرياتي عنهم
معقوله انساهم طول هالسنين .. ويوم اتذكرهم .. ماالقاهم ..
او بالاصح .. ماالقى صورة الذكرى الي حنيت الها اخيرا..!!
وقربوا يوصلون بيت بو غيث .. ومروا على الشعبيه الجديمه الاولى ..
ومن عقبها لاحضوا فلل متوزعه بدون ترتيب .. يمين ويسار
وعقب .. دخلو الشعبيه الثانيه .. شعبية خالهن راشد ولفوا اللفه الي تذكرها هند زين ..
ها السكه الي ياما لعبن فيها ويا بنات الحاره
جدام بيت بو غيث
ونفسه البيت القديم بجدرانه واشجاره .. الي مازال باقي على حاله
تخلل هند وعنود ومطر وام هند شعور غريب .. مايحسوبه الا في هالمكان وحسوا هاللحظه بحنين وشوق لذكرياتهم
وقف مطر سيارتهم برا البيت .. ومن مكانهم لاحظوا مجموعة الناس الي ظهرت من البيت جدامهم.. مرحبين ومهللين كبار وصغار .. نزلت ام هند ومطر من السياره وتمن البنات مكانهن مب قادرات يحتركن وهن يشوفن هالجمهور من الناس يتجمهر على سيارتهم ويبطل بيبانهم وينزلونهم من السياره والبسمه شاقه حلوجهم والدموع على ويوهم
نزلت هند وخواتها وتموا العرب يبوسون فيهن .. حريم وبنات وعيال وخالهن راشد.. وفي زحمة هالعايله والاصوات دشوا داخل وقربوبهم في الميلس
ماخلوا شي الا وحطوه الهم .. الفواكه والرطب والقهاوي والثريد ومن كل ما لذ وطاب
قعدة ام هند وبناتها حذالها وسط مجموعة من الحريم والبنات .. ومطر يالس على طرف قرب خاله راشد وما كان موجود ريال غيره
هند وخواتها يالسات بستغراب كبير وكل الوجوه كانت يديده عليهن حتى ماقدرن يتذكرن بنات خالهن ويميزنهن عن بعض وبين هالرحيم كلهن
من عادة اهل المنطقه .. ان الجيران يتجمعون اذا سمعوا بضيف ياينهم
يتيمعون جميعهم في البيت المقصود
كيف عيل والضيف هالمره شيخه بنتهم وعيالها
الكل كان فاج اعيونه في شيخه وبناتها .. وتمت اعيونهن على هند وعذبه ماتخوز ..
ومن بين هالحريم كانن بخيته ويماني يرابعن شرق غرب .. الي تقهوي والي تدخن وعقب تقربن صوب هند وعنود وسلامي وشموس ويلسن حذالهن يرمسنهن
ام هند ترمس بناتها : عرفتنهن منو هالبنات؟
هند تمت عيونها بينهن وبين امها
هند : اكيد بخيته ويماني
بخيته : هههههههههه يحيج يوم تذكرتي اسامينا
هند : لعنبوه عاد مب لهالدرجه نسيناكم ههههههههه
يماني : انتي هند صح ؟
هند : هيه فديتج ..
"واشرت هند على خواتها "
هند : وهذي عنود .. وهذي سلامه .. وهذي عاد يديده عليكم .. اخر العنقود شموس
مسكة يماني ويه شماسي وباستها وهي تحضنها
يماني : فديتها تجنن .. حلوه تشبهج هند
هند : ههههههههه عيونج الحلوه فديتج
زقرة ام غيث بناتها ونشن صوبها ..
عنود تهمس لهند : شفتيهن .. يجنن هب حلاه عليهن .. جمال طبيعي ..
هند : لازم نسل هل امج لازم يجنن
عنود : بس احنا احلا ههههههههه
هند : مالت عليج سكتي بتفضحينا

&&&&

بعد ماتعارفن البنات وانقشعة اللمه المتجمهره على ام هند وبناتها
فضى البيت شوي
رغم ان جو هالزياره مأثر على كل ركن من اركان البيت البسيط
بخيته : عموه تعالن بتصلن في الحجره
ام هند : يالله بنات قومن بنصلي .. المغرب فوات
نشن وسارن وبخيته تمشي حذال هند وتسولف وياها ..
مرن من الميلس ودخلن داخل البيت .. طالعت هند زوايا البيت القديمه وممراته وتذكرة معاهن ذكريات مرتسمه في عقلها بخلفية هالزوايا والجدران
تنهدة هند وكأن بخيته سمعتها ..
بخيته : شو هند .. تعبانه من الطريج اكيد
هند وهي تبتسم : لا اتصدقين .. وجودي بينكم ووسط هالبيت الي اتذكره بكل تفاصيله .. شغلني من اني افكر بتعب الطريق او غيره
بخيته : اكيد هند تتذكرينا..؟ وتتذكرين بيتنا وغيث وسالم ؟ ..
هند : اكيد يا بخيته .. معقوله بننساكم .. ذكريات الطفوله .. ولعبنا والله كانت ايام حلوه
ابتسمت بخيته وهيه سرحانه في هالانسانه الي جدامها والي يايه من عالم اخر وكأنها تحفه فنيه او عارضة ازياء و فجأه لقوها في بيتهم .. وفرحة لان هالانسانه تمت الهم بصله قرابه .. وهي نفسها البنت الصغيره الي كانت جزء من ذكرياتها القديمه
حدرت ام هند وبناتها يصلن .. وراحن بخيته ويماني وام غيث عنهن علشان يخلنهن يرتاحن ..
عنود : امايا وايد جديم بيت قوم خالي .. ليش هم مايبنولهم بيت يديد.. ويتحولون فيه مثل ربعهم
ام هند : وين يتحولون عن بيت العيوز .. يدتج فديتها ماطاعت تظهر عن بيتها وبيت ابويه الله يرحمه .. والا لو على راشد وعياله ودهم يظهرون ويسوولهم بيت غير هالبيت الجديم
عنود : لا حرام عليها
ام هند : شو يسون !!؟ خالكن خيره وايد .. ولو تشوفن بيتهم شعبي وجديم .. لكنهم ناس مايفكرون في المظاهر .. والا لو يبوون جان بنو وبنوا وعاشوا احسن عن غيرهم بعد .. بس خالكن ماتهون عليه امه يضايقها بشي ..وهيه راحتها في هالبيت .. عاشت فيه وتبى تموت فيه .. يعني افداها وربي يخليها النا
هند : خالي هذا شي عجيب .. طيبته مب على حد مول
عنود : امي وين يدوه ماشفناها ؟
ام هند : يدتج شلتها بنتها غبيشه صوب المسيحه والحين بييون ..
هند : خالوه غبيشه بعد اهنيه ؟
ام هند : هيه من الصبح اهنيه
بعد ماصلن دخلت عليهن بخيته ويماني وام غيث ويابن خضرتهن وقعدن وياهن داخل يسولفن ويتقهوين
شوي وان ياهل عمره دون السنتين يوايق من الباب ويوم شاف مهاته داخل
دخل .. وهند وخواتها يطالعنه ويتفدنه.. كان يجنن متبتب وابيض وشعره طويل
مشا على طول وسار عند بخيته مسكته بخيته وحبته وحطته جدامها ويلست ترضعه..
هند وعنود فجن اعيونهن يطالعن بخيته والياهل
الحرمات يسولفن في عالم ثاني وشالات الحجره شل ..
هند : بخيته مته عرستي ؟
بخيته : من زمان من خمس اسنين
عنود : تصدقين ما كنا ندري والله بس الحين يوم يا الياهل وقبضتيه ترضعينه عرفنا هههههههه
بخيته : هههههههههه شو اسويبكن هاي بعد تنظاف لحسابنا معاكن وتقصيركن .. وبنتحاسب بعدين
هند : فديتج كم بتحاسبين وايد لقصور هههههههه

&&&&

طلعن هند وبخيته ومعاهن محمد ولد بخيته الي مايابت غيره ويابته عقب ثلاث اسنين صبر
وقفوا عند الباب الوراني للبيت المطل على الحوش الخلفي
البيت ماكان كبير ولكن كان يتميز بكبر حوشه وزراعته العاليه الي عمرها من عمر هالبيت .. تراث
هند : اذكر كان اهنيه في الزراعه اقفاص عصافير وحمام.. وكان هاك الصوب درس صغير حاطين فيه الذبايح.. ومن ورا البيت عند هاك الباب البراني المذبحه الي خالي كان يذبح فيها الذبايح ..
تذكرت هند هاللاشياء وهي تبتسم وبخيته وياها وتوافقها في كلامها
ومن نفس الباب الي اشرت عليه هند من شوي ... دخل ولد عمره 13 سنه وفي ايده سجين والدم فيها ..
هند صرخة من شافته والسجين في يده والدم فيها
تمسكة ببخيته وغمضت اعيونها
ضحكة بخيته
بخيته : هند شو بلاج ..؟ لعنبوه ها سعيد اخويه ليش خايفه منه
هند وهيه تطالع بخيته : ماشفتي السجين والدم يقطر منها؟
بخيته : ههههههههههه هيه كان يذبح
هند فاجه اعيونها برعب : يذبح منو؟
بخيته : الذبايح
هند تنهدة وقلبها يدق من الخوف
هند : ليش ..؟ ها ياهل ليش تخلونه يذبح ..؟
بخيته : شو ياهل .. ما شالله سعيد ريال وخلاص ايوزله الذباح
هند مب مصدقه عيونها والي شافته ولا بخيته والي تسمعه
ها شي يفوق تخيل هند
بخيته : لعنبوه ياهند ماتحيدين غيث قبل .. ابويا كان معلمنه الذباح وهو في نفس السن .. والكل اهنيه جي وتحيدين عاد انتي سنتنا تذبيحنا مايوقف .. وكل صغير وكبير يعرف هالشغله
وقفت هند وقررة ماتناقش بخيته في شي خلاص منظر الدم في السجين نشف الها دمها وتعب اعصابها
زقر سعيد اخته بخيته عشان تيه في المطبخ .. وخلت بخيته ولدها عند هند وسارت تشوف اخوها
مسكت هند محمد الصغير ويلست تتمشى في الزراعه وتحاول تنسى المنظر الي شافته
وهاللحظه شافت سياره كلوزر واقفه برا البيت من ورا .. وفي عامل ينزل الحشيش ويدخله داخل عند المعز في الشبج ( حضيره ) ..
وهاللحظه فج محمد من ايد هند وربع صوب السياره
ماعرفت هند شو تسوي .. زقرة على الصبي ولا رد عليها
ونفس الوقت بغت تتبعه بس ماقدرة تجابل العامل وهيه متعدله جي وبلا عباه .. بس شيله
وقفت تلفتت بس ما شافت حد مول .. ماشي مفر .. لازم اسير اييبه بروحي
تغشت هند و مشت وهي تزقر محمد .. علشان تنبه العامل لوجودها ..
وقفت عند الباب وشافت العامل وهو لابس فانيله ووزار ومن طوله ماقدرة تركز في شي .. سدها الخوف منه وهم رواحهم عنده .. كان شال محمد ويلاعبه
هند : هات محمد
وطا العامل محمد وخلاه يسير عند هند وهوه يطالعها بهدوء ..
ماحبت هند نظرات هالعامل وجراءته
مشا محمد صوبها ومسكة يده وحدرته .. ودخلت وسكرة الباب وراها
وخلة العامل وحشيشه برا البيت
بخيته : وين كنتوا ؟
هند : ولدج من شاف السياره برا ربع الها .. وسرت اييبه
بخيته : أي سياره ..؟
هند : كلوزر برا فيه حشيش وعامل اظن من عمالكم .. اما صدق انه وقح بشكاركم لعنبوه شقا يطالع ..!!؟ وكيف خالي لين اليوم مخلنه يشتغل عنده مايفنشه ..
بخيته محتاره : هند شو تقولين انتي ..؟ أي عامل واي يفنشونه ؟؟
هند : كم عامل انتو عندكم ؟
بخيته : عندنا واحد في العزبه بس ..
هند : هوه هذا عيل .. ياييب حشيش للمعز الي هنيه
لين اهنيه وخذت بخيته ولدها وردت ويا هند داخل ..
وفي نفس الحجره الي كانن فيها يصلن دخل عليهن غيث بيسلم على عمته وبناتها
دخول غيث هز المكان وقلوب البنات .. وحسن بضأله الغرفه الصغيره الي صارت مثل الصندوق وماتتحمل واحد بجسم غيث وحضوره فيها
فجت عنود حلجها وانخرست ..
ام هند لوت على غيث وتمت اتصيح وتحضنه بشوق ووله
هند انعقد السانها وهيه تشوف نفس العيون الي شافتها من شوي برا البيت وسكرت عنهن الباب
"هذا الي كنت اتحراه العامل .. طلع غيث ..!! يالله يالفشيله.. وانا اسكر الباب عنه .. واخليه خاري بحشيشه .. شو ها .. من اولها فضايح "
تغشن هند وعنود وسلم عليهن غيث
ام هند : عنبوه شياكن تقبعتن .. بتتغشن عن غيث ..!!؟ هذا الا اخوكن .. عقن الغشوه وين تبى بعد
عقت عنود غشوتها .. وعقت هند غشوتها وهيه مب قادره تشل عينها وتحطها في عين غيث عقب الفشيله الي صارت الها وياه..

&&&&&

عقب ماخلته هند برا وسكرت عنه الباب.. دخل غيث البيت وتسبح وهو يتذكر هند ويضحك في سره عليها " معقوله ماعرفتيني ياهند .. انا غيث الي كنتي تتشردين عني دوم .. وماتيلسين في مكان انا فيه.. غيث الي كان يحرسج عن عيال الفريج الي متخبلين عليج.. معقوله ماعرفتيني!! ولو.. بس انا مستحيل مااعرفج .. او اني ممكن انسى صوتج .. والبحه الي فيه.. والي مخبلتبي من زمان "

 

الجزء الثاني

وقفت هند .. وعيون غيث ترقبها بصمت .. وفي خاطره " يالله يالدنيا هذي هند .. هند الي نحيدها .. وعنود .. سبحان الله كيف الزمن يبعد و يغير .. بس هيه ليش سكرت عني الباب من شوي ..!!
هند " ليش هوه يطالعني جي ..!! عمره ماشاف بنات!! والله جايز .. بقعتهم مقطعه ومااظن قد شاف حد غير امه وخواته ههههه.. وشكله مايخوز عن العزبه .. من جي غادي اسمر .. ويديه مكدودات يشل ويحط .. ما انلام يوم تحريته عامل "
عنود " ااااااف خبال والله يجنن .. من وين ياب خالي هالولد .. ساندوكان مب غيث هههههههه ..جسمه يخبل معضل لو يمسك أي شي بيكسره.. اسمراني وعينه وخشمه حادات .. يذبح "
استحى غيث من وقفته جدام بنات عمته.. بس انقذته عمته غبيشه بدخلتها .
بعد ماسلمت عليهم طلبت من غيث يسير ينزل يدته من السياره
ظهر غيث ..
غبيشه : بخيته سيري ويا اخوج نزلي دوا يدتج من السياره
ام هند : لا برايها بخيته ولدها جدامها .. هند بتقوم تيبه
طالعت هند امها بتعجب .. " كيف ..!! انا اييبه ..؟!!"
ام هند : قومي هند بنتي هاتي الدوا من السياره ..
نشت هند وهي متردده وماتعرف وين تسير ومن وين تظهر ..
طلعت ووقفت على باب الصاله وشافت غيث وهو طالع من الباب الكبير ونزلت من الدري وتبعته
وصلت هند وشافت غيث فاج باب السياره ويرمس يدوته عوشه
تقربت هند منهم وسلمت
هند من ورا غيث : سلام عليج يدوه
اليده عوشه بصوتها الواطي والمبحوح : مرحبا
اخر غيث على ورا يفسح المجال لهند تتقرب من يدتها الي يالسه في السياره عشان تسلم عليها
وايهتها هند وباستها على راسها وحسة ان دمعتها خانقتنها وهي تشوف حال يدتها التعبان وضألة جسمها
" سبحان الله الانسان مهما يكبر .. يرد يصغر مثل البيبي .. الله يعطيج طولة العمر يايدوه ويشفيج "
غيث : يدوه هذي هند .. بنت عمتي شيخه
مسكة اليده ايد هند وتمت تطالع ويها زين وهي متفاجأه بالخبر
اليده عوشه : هند ..!!؟ بنت شيخه ..؟ منو يابج بنتي ؟
هند : اخوي مطر يدوه وامايا وخواتي كلنا اهنيه
اليده عوشه : يامرحبابكم والله .. فديت هالريحه
ردة اليده ولوت على هند وباستها وهي مب مصدقه انهم يوها اخيرا .. وفوق هذا حست انها مستحيه منهم وانها عنتبهم صوبها
قعد غيث يطالع هند ويدته وخانقتنه العبره على منظر يدته وهند
ويتريا هند تخلص سلامها علشان يشل يدوته ويدخلها داخل
انتبهت هند لغيث وخازت عن يدتها علشان غيث يشلها
تقرب غيث من يدته ورمسها شوي وشلها بين يديه الكبار مثل البيبي الصغير
وكانت ماتوزن شي مثل الريشه
مشا غيث بيدته وسار صوب الباب بيدخلها وهند ترقبهم
وعقب انتبهة لعمرها وتذكرة دوا يدتها ..
طالعت في السياره ولقت كيس واحد بس .. خذته وراحت تلحق غيث
دخل غيث حجرة يدوته وهند وراه وامه وخواته وعماته يترينهم في حجرة اليده..
حطها على فراشها بهدوء وحنان .. وايتمعن عليها بناتها يوايهنها ويسئلن عن حالها ووقف غيث يطالعهن وهند واقفه حذاله بالكيسه
كان منظر اليده يقطع القلب .. الكل كان يطالعها وكأنه يودعها
مرضها هالمره كان غير ومحد عرف له سبب
وعيالها .. واهتمام الكل فيها .. وييت البعيد .. وتلاقي اعيون وقلوب فرقتهن الايام السنين.. كان كل هذا ينغز كل واحد موجود في هالحجره ويقول..
يمكن ها الوداع الاخير .. ومانشوف هالانسانه الغاليه مره ثانيه وتجمعنا هذا ماهو الا عشان انها تودع .. والله يابنا الها تودعنا
يدوه عوشه كانت ضعيفه وحجمها صغير .. صوتها ماينسمع .. اكلها مثل العصفوره .. وما كانت تثقل على حد مول .. ولا حد قد شاف منها عوافه
الطيبه كانت عنوانها .. والمستحا كان غطاها
انولدة بسيطه .. وبتموت غنيه
غنيه بطيبتها ومحبة الناس الها .. كبيرهم وصغيرهم
بعد ماتعشوا .. ماصار عندهم وقت اطول يقضونه معاهم ويت حزه رجعتهم
كانت ام هند يالسه توادع امها وتصيح وماتبى تروح عنها .. من خوفها عليها .. او انها تروح وماترجع تشوفها مره ثانيه..
ام غيث : مسحي ويهج ياشيخه وتشاهدي .. امج بخير لاتزيغين بناتج عليها
ام هند : لا اله الا الله .. امايا مره تعبانه .. والحمى تسير وترد عليها .. ماروم اسير عنها
غبيشه : لا تسيرين ياشيخه .. يلسي عند امج .. اخاف يصيرلها شي وما تلحقين عليها
كانت هند يالسه حذال يدوتها وتمسح راسها بالماي تبرد عليها وعنود حذالها والعبره خانقتنها مب قادره ترمس
دخل عليهم مطر .. وماعرف شو يقولهن .. الوضع كان صعب وماينقال فيه شي
مطر بتردد : امي يالله فديتج جان بنسري
طالعت ام هند ولدها وردت تلحف ويها بشيلتها وتصيح
تقرب منها مطر ويلس حذالها ولوى عليها يهديها
مطر : افا ياام هند لاتفاولين على يدتيه .. ليش الصايح الحين
هند : مطر يدوه تعبانه .. امي ماتروم تسير عنها وتخليها بهالحاله ..
دموع هند كانت تسبق كلامها .. الاحساس الي يحسونه بيدتهم كان اكبر من انهم يتحملونه
غبيشه : يلسوا ابويه .. باتوا الليله اهنيه .. امك ماتروم تسير عن امها وتخليها بهالحاله
مطر طالع امه وخواته يتريا رايهن
ام هند : بنبات الليله وباجر ان شاء الله يصير خير بس جان هند وعنود يبن يردن .. ردوا انتو انا ببات
مطر : ها هند .. تبن تسيرن والا بتباتن ؟
ام غيث : وين بتسيرون بهالليل باتوا الليله كلكم ولاتخلون امكم ويدتكم بهالحاله
هند كانت متردده وعنود مول رافضه الفكره .. اما مطر ما كان يفرق عنده .. الي يبنه بيسويه الهن
هند : مانروم نسير عن يدوه .. انا بيلس عندها
طالعتها عنود وفجة عيونها بالرفض
عنود وهي تصاصر هند : هند وين تبينا نبات الله يخليج .. قومي نسير وبنيهم باجر
هند : ان سرتي اليوم وييتي باجر مابتلحقين على شي .. اخاف اسير وارد ومالقا يدوه .. خلينا نبات عندها الليله
عنود : مااقدر هند .. لازم نبدل وماعندنا ثياب وكيف ووين بنرقد ..!!؟
هند : اوه ياعنود .. ها وقتها هالرمسه ..!!؟

&&&

قرروا يباتون رغم رفض عنود
تمن ام هند واختها غبيشه وام غيث يالسات عند اليده عوشه وشلت بخيته هند وخواتها وودتهن غرفة يماني بيباتن فيها
يلسن البنات بحزن على الشبريه يفكرن بحال يدتهن ..
طلعت بخيته وردت عقب مع يماني يايبات ثياب وقمصان نوم لبنات عمتهن
هند : شو هذا بخيته ؟.. فديتج مانبى شي
بخيته : شو ياهند .. بترقدون بملابسكم !! عنبوه انتن مب في الشارع هذا بيت خالكن وان شاء الله مابينقصكن شي فيه
يماني : أي شي تحتاجنه طلبنه .. لاتستحن.. حطيت الكن فوط وقمصان نوم وشيل وجلابيات علشان تبدلن الصبح
بخيته : وكل شي تبنه مشط او شامبو او صابون كله داخل في الحمام
ماعرفت هند شو تقولهن .. واستحت منهن ومن الي يسوونه عشانهن
هند : مشكورات فديتكن ماقصرتن.. سمحولنا غثيناكم في وقت مب مناسب
بخيته : افا ياهند .. لا تقولين هالكلام ابد .. هذا بيتكم وهذي يدتكم.. ان ما تأزرنا هالوقت وتمت قلوبنا على بعض مته تبينا نجتمع ..!!
طالعن هند وعنود بنات خالهن بمتنان ممزوج بالحزن والتفتن على سلامه وشموس الي انسدحن اول مادخلن الحجره على الشبريه ونامن من التعب بدون حتى مايترين لين بيدلن ملابسهن
عنود : ههههههه ماصدقن لقن شبريه على طول بخنها رقده
يماني : ههههههه فديتهن تعبانات
طلعت بخيته ويمنى عنهن .. ونشت هند توعي خواتها بتبدللهن ثيابهن وعقب يردن يرقدن..
عنود انسدحت ويلست تفكر ..
عنود : سبحان الله ياهند .. الله يابنا هاليوم علشان نودع يدوه
هند بضيقه : انتي شو تقولين .. يدوه بخير مافيها شي
قالتها هند بتأثر وهي رافضه الفكره الي تقولها عنود
طالعتها عنود وحست انها ضايقت هند بهالكلام
يلست هند على الشبريه وماقدرة تكمل تلبيس شموس ويلست تصيح بحرقه " ماريد يدوه تموت.. احنا تونا الا حسين بواجبنا ناحيتها.. لا ياربي لا تشلها عنا الحين .."

&&&&

بعد ماخلصن البنات وبدلن .. فرشن فراش تحت الهن وخلن مكان امهن فوق على الشبريه حذال شموس وسلامي
عنود : مطر وين بيرقد ؟
هند : اظني بيرقد عند غيث او سالم
عنود : بس احنا ماشفنا سالم اليوم ..!!
هند بالها بعيد عن افكار عنود وكلامها
هند : والله عاد ما عندي فكره انا عن سويلم وتحركاته .. تلقينه بايت في وحده من العزب وياكثرهن عند خالي
عنود : ما شاء الله عليهم بعدهم بدو مال اول ..
نشت هند وتلبست شيلة الصلاه الي يابنها بنات خالها مع الملابس الي بيستخدمنهن و بيبدلبهن
عنود اطالعها بستغراب
عنود : وين تبين ؟
هند : بسير ايلس عند يدوه وبخلي امايا تي تبدل وترتاح
عنود انسدحت على الفراش
عنود : زين بس لاتباتون اهناك كلكم وتخلونا بروحنا اهنيه
هند : ليش مابتين تيلسين ويانا عند يدوه ؟
عنود : تعبانه منهد حيلي .. يبالي ارقد يومين .. بس ان صار شي وعوني
طالعتها هند بسخريه وانقهرة منها وطلعت

&&&&

في حجرة يدوه عوشه
هند : امايا قومي بدلي وتغسلي وريحي شوي .. انا بيلس عند يدوه
ام هند : زين بنتي تمي انتي عندها .. خالتج غبيشه توها غفت عينها وام غيث طرشتها عند ريلها ويمنى وبخيته بيين عندج الحين
هند : زين امايا .. وانتي فديتج رقديلج شوي ولاتحاتين يدوه احنا عندها
ام هند : مااروم ارقد عنها .. انا برد ايلس عندها عقب شوي وانتي جان صار شي زقريني
هند وهي مابيدها حيله تغير راي امها وتخليها ترقد وترتاح
هند : ان شاء الله اماه
طلعت ام هند وتقربت هند حذال يدوتها وحطة ايدها على راسها تشوف حرارتها.. وتسمع نصخها الي قامت تيره بصعوبه .. وجسمها الضعيف يقاوم الحمى والمرض بصعوبه
يلست هند تقرا عليها قرأن في سرها وتبرد عليها بالماي.. ما حست الا ببخيته تي تيلس حذالها ويماني
وشوي ان غيث واقف على الباب يبى يتطمن على يدته
غيث : شو حالها الحين ؟
بخيته : ان شاء الله احسن .. الحراره خفت عنها ..
غيث : الحمدلله ..
تقرب غيث منها ووخا عليها وحبها على يبهتها ويلس يطالعها .. وعقب حط ايده عراسها ويلس يقرا عليها قران
ما حست هند بنفسها الا وهي تتامل غيث وتعجب بحنانه الكبير الي من يت وهيه تلاحضه على كل الي حواليه.. من محمد الصغير لين يدته.. وحتى لين الحيوانات ..!!
قضوا كلهم هالليله سهر على يدوتهم عوشه وكان غيث كل فتره والثانيه يدخل عليهن يتطمن على يدته ويسير ييلس في الصاله يقرا قران ويدعالها بالشفا
راشد بو غيث كان ماخذ غرفته وغرفة امه .. طريق.. رايح راد عليها.. يوصلها يطالعها ويرد حجرته ييلس يصلي وينسدح شوي وعقب يقوم .. وعلى هالمنوال
قبل ما يأذن الصبح بشوي .. نشت هند بتتوضى قبل الزحمه الي بتصير على الحمام عقب ما ياذن الصبح
دشت غرفتهم وين بيباتون وشافت خواتها كلهن نايمات ..
وامها منسدحه حذال عنود وشبه نايمه
دخلت شوي شوي وسارت صوب الحمام
وردت طلعت .. الظاهر ان ماشي ماي في الحمامات ..!!
" ها وقته ..!! الحين شو اسوي ..؟ "
طلعت هند تدور بخيته .. ومن طلعت من الغرفه شافتها خاطفه جدامها والتفتت الها بخيته من شافتها
بخيته : ها هند ..
هند : كنت سايره اتوضى بس ...
بخيته : هيه اعرف .. مالقيتي ماي .. الحين انا سايره اشوف شو السالفه
هند : زين خذيني معاج
طلعن برا عقب مامرن حذال حجره يدوتهن وطالعنها ووصن يماني تترياهن وتتسمع لمحمد لانه راقد في الحجره الثانيه
وماشافت هند غيث في الصاله الي بات فيها يقرا قرأن .. وتسائلات " وين راح ؟ ..
هند : وين سايره ؟
بخيته : امي تقول ماشي ماي في البيت مول .. الظاهر التهوا اليوم ومحد انتبه للماي وحطه في درام الماي
هند : والحل الحين شو ؟
بخيته : الحل ان غيث سار بالسياره بيروي وبيي .. سمحيلنا هند .. الظاهر بنلعوزكم شوي
هند : خلي عنج انتي وعن تتعذرين .. انحن واحد
استغربت هند كيف انهم بعدهم عايشين حياه بدائيه .. " مااتذكر اننا في يوم حسينا ان ماشي ماي بالحمام .. كل شي نلقاه جاهز ومتوفر بدون ماندوره ونحس بحاجته .. هييه .. الظاهر في وايد فرق بين حياتنا وحياتهم.. وما اتخيل نفسي بقدر اتحمل هالعيشه لو انحطيت فيها .. الحمدلله ماطلعت منهم "
طلعت يمنى وزقرة على بخيته
يمنى : بخوت ولدج حمود نش يصيح .. لحقي عليه قبل مايوعي هل البيت كلهم
بخيته : ها وقته ..!!؟ هند فديتج بأمر عليج
هند : افا عليج .. امري الغلا
بخيته : يودي هالبجلي .. وفجي باب الحوش الوراني .. غيث بيي الحين بسياره الماي وبيلقاه مقفول
هند : افا عليج .. هاتي البجلي وسيري انتي عند ولدج
بخيته : مشكور فديتج وسمحيلي بعبل عليج
هند : هههههههه يالله يالله فكيني وسيري لحقي على محمد
سارت بخيته راده للبيت .. وهند سارت تبطل الباب لغيث
اول ما وصلت شافت من فتحة الباب التحتيه ليتات السياره تتقرب من الباب
فجة الباب بسرعه ومشت على طرف بعيد عن السياره ..
دخل غيث بتنكر الماي في الحوش .. وسار صوب درامات الماي.. ونزل وبحركه سريعه نزل الفوز وزقر على هند الي واقفه عـ طرف حذال الدرام عشان تساعده .. وهوه يتحراها يماني اخته .. لانهن تقريبا نفس الهيأه والجسم والطول
غيث : يماني يودي الفوز حطيه في الدرام ..
هند كانت واقفه حذال الدرام وتشوف غيث يتقرب منها وبناولها الفوز ..
مسكت هند الفوز بصمت .. وتمت تطالعه وتطالع غيث .. مب عارفه شو تسوي
ناولها غيث الفوز وسار يشغل دينامو السياره علشان تدفع الماي في الفوز وعقبها في درام الماي
طالعت هند حواليها وعقب طالعت درام الماي العالي الي واقفه حذاله .. وردت تطالع الفوز ..
"الحين هذا كيف بوصله لداخل الدرام ..؟ "
مشت صوب الدرام وشافت سلم حديد على طرفه يطلع للدرام ..
" يالله امري لله .. "
طلعت هند السلم ومعاها الفوز .. ما كان السلم عالي وايد .. بس حوالي ثلاث امتار .. فجة هند غطاة الدرام بصعوبه وحطة الفوز.. بس عقب ماعرفت شو تسويبه .. ان خوزة ايدها بيرد يطلع الفوز..
سمعت غيث يزقر
غيث : ها اشغل الماي ؟
ارتعش جسم هند وهي فوق وهي تسمع صوت غيث تحتها ويترياها تخلص
هند برتباك : هيه
سار غيث شغل الماي .. وحست هند ان اندفاع الماي كان قوي لدرجة ان الفوز تحرك من ايدها وطلع من فتحة الدرام
كان موقف لا تحسد عليه هند .. قام الماي يندفع من الفوز ويضرب باليدار الي حذال الدرام ويرجع يصب عليها وهي ماسكه الفوز بيد ومتمسكه بالسلم باليد الثانيه
غيث : شو تسوين .. حطي الفوز في الدرام وخشيه داخل عن مايطلع
سمعته هند وحاولت تسوي الي يقوله
دخلت الفوز وتمت تمده اكثر داخل لين ماا استقر داخل الدرام وعقب تطمنت انه مابيطلع
تمت واقفه على السلم بحسره وشعور غريب .. حست انها تبى تصيح ومب متحمله الي يصير الها .. وتحس ان الماي ينزل منها ومن ملابسها بغزاره
نزلة هند السلم برتباك وشوي شوي عن تطيح وماحست وهي في نص السلم الا بيدين تمسكها من خصرها وتشلها من على السلم وتحطها تحت على الارض وهيه فاجه اعيونها منصدمه وماقدرة تلتفت صوب غيث من الرعب الي حسته وهي طايره فوق في الهوى ونازله بريول ترتجف على الارض.. وهيه تحس انه قريب منها وايد ..
غيث بضحكه هزت كيانها من داخل : مستعيله على الماي اشوفج.. ما صدقتي شفتيه وتسبحتيبه مره وحده هههههههههههه
هند مارامت ترمس ولا تقول شي .." غيث يتحسبني وحده من خواته.. ااااه ياويلي احس ان نار شابه في جسمي .. الله يسامحج يابخوت "
استغرب غيث حال يماني وهدوءها .. و شك بالسالفه ..
ودقق في البنت الي جدامه .. والتفتت هند ببطئ بنص ويها صوبه .. وعيونها وساع وبنظرة خوف وضياع .. وويها يقطر ماي وثمها يرتجف.. وفيها رعب من الموقف فضيع
من لاحظ غيث ويه هند وعرف انها مب اخته .. خاف ولز على ورا وهو مب عارف شو يقول والا كيف يتصرف
مسكة هند بيدين ترتجف كندورتها الي يقطر منها الماي وشلتها عن الارض شوي وربعت صوب البيت .. وتم غيث مكانه فاج اعيونه ومنحرج من هالموقف
رفع غيث يديه وتم يطالعهن بنفور .. "والله ما كنت ادري انها هند .. تحريتها يماني .."
ماينلام غيث بعتقاده .. وخاصه ان الدنيا ليل وظلام .. وهند لابسه كندورة يماني وشيلتها
وبعد كان مستحيل ان غيث يتخيل او يفكر ان هالبنت الي تترياه في الحوش وتبطله الباب وحده ثانيه غير خواته
" شو ياب هند اليه .. المفروض تكون يماني والا بخوت.. شو اقولها الحين.. اخاف انها تفكر فيني تفكير خايس .. وهي ماتعرف اني انا اتحراها يماني.. يالله ياربي سامحني "

&&&&

ماقدرة هند ترقد او تغمض عينها .. اول ما دخلت البيت.. سارت على طول حجرتهن وربعت للحمام .. دخلت وسكرت بابه عليها .. وتمت يالسه وجسمها يرتجف.. وما انتبهة من وضعها هذا الا عقب مده .. و بصوت الماي يطلع فجأه من الفوزات الي كانت هند مبطلتنهن في المره الي فاتت ..
تسبحت هند وقامت صلت بهدوء وما رامت تظهر من الحجره ..وخافت تطلع وتحصل غيث برا ماتروم تجابله او تحط عينها بعينه ..
تطمنت على يدوتها من امها وانسدحة على فراشها تحت وتلحفت ..
تمت منسدحه واعيونها مفتوحه .. تستعيد الاحداث الي صارت الها .. وشعور بالخوف مسيطر عليها وتحس بحرارة يدين غيث بعدها على خصرها
" يا ربي سامحني.. مادري شو هالمواقف الي انحط فيها عند غيث .. ليتني ما طلعت ويا بخيته نترياه.. وليتني ما قررت ابات عندهم اليوم .. وليتني من الاساس ما ييت اليوم وياهم بيت يدوه وصارلي الي صار .."

 

الجزء الثالث
الساعه عشر الصبح قامت هند من نومها المتقطع .. فتحت اعيونها وهي تحس ان الغرفه فاضيه الا عليها وعلى فراشها الارضي ..
" الظاهر خواتي قاموا من النوم ومحد وعاني .. شو حال يدوتي !! اخاف صار شي ومحد قالي .."
قامت هند بسرعه تغسلة وبدلت ولفة شيله يماني على راسها وكانت بتطلع ..
دخلت عليها يمنى بعد ما دقت الباب
يمنى وابتسامه عريضه على ويها : صباح الخير
ارتاحت هند من شافت ويه يماني المريح وهو يبتسم وتطمنت ان الاوضاع في البيت زينه .. وان شاء الله يدوه يعني بخير
هند : صباح النور فديتج
يمنى : ييت ازقرج عالريوق .. واشوف اذا انتي واعيه
هند : هيه نشيت توني .. بس طمنيني على يدوه ؟
يمنى : لا الحمدلله يدوه اليوم اصبحت بخير .. وتخبرت عنكم بعد هههههه
هند : فديتها .. بسير اشوفها اول
طلعت هند ويمنى صوب يدتها وكانت تتمنى في خاطرها انها ماتصادف عيث ها اليوم.. لانها ماتظمن كيف بيكون حالها او شكلها ان تجابلوا ويه بويه
اكيد وهم اصلا بثنينتهم متفشلين من بعض
دخلت هند حجرة يدوتها بس ما شافت حد عندها بس بخيته ترتب الغرفه
هند : صبااااااح الخير يدوه .. ها شصبحتي اليوم ؟
اليده رفعت راسها تطالع منو يرمسها
تقربت منها هند اكثر ويلست حذالها علشان تسمعها وهي ترمس
يدوه عوشه : بخير الحمدلله .. هند !!؟
هند وتعلي صوتها عشان تسمعها يدوتها : هيه يدوه ماعرفتيني ؟
اليده عوشه : فديتج شقى ماعرفج .. بنت شويخ ما رديتوا العين اليوم ؟
يمنى : لا يدوه و مابنخليهم يردون بعد ههههههه
هند : يدوه شو رايج بنشلج ويانا العين هههههه؟
اليده عوشه : العين ..!! ؟ مادريبكم بنتي
يدوه عوشه تستحي ترد هند .. هند كانت تسوي سوالف بس.. ولكن لو هالشي ممكن يصير كانت بتوديها وياهم .. بس اكيد خالها مابيرتاح بهالراي ولا يدوه عوشه بعد
بخيته : ههههه لا يدوه ماشي سيره.. مانصبر عنج نحن .. وهم خليهم ايونج اهنيه جان يبونج .. وعلى الاقل نكسب شوفتهم هههههههه
هند : هههههههه محد بيخرب عليه غيرج يابخوت
الخال راشد من عالباب : خير اسمع شويرات عندكن ههههههههه
نشت هند واقفه بتسلم على خالها
هند : كنا نسوي سوالف على يدوه ههههههه
بو غيث : هههههههه .. شو حالها العيوز اليوم
بخيته : الحمدلله اليوم اصبحت بخير جنه الي صار البارحه جذبه
بو غيث : اظني الحرمه الي ودتها الها غبيشه امس ومسحتها فادتها.. والفايد الله
هند : ونعم بالله .. ها سبب بس والحمدلله الله شفاها النا
يمنى : يالله انزين تعالن بنتريق عمتي شيخه ويناتها يترينا
هند : عيل مطر اخويه وين ؟
بو غيث : مطر ترخص ورد العين
هند تفاجأة .. " ليش يرد ..؟ وانحن ..!! كم يبونا نيلس اهنيه؟ ومته بيرد علينا حضرته علشان يردنا العين ..!!"
هند : ومته قال بيرد ؟
بو غيث : هههههههههه جنج تبين الفكه منا .. وخطارج تسيرين
هند حاولت تضحك وتلطف الموقف
هند : لا حشا يا يخالي .. بس اتخبر عنه .. ولو هم يسيرون عنا و يخلونا عندك سنه مابغينا نسير عنك ونخليك ههههههه
بخيته : أي عيني .. انسير بتتريقين هند .. اخاف الا اليوع مأثر عليج ومخلنج تقولين هالكلام ههههههههه
هند : ااخ منج انتي ههههههه

&&&&&

غيث بعد سالفه الصبح مع هند .. توضا وراح المسيد صلى ورجع يلس عند يدوته.. وبعد مانشت عمته وبناتها عنود وسلامه وشمسه .. سلم عليهن وسار عن يدوته عشان يعطيهم المجال ييلسون عندها
ماعرف غيث هل يعتذر من هند .. علشان ماتتم حساسيه بينهم فيما بعد ..او مايحاول يكلمها في الحادثه الي صارت .. منعا للاحراج الهم هم الاثنين..!!
سار غيث حجرته .. حاول ينام ولكن كأن النوم كان يقوله "بعيد عن عينك تنام وهند في البيت .. !! "
كان التعب باين على ويه الجميع اليوم بعد ليلة البارحه الي قضوها سهر على يدوتهم
كان وقت الظهر بعد ماتغدوا
ام هند وعيالها قاعدين في الصاله وابو غيث ومرته وبناته معاهم
دخل سالم عليهم الصاله .. وكان راد من كليته
كان لابس لبس الدفاع وما عنده خبر عن البيت والي يصير فيه
تفاجأ سالم بالوجوه الي عندهم في البيت و قاعده جدامه في الصاله
نشت ام غيث والفرحه في عيونها ترحب بولدها الغايب
نظام سالم في كلية الدفاع.. اسبوع دراسه داخليه واخر الاسبوع بالاربعاء الساعه وحده يطلعونهم.. والجمعه المسا يرجعون للكليه مره ثانيه
وسالم عمره 20 سنه.. وقبله يمنى 22 و بخيته 24 و غيث الاكبر 26
ام غيث : مرحبا السااااااااع ملاين
تحجبن هند وعنود من شافن سالم .. بعد ما تذكرن ان الغشوه مب لازم
سلم سالم على امه وابوه بحراره وسلم على عمته وخواته وبقن بنات عمته .. سلم عليهن بنظره خجوله وهو يحاول يتذكر كل وحده بالضبط من تكون
سالم لهند : انتي هند اعتقد
هند : هيه نعم .. شحالك سالم؟
سالم : بخير ربي يعافيج .. بنعمه .. شحالج عنود وشحالج سلامه ..
وقعد يطالع شموس فتره وعقب ..
سالم : هذي الصغيره عاد ماعندي اسم الها .. هههههههه شو رايكم تعرفونا عليها ؟
ام هند : هههههههه هذي شمسه شيخة الحريم
سالم : مرحبا بشموس .. شحالج ؟
شمسه بعفويه : بخير .. شحالك سويلم ؟
سالم والجميع ضحكوا
عنود " الله يقطعها فضحتنا .. مادري من وين لقطة هالتسميه .. حشه ماتفوت "
سالم : بخير فديتج .. ما شاء الله شو هالمفاجأه .. ماكد سويتوها
ام هند : قلنا نسير عليكم انحن اول .. عشان يمكن تتلومون انتوا خلاف وتردولنا الزياره ههههههه
بو غيث : يامرحبابكم من سرتوا لين يتوا .. وان شاء الله من اي